Tinubos na kita ni Jesukristo sa satong mga kasalan, kun siring kita gabos ligtas na! - PSB 14

Pag-adal sa Bibliya Bilang 14

Tema: Tinubos na kita ni Jesukristo sa satong mga kasalan, kun siring kita gabos ligtas na!

Marso 29, 1998

An mga tataramon na ini magigin tama (totoo) kun an kaligtasan na pinagoolayan yaon sana sa pagbalukat o pagligtas sa tawo sa kapangyarihan nin kasalan asin kagadanan na an payo iyo si Satanas:

1.      Heb. 9:12 – Asin siya makasaro sanang beses naglaog sa santuwaryo, dara bako lamang an dugo nin mga kanding o nin mga torrilyo, kundio saiya mismong dugo na nagkamit nin daing tapus na pagtubos para sa sato.

2.      1 P. 1:18 – Giromdoma, an pagbalukat na ibinayad tanganig itubos saindo sa daing pakinabang na paagi nin buhay na minana pa hale sa saindong mga magurang bakong hale sa anuman na malalapaon, bakong plata ni bulawan, (v. 19) kundi an mahal na dugo nin sarong korderong  daing kaninan o digta, na iyo si Cristo.

3.      Mt. 26:27 –Dangan kinua an sarong kopa, asin pagkatapus na magpasalamat itinao niya ini sainda, nagsabi siya, ‘Mag-inom kamo gabos digdi, huli ta ini iyo an sakong dugo, an dugo nin tipan, na papabuluson para sa dakul sa ikakapatawad nin mga kasalan’.

4.      Rom. 4:25+ - Si Jesus na ginadan para sa satong mga kasalan asin binuhay-liwat tanganing magin katanosan nyato (an iba minasabi ‘magin katoninongan nyato’.)

5.      Rom. 5:6 – Mayo kita kaidtong magiginibo, kan sa tinalaan na panahon si Cristo nagadan para sa parakasalang two.

6.      Rom. 5:8 – Kan nagadan siya tanganing gibuhon kitang matanos, angay daw ngonian na magmaluya siya tanganing iligtas kita sa kaanggotan nin Dios?  Kan makabalik kit asa Dios huli sa pagkagadan kan saiyang Aki, kita kaidto mga kaiwal pa; ngonian na kita nakabalik na, kun siring pwede na daw kitang magsabing ligtas na lita sa paagi kan buhay nin saiyang Aki? Bako sanang kita nakabalik kundi napano kita nin maogmang pagsarig sa Dios, sa paagi ni Jesukristo satong Kagurangnan, na huli saiya nakua ta na an satong pakikipag-olian.

Sabi sa komentaryo para sa Rm. 3:24, an pagtubos pinunan sana sa kalbaryo asin ginarantuiyahan kan Espiritu, Ep. 1:14, 4:30, asin magigin kumpleto sana sa Parousia, LK. 21:28, kuna n pagpalibre sa kagadanan naseguro n asa paagi kan pagkabuhay-liwat kan hawak, Rm. 8:23. Kun siring, an pagtubos sa Kalbaryo nangangahulugan na para sana in isa pagpatawad nin mga kasalan na iyo an primerong tangga (first step) sa trabahong pagligtas nin Dios.

1.      Rm. 6:10-11 – An kagadanandai nanggad nin kapangyraihan saiya. Kan siya nagadan, nagadan siyang makasarong beses sana sa kasalan, kaya an buhay niya ngonian buhay na kaiba nin Dios; asin sa siring kaiyan na paagi, ikonsiderar man nindo an saindong sadiri bilang gadan sa kasalan alagad buhay para sa Dios diyan ki Cristo Jesus.

2.      Rm. 6:4 – Kan kita binonyagan naka-iba kita saiya sa lolobngan asin nakisumaro saiya sa kagadanan niya, tanganing mantang si Cristo binuhay-liwat sa mga gadan kan kamurawayan nin Ama, kit aman pwedeng mabuhay nin sarong bagong buhay.

Kaya an tataramon na kaligtasan dai sana nakapermanente sa gaweng pagtubos sa Kalbaryo nin huli ta an boot saibohon kaini iyo an kagadanan para sa kasalan. Alagad mantang igwa si Jesukristo nin inagihan na pagkabuhay-liwat sa mga gadan naiyo an pagkabuhay-liwat para sa bagong buhay, kun siringa n kristyano igwa pa nin ibang kaligtasan na piglalaoman asin pinaghahalat:

1.      Rm. 8:24 - 25 – Dapat makontento kitang maglaom na kita ililigtas – an satong kaligtasan harayo pa dai na kita maglalaom kun bako iyan totoo - alagad, siring sa sinasabi ko, dapat maglaom kitang ililigtas siring na kita dai pa ligtas – ini sarong bagay na dapat tang halaton na may pasensya.

2.      Phil. 3:11-14 – Iyo ini an paagi na ako minalaom na magkamit nin lugar sa pagkabuhay-liwat sa mga gadan. Bako na ako magigin perpekto pa: Dai pa ako nanggagana, kundi nagdadalagan pa, naghihingohang makamtan an premyong ikinamit sako ni Cristo  Jesus. Naseseguro ko saindo, mga tugang, harayo p asa isip ko na ako nanggana na. An masasabi ko lamang iyo ini: na nilingawan ko an naka-agi asin nagmamansay ako para sa maabot; ako minadalagan pa sagkod sa katapusan, para sa premyong inapodan sato nin Dios sa itaas na ririsibihon diyan ki Cristo Jesus.

3.      2 Co. 1:10 – Asin ilinigtas niya kita hale sa kagadanan, siring na ililigtas niya kita giraray: Oho, iyan an satong masarig na paglaom saiya, na sa maaabot na aldaw ililigtas niya giraray kita.

Pagkatapus nin pagtubos sa Kalbaryo, an kaligtasan nin Dios minapasige sa paagi nin:

1.      Rm. 6:22-23 – Kun siring ngonian kamo ilinigtas n asa kasalan, asin ginibong mga oripon nin Dios, asin nagkamit kamo nin premyo na nagdadara saindo sa saindong kabanalan asin nagtatapus sa daing kasagkoran na buhay.

(Premyo – 1 Co. 9:18,25)

Kun siring, an mga tangga nin kaligtasan iyo ini:

1.      Pagligtas sa kasalan (hustipikasyon);

2.      Pagigin mga oripon nin Dios, Phil. 2:12m (serbilisasyon, filiasyon);

3.       Pagdara sa kabanalan (santipikasyon);

4.      Pagkamit kan daing kasagkoran na buhay (dibinisasyon).

An patotoo kaini yaon sa mga minasunod:

1.      Tito 2:14 – Nagsakripisyo siya kan saiyang sadiri para sato tanganing patalingkason kita sa gabos na karatan asin tanganing linigon an sarong banwaan tanganing magin saiyang sadiri sana asin daing ibang ambisyon kundi an magigibo nin karahayan.

2.      Tito 3:7 – Ginibo niya ini tanganing gibuhon kitang matanos sa saiyang grasya, tanganing magin tagapagmana na minahalat kan pagmana kan daing kasagkoran na buhay (Hilnga man Heb. 1:14).

3.      Rm. 3:24m – Asin pareho sindang pinagin matanos huli sa libreng biyaya kan saiyang grasya sa paagi nin pagtubos ki Cristo Jesus na itinalaga nin Dios na magsakripisyo kan saiyang buhay tanganing ganahon an pagkainolean sa paagi nin pagtubod. Sa paaging ini, ipinamidbid nin Dios an saiyang katanosan; primero, para sa nakaagi, kan an mga kasalan dai pinadusahan huli ta pinugol niya an saiyang kamot; dangan, para sa presenteng panahon, sa malinaw na pagpahiling na siya matanos, asin pinatanos niya an lambang sarong minatubod ki Jesus.

4.      Heb. 9:28 – Kaya siring man si Cristo nagdusay kan sadiri nin saro sanang beses tanganing kuahon an mga kakundian nin kadaklan sa saiyang sadiri, asin kun siya magpahiling sa ikaduwang beses, ini bako nang tanganing makipag-areglar sa kasalan kundi tanganing premyohan nin kaligtasan idtong mga naghahalat saiya.

5.      Rm. 15:30 – Nakikimaherak ako saindo, mga tugang, huli ki Jersukristong Kagurangnan ta asin sa pagkamoot sa Espiritu Santo, na tabangan akong makalampas sa sakong mga pag-alaman sa paagi nin pagpamibi para sako sa Dios (Hilnga man an 2 Co. 4:17).

6.      1 P 1:4 – Asin an panuga nin sarong mana na dai mararaot o madidigtaan asin dai malipas, huli ta ini nasasaray sa langit.

7.      Heb. 10:39 – Kamo asin ako bako an clase nin mga tawong minasibog, asin huli kaiyan nawawara; kita an mga clase na minadanay sagkod na an satong mga kalag makaligtas.

8.      Rom. 6:18 – Pwede kamong nagin libre sa kaoripnan nin kasalan, tangani sanang magin ‘mga oripon’ nin katanosan. Kun mag-gamit ako nin mga terminong sa tawo tangani sanang matabangan ko an saindong natural na kaluyahan: siring na kaidto idinusay nindo an saindong mga hawak sa paglingkod sa bisyo asin kadustaan, kaya ngonian ibugtak na nindo iyan sa paglingkod sa katanosan para sa saindong kabanalan.

Bilang pagtapus, an trabahong pagligtas dai minatapus sa trabahong pagtubos sa kasalan (pagbalukat) asin an pagproselisar (pagpalaog nin mga bagong miyembro sa comunidad sa paagi nin bautismo) kundi minapadagos sa pagtrabaho sainda sa mga gaweng banal na minatapus sagkod sa pagkamit kan premyo nin buhay, an daing kasagkoran na buhay sa langit asin maniningong makilaban ngonian pa sana para sa buhay na ini.

1.      Mt. 23:15 - Herak man saindo, mga eskriba asin Pariseo, kamong mga hipokrito! Minabaklay kamo sa dagat asin sa daga tanganing makakumbensir nin sarong proselita^h, asin kun makua na nindo siya ginigibo nindong mas dobleng maningo para sa impyerno siring saindo.

(Komentaryo h – Sarong pagano na nakumbertir sa Judaismo. Nagin aktibong marhay an propaganda nin mga Judio sa kinaban nin mga Griyego-Romano.)

An pinakamahalaga iyo na an tawo makalaog ki Kristo hale sa luwas asin magdanay siya sagkod sa katapusan kan saiyang buhay sa daga digdi sa laog:

1.      Heb. 10:19-25 – Sa ibang mga tataramon, mga taugang, nagkaigwa kita nin deretso na maglaog sa santuario huli kan dugo ni Jesus, sa paagi nin sarong bagong dalan na binuksan niya para sato, sarong buhay na pwerta sa kortina, na an boot sabihon iyo an saiyang hawak. Asin kun igwa kita nin Pinakahalangkaw na Padi na namamayo sa harong nin Dios. Kaya, mantang kita minalaog, magin sinsero kit asa puso asin pano nin pagtubod, nawirikan an satong mga isip asin ligtas sa anuman na tala nin maraot na konsyensya asin an satong mga hawak nahugasan nin malinig na tubig. Magmasarig kit asa paglaom na satong irinorokyaw, huli ta an nanuga sato sarong maimbod.

2.      Heb. 6:20 – kun saen si Jesus iyo an naenot satong maglaog asin para sa kapakanan nyato, tanganing magin sarong halangkaw na padi sa orden ni Melkisedek, asin sagkod p aman.

3.      Jn. 14:6 – Si Jesus nagsabi: ‘Ako an Dala, an Katotoohan asin an Buhay ^d, Mayo nin siisay man na nakakadulok sa Ama kun bakong sa paagi ko.

4.      Rm. 11:25 – An gabos na ini igwa nin nakatagong rason, mga tugang, na habo kong magin ignrante kamo halimbawang nag-iisip kamong may mas naaaraman kamo kisa totoo. Nabuta an sarong seksyon kan Israel, alagad mapasige lang ini sagkod na an enterong paganong kinaban nakalaog na.

5.      1 Co. 5:12-13 – Bakong trabaho ko an paghusgar kaidtong mga tawong nasa luwas. Idtong mga nasa laog, kamo na mismo an mga huwes. Alagad idtong mga nasa luwas, an Dios iyo an huwes. Dapat paluwason hale diyan saindo an mga paragibo nin maraot na ini.

6.      1 Thes. 4:12 – Tanganing midbiron kamong kagalang-galang kaidtong mga nasa luwas kan Iglesia, maski ngani dai kamo diyan nakasarig.