ANO AN “EBANGHELIO” O “MARHAY NA BARETA” NIN KALIGTASAN? - PSB 28

Pag-adal sa Bibliya Bilang 28

Tema: ANO AN “EBANGHELIO” O “MARHAY NA BARETA” NIN KALIGTASAN?

8 Marso 1999

1.      Bil. 22:19-20 –  Uminabot an Dios ki Balaam asin nagsabi, ‘Ano ta yaon digdi kaiba an mga lalaking ini? Sinimbag ni Balaam an Dios nin arog kaini, ‘Ipinadara sako ni Bala kaki ni Peor an mensaheng ini…’ v. 20 – Uminabot an Dios ki Balaam kan banggi na asin sinabihan siya, ‘Bako daw na an mga lalaking ini napadigdi tanganing apudon ka? Bangon, asin umiba ka sainda. Alagad mayo kang ibang gigibuhon apwera kun ano an sasabihon ko saimo’.

2.      Sal 68:11 – Ipinadara nin kagurangnan sa saiyang mga mensahero an bareta, ‘Winarak ni Shaddai an dakulang hukbo’. Nagdurulag an mga hade, nagdurulag an mg ahukbo, an mga baba esa harong nagpupurot kan mga sinamsam.

72:3-4 Magdara logod nin sarong mensahe nin katoninongan an mga bukid asin kabubuldan para sa banwaan. Matanos na surugoon niya an mga pinakadukha, ililigtas niya an mga kaakian kaidtong mga nangangaipo, asin runoton an mga parapasakit sainda.

3.      Tal. 1:20m – An kadonongan nagkukurahaw nin makusog sa mga tinampo, ipinadangog niya an saiyang tingog sa mga plaza; minaapod siya sa mga kanto kan dalan, ipinaabot niya an saiyang mensahe sa mga tata kan siyudad…

4.      Is. 40:9 – Magsakat sa halangkaw na bukid, maogmang parabareta sa Sion. Maglurahaw sa sarong makusog na tingog, maogmang parabareta sa Jerusalem. Magkurahaw na daing pagkatakot, sabihi an mga banwaan nin Judah, ‘Uya an saindong Dios’.

48:17-20 – Kaya an sabi ni Yahweh saindong paratubos, an Sarong Banal nin Israel: Ako, si Yahweh saindong Dios, minatukdo kun ano an marahay para saindo, dinadara ta kamo sa dalan na saindong dapat lakawan. Kun rinimpos lamang nindo an sakong mga katugonan, magigin siring seguro sa salog an saindong kaogmahan, an saindong integridad siring sa mga alon kan dagat. An saindong mga kaakian madakul siring sa mga baybay. Dai gayod mapuputol o mapapara an saindong ngaran sa atubang ko.

49:1-6 – Pagdangog sako, mga isla, paghimate, mga banwaan sa harayong lugar. Bago ako namundag  inapod na ako ni Yahweh, ipinahayag na niya an sakong ngaran magpoon sa matris nin sakong ina…Asin ngonian si Yahweh nagtaram, siya an naghorma sako sa matris tanganing magin surugoon niya, tanganing ikabalik si Jacob saiya, tipunon si Israel saiya: Bakong tama na ika magin surugoon sana, tanganing ikabalik an mga tribu ni Jacob asin ibalik an mga nagkatarada kan Israel; gigibuhon takang ilaw para sa mga nasyon tanganing an sakong kaligtasan makaabot sa mga poro kan daga’.

52:7-10 – Gurano kagayon sa mga kabukidan an mga bitis kan saro na nagdadara kan marhay na bareta, na minabareta nin katoninongan, minadara nin kaogmahan, minarokyaw nin kaligtasan, asin minasabi ki Zion, ‘An Dios iyo an saimong hade!’ Magdangog! An saimong mga parabantay minaitaas kan saindang mga boses, sarabay na minakurahaw sinda sa kaogmahan, huli ta nahihiling ninda si Yahweh sa lalawgon, manatang pabalik siya sa Zion…

61:1 – Ipinadara sako an espíritu ni Yahwehng Kagurangnan, huli ta linahidan ako ni Yahweh. Sinugo niya ako tanganing magdara kan marhay na bareta sa mga dukha, sa pagbugkos kan mga pusong nagkabaraak; sa pagpahayag nin katalingkasan sa mga bihag, katalingkasan duman sa mga yaon sa bilanggoan; sa pagrokyaw kan paborableng taon hale ki Yahweh, sarong aldaw nin pagbalos hale sa satong Dios, tanganing rangahon idtong mga nasa kamundoan asin ribayan nin sarong kuwintas na bura kan mga abo; para sa mga badong pangloto iyo an lana nin kaogmahan, kaomawan para sa mga napupungaw.

5.      Mica 7:20 – Iwaras mo ki Jacob an saimong kaimbodan, asin ki Abraham an saimong pagkaherak, siring sa ipinanuga m osa samong mga magurang kaidtong mga nakaaging mga aldaw.

6.      Nahum 2:15 – Hilnga, nagmamadale an parabareta sa ibabaw nin mga kabukidan! Nagrorokyaw siya, ‘Katoninongan! Judah, ipagrokyaw mo an saimong mga piyesta, otoba an saimong mga panuga, huli ta dai na maagi diyan saimo si Belial; narunot nang padagos siya. Oho, ibabalik giraray ni Yahweh an ubasan ni Jacob asin an ubasan ni Israel. Huli ta rinaot sinda kan mga pararaot, pinurutol ninda an saindang mga sanga.

7.      Mt. 4:17, 23 – Magpoon kan momentong iyan nagpoon si Jesus na maghulit kan mensahe, ‘Magsolsol huli ta harani nang marhay an kahadean nin langit’. (Hilnga 3:2) Kaya linibot niya an enterong Galilea sa pagtukdo sa saindang mga sinagoga, ipinagrokyaw an Marhay na Bareta kan kahadean asin pagbulong kan gabos na clase nin kahelangan asin kamatean nin mga tawo. (An kahulugan kan tataramon na euaggelion (evangelio) iyo an ‘marhay na bareta’. An baretang ini iyo an nagdadangadang na pagdatong kan kahadean nin Dios, hilnga v. 17 asin 3:2. An euaggelion hale man sa tataramon na epangelia na an boot sabihon ‘panuga’).

10:7 – Mantang kamo naglalakaw, ipahayag na an kahadean nin langit harani nang marhay.

8.      Lk. 1:19 – An anghel nagsimbag, ‘Ako si Gabriel na nakatindog sa atubang nin Dios, asin sinugo ako tanganing magsabi saimo asin magdara saimo kaining marhay na bareta.  4:18 – Itinao sako an espíritu nin Kagurangnan, huli ta linahidan niya ako. Sinugo niya ako sa pagdara kan marhay na bareta sa mga dukha, sa pagfpahayag nin libertad sa mga bihag asin bagong pagkamansay sa mga buta; tanganing talingkason an mga nagkakaturongtongan, tanganing ipahayag an taon nin Kagurangnan na mabiyaya.

9:60 – Alagad nagsimbag siya, ‘Pabayae na an mga gadan iyo an maglubong kan saindang mga gadan, an saimong trabaho iyo an paglakaw asin ikalakop an bareta kan kahadean nin Dios.’

9.      Mk. 1:1-4 – An kapinunan kan Marhay na Bareta dapit ki Jesukristo, an Aki nin Dios. Naksurat sa libro ni Profeta Isaias: Hilnga ipapadara ko an sakong mensahero sa enotan mo; aandamon niya an dalan mo. Sarong boses an nagkukurahaw sa kalangtadan: Mag-andam nin dalan para sa Kagurangnan, tanosa an saiyang mga dalan, kun kaya buminutwa si Juan Bautista sa kalangtadan, nagtukdo nin sarong bautismo nin pagsolsol para sa ikaikapagpatawad nin mga kasalan. (Good News. Lumang Ingles ‘god-spel’. Sa Griyego euaggelion, kaya sa Latin evangelium. Ginagamit an tataramon na in isa BT tanganing ipakahulugan, bakong an sarong libro, kundi an Marhay na Bareta nin kaligtasan. Si Jesus parehiong iyo an mensahero asin mensahe kaiyan).

1:14 – Pagkatapus na dinakop si Juan, nagduman si Jesus sa Galilea. Duman irinokyaw niya an Marhay na Bareta hale sa Dios. Nagsabi siya, ‘Uminabot na an oras asin an kahadean nin Dios harani nang marhay. Magsolsol, asin magtubod sa Marhay na Bareta’.

10:29 – Si Jesus nagsabi, ‘Totoong sinasabi ko saindo, mayong siisay man na nagbaya nin harong, mga tugang na lalaki, mga tugang na babae, ama, mga aki o daga huli sakuya asin huli sa evangelio an dai babalsan nin dobleng sanggatos na mga harong, mga tugang na lalaki, mga tugang na babae, ina, mga kaakian asin daga – kaiba an mga kasakitan – ngonian sa panahon na presenteng ini asin daing kasagkoran na buhay sa kinaban na maabot.

13:9-10 – Magbantay kamo: dadarhon ninda kamo sa korte, papakulon kamo sa mga sinagoga; asin iaatubang kamo sa mga gobernador asin mga hade huli sako, tanganing magsaksi sa atubang ninda, huli ta dapat munang irokyaw an Marhay na Bareta s agabos na nasyon.

16:16 – ‘Lakaw kamo sa bilog na kinaban; irokyaw (ipahayag) sa gabos na linalang an Marhayna Bareta.

110.  Lk. 8:1 – Ngonian pagkatapus kaini nag-agi siya sa mga buro-banwa aisn baryo sa pagtukdo, asin ipinahayag an Marhay na Bareta kan kahadean nin Dios. Kaiba niya na Dose…

111.  Gibo 1:3 – Nagpahiling siya kan saiyang sadiri na buhay pagkatapus kan saiyang Pasyon sa paagi nin dakul na paagi: sa laog nin kuwarentang aldaw nagpadagos na magpahiling siya sainda asin magtukdo sainda dapit sa kahadean nin langit.

8:12 – Pagkatapus na naniwala sinda sa pagtukdo ni Felipe kan Marhay na Bareta dapit sa kahadean nin Dios asin an ngaran ni Jesukristo, sinda nagpabautismo, parehong mga lalaki asin babae.

10:36 – Totoo na ipinadara nin Dios an saiyang tataramon sa banwaan nin Israel, asin sa sainda dinara ni Jesukristo an marhay na bareta nin katoninongan – alagad si Jesukristo iyo an Kagurangnan nin gabos na kataowhan. Vv. 37-42 – hilnga 1:21-22; 2:22+.

17:3 – Nagpaliwanag asin nagpatotoo kun pano itinalaga na an Kristo dapat na magsakit asin magbangon hale sa pagkagadan. ‘Nagsabi siya, ‘Asin an Kristo iyo ining si Jesus na itinukdo ko saindo.’

18:11 – Kaya nag-erok duman si Pablo sa laog nin diyesiotsong bulan sa pagtukdo sianda kan tataramon nin Dios.

19:8 – Nagpoon siya sa paglaog sa sinagoga kun saen nagtaram siyang hayag asin nagpaliwanag  nin marhay dapit sa kahadean nin Dios. Ginibo niya in isa laog nin tolong bulan.

20:24 – Alagad an buhay para sako bakong sarong bagay na pagsayanagn nin mga tataramon, bastang pagkatapus nin sakong pagdalagan nagibo ko an misyon na itinbao sako ni Jesus na Kagurangnan – na iyo an pagtaong saksi sa Marhay na Bareta kan grasya nin Dios. Seguro ako na mayo saindo na nakaiba k osa pagtukdo kan kahadean an makakahiling giraray kan sakong lalawgon…huli ta mayong untok na ipinahayag ko saindo an bilog na katuyuhan nin Dios.

26:4-25 – An pahayag ni Pablo sa atubang ni Hadeng Agripa.

28:23,31 – Kaya nagtalaga sinda nin sarong aldaw para saiya asin sarong dakulang bilang ninda an nagbisita saiya sa harong na dinagusan niya. Ipinahayag niya an saiyang kaso sainda, nagpatotoo dapit sa kahadean nin Dios aisn pinakiolayan niya sinda dapit ki Jesus, nagpaliwanag hale sa Tugon ni Moises asin sa mga profeta…nagtukdo siya dapit kan kahadean nin Dios asin nagpahayag dapit sa katotoohan dapit ki Jesukristong Kagurangnan an enterong libre asn mayong olang sa kiisay man.

112.  Rom. 1:1-5 – Hale ki Pablo, sarong surugoon ni Kristo Jesus na inapod na magin apostol, asin espesyal na pinili tanganing maghulit kan Marhay na Bareta na ipinanuga nin Dios kaidto sa paagi kan mga profeta na yaon sa kasuratan. An baretang ini iyo an dapit sa Aki nin Dios na, sosog sa kinua niyang naturalesang sa tawo, saro siyang gikan sa pamilya ni David: dapit ini ki Jesukristo na satong Kagurangnan na, sosog sa hirarkiya kan espíritu, an espíritu nin kabanalan na yaon saiya, ipinahayag na Aki nin Dios sa entero niyang kapangyarihan sa paagi kan saiyang pagbangon hale sa pagkagadan. Sa paagi niya nag-ako kita nin biyaya aisn an satong misyon nin pagka-apostol tanganing ihulit an pagkuyog nin pagtubod ta gabos na mga paganong nasyon sa pag-onra kan saiyang ngaran. V. 9 – An Dios na sakong sinasamba sa espíritu sa paghulit kan Marhay na Bareta kan saiyang Aki an nakakaaram na dai ako naguuntok sa pagsambit ko saindo sa sakong mga pamibi. Vv. 15-16 – Iyo ini kun tano ta gusto ko na darahon an Marhay na Bareta diyan man saindo sa Roma. Huli ta dai ko ikinakasupog an Marhay na Bareta: iyo iyan an kapangyarihan nin Dios na nagliligtas sa gabos na may pagtubod – enot sa Judio, alagad an mga Griyego man –

3:24-25 – AnJudio asin pagano parehong nagkasala asin sinubasta an kamurawayan nin Dios, asin pareho sindang pinagin matanos huli kan libreng regalo kan saiyang grasya sa paagi kan pagtubos ki Kristo Jesus na itinalaga nin Dios na magsakripisyo kan siayang buhay tanganing makamtan an rekonsilyasyon sa paagi nin pagtubod.

5:1-2, 6-11 – Kun siring nahiling ta sagkod digdi n asa paagi ni Jesukristong Kagurangnan huli sa pagtubod hinusgaran kitang matanos asin matoninong sa Dios, huli ta sa paagi nin pagtubod asin huli ki Jesus na nakalaog kita sa estadong ini nin grasya kun saen makakahambog kitang makakalaom sa kamurawayan nin Dios…Mayo pa kitang magiginibo kaidto kan sa saiyang itinalaan na panahon ginadan si Kristo para sa mga tawong parakasala. Bakong pasil na Magadan maski para sa sarong marhay na tawo – dawa pa siempre para sa saro na talagang maninigo, an sarong tawong puwedeng handa na magpagadan – kundi an prueba na namomotan kita nin Dios iyo na si Kristo nagadan mantang mga parakasala pa kita. Sa pagkagadan niya tanganing magin kitang matanos, pwede daw ngonian na mabigo siya na ikaligtas kita sa kaanggotan nin Dios? Kan kita ibinalik sa Dios huli sa pagkagadan kan saiyang Aki, kita mga kaiwal pa niya; ngonian na kita nakabalik na, totoong puede na kitang ibilang na ligtas huli kan buhay kan saiyang Aki? Bako sanang ibinalik na kita kundi napano na kita nin maogmang pagsarig sa Dios, sa paagi ni Jesukristong Kagurangnan, n asa paagi niya nakua tana an satong rekonsilyasyon.

10:14-21 – Alagad dais inda mahagad kan saiyang tabang kundi sinda magtubod saiya, asin dai sinda matubod saiya kun dais inda nakadangog dapit saiya, asin dais inda makakadangog dapit saiya kun dais inda makakua nin sarong parahulit, asin dais inda mamamakua nin sarong parahulit kun mayong saro na sinugo, alagadsiring sa sinasabi kan kasuratan: Sarong maogmang tanog an mga linakad kaidtong mga nagdadara nin marhay na bareta. Siyempre, bakong gabos an nagdadangog sa Marhay na Bareta. Siring sa sinabi ni Isaias: Kagurangnan, pira an nagtutubod kan saimong irinorokyaw? Kaya an pagtubod hale sa kun ano an ihinulit, asin an ihinulit hale sa tataramon ni Kristo.

11:15 – Huli ta an pagsikwal ninda nangangahulugan nin rekonsilyasyon kan kinaban, aram daw nindo an kahulugan kan saindang pag-ako? Mayong iba kundi an sarong pagkabuhay hale sa mga gadan.

11:28 – Mga kaiwal nin Dios an mga Judio sa bagay sana kan Marhay na Bareta, asin mga kaiwal para sa ikakarahay nindo; alagad bilang mga tawong pinili, namomotan pa sinda nin Dios, namomotan huli kan saindang mga magurang.

15:16-21 – Pinagin niya akong sarong padi ni Jesukristo, asin gigibuhon ko an sakong trabahong pagka-padi sa pagdara kan Marhay na Bareta hale sa Dios sa mga pagano, asin tanganing magin kaako-ako sinda bilang sarong atang, na pinabanal huli kan Espiritu Santo.

16:25+ - Kamuraywan saiya na iyo an nagtatao saindo nin kusog  na mabuhay sosog sa Marhay na Bareta na sakong ipinaghuhulit, asin kun saen ipinahayag si Jesukristo, an kapahayagan kan sarong misterio na itinago bilang sekreto sa daing katapusan na panahon, alagad malinaw na ngonian kaipuhan na ipaisi sa mga pagano sa lambang lugar tanganing darahon sinda sa pagkuyog nin pagtubod.

113.  1 Co. 1:17, 21-24 – Huli ta dai ako sinugo ni Kristo tanganing magbautismo, kundi maghulit kan Marhay na Bareta, asin dai ihulit iyan sa mga tataramon nin pilosofia na dai puwedeng ikapaliwanag kaiyan an krusipiksyonni Kristo. Kadonongan idto nin Dios na an kadonongan in tawo an dai makamidbid sa Dios, ini in huli ta bot nin Dios na ikaligtas idtong igwa nin pagtubod huli sa kalolongan kan mensahe na samong ipinaghuhulit. Kaya, mantang an mga Judio minahagad nin mga milagro asin an mga Griyego minahanap nin kadonongan, uya kami naghuhulit nin sarong Kristong ipinako sa krus; para sa mga Judio ini sarong kaolangan na dai ninda kayang lampasan, asin para sa mga pagano kalolongan, alagad duman sa mga inapod, maski sinda mga Judio o Griyego, sarong Kristo ini na iyo an kapangyarihan aisn kadonoingan nin Dios.

4:15 – Puwedeng magkaigwa kamo nin rinibong mga guwardiya ki Kristo, alagad dai puwedeng magkaigwa nin sobra sa sarong ama asin ako iyo an nagmundag saindo ki Kristo Jesus sa paagi kan paghulit kan Marhay na Bareta.

9:12 – Tinutugotan an iba na magkaigwa kan mga deretsong ini diyan saindo asin an samong deretso seguradong mas dakula. Sa totoo dai mi lamang pinagyari an deretsong ini. Sa kabaliktaran nakontento kami sa anuman na bagay tangani sanang dai maolonga sa anuman na paagi an Marhay na Bareta ni Kristo…v.14-18 – Sa kaparehong paagi nagboot an Kagurangnan na idtong naghuhulit kan evangelio dapat mabuhay hale sa evangelio. Alagad dai ko ipinapangyari an arin man sa mga deretsong ini, asin dai ko isinusurat an gabos na ini tanganing makua an tratamiyentong ini para sa sakong sadiri. Gusto ko pang Magadan kisa tugotan an siisay man n akuahon an sarong bagay na puede Kong ipag-abaw-abaw. Bako na ipinagaabaw-abaw ko an paghulit kan evangelio, nin huli ta ini sarong trabaho na inatang sa sako; dapat akong kastiguhon kun dai ko ihulit iyan. Kun sadiri ko an nagpili kan trabahong ini, dapat akong bayadan para diyan, alagad ta dai man, iyan sarong responsabilidad na ibinugtak sa sakong mga kamot. Aram daw nindo an premyo para sa sako? Iyo ini: sa sakong paghulit,  na ikatao Kong libre an Marhay na Bareta, asin dai magpirit sa deretso n aitinatao sako kan evangelio. V. 23 -

114.  2 Co. 4:3-5 –  Kun samong evangelio dai nakakalagbas sa velo, kun siringa n velo yaon duman sa mga mayo sa dalan nin kaligtasan; sa mga bakong paratubod na an mga isip binuta kan dios kaining kinaban tanganing ulangon sinda na mahiling an ilaw na itinatao kan Marhay na Bareta kan kamurawayan ni Kristo, na iyo an imahen nin Dios.

5:19 – Sa ibang mga tataramon, an Dios ki Kristo iyo an nagbalik kan kinaban saiya, dai ibinibilang an mga pagkakasala nin tawo lavan sainda, asin ipinaniwala sato an bareta na kita nakabalik na. Kaya kami mga embahador para ki Kristo; garo baga ini an Dios an nakikimaherak sa paagi nyamo, asin an pakimaherak na ginigibo mi sa ngaran ni Kristo iyo ini: magbalik na kamo sa Dios. Para sa ikararahay nyato binoot nin Dios na an mayong sala magin kasalan, tanganing sa saiya kita magina n karahayan nin Dios.

9:13 – Sa pagdolot nindo kan serbisyong ini, ipinapahiling nindo sainda kun ano kamo, asin iyan an minatulod sainda na magtaong kamurawayan sa Dios sa paagi na inako asin ipinahayag nindo an evangelio ni Kristo, asin huli kan saindong may pagkamateng henerosidad sa sainda asin para sa gabos.

10:14,16 – Dai kami nagpapalakbang kisa dapat; kun dai, dai kami makakaabot saindo, siring sa nakaabot kami diyan saindo na dara an evangelio ni Kristo. An boot Kong sabihon, dadarahon mi an evangelio sa mga lugar na mas harayo saindo, na mayong paglaog sa oma nin siisay man, ni nagpapaabaw-abaw kan trabaho na ginibo na.

11:4 – Huli ta arin na bagong salta magpahayag sana nin bagong Jesus na iba man duman sa samong ipinaghuhulit, o na mag-ako lamang kamo nin sarong bagong espíritu, na iba man duman sa inako na nindo, o sarong bagong evangelio na iba duman sa inako na nindo – asin inaako nindo iyan na may bukas na mga takyag.

115.  Ga. 1:4-9, 16 – Nagngangalas ako sa rikas kan saindong pagtalikod sa saro na nag-apod saindo asin pagdesisyon na magsunod sa ibang bersyon kan Marhay na Bareta. Bako na puwedeng igwa nin sobra p asa saro sa saro na marhay na bareta; kundi igwa nin mga paraparibok diyan saindo na boot maghira kan Marhay na bareta ni Kristo; asin gusto Kong patanidan kamo na kun igwa nin siisay man na maghulit nin sarong bersyon kan Marhay na Berta na iba man sa ipinaghulit nyamo saindo, magin siya saro samo o sarong anghel sa langit, dapat siyang kondenaron. Inuutro ko lang an sinabi na nyamo saindo kaidto: kun igwa nin siisay man na naghuhulit nin sarong bersyon kan Marhay na Bareta na iba kan sinabi nyamo saindo, dapat siyang kondenaron.

2:2,5-7 – Nagduman ako bilang resulta nin sarong kapahayagan, asin ilinatag k osa pribadong paagi sa atubang kan mga namamayong tawo an Marhay na Bareta siring sa irinorokyaw sa mga pagano; ginibo ko in isa takot na an kurso na sakong kinua o na dinalagan na dai pwedeng itugot. Nagmaigot ako na bantayan para saindo an totoong kahulugan kan Marhay na Bareta, na nagsayuma ako maski huli na lamang sa pagpaonra na magpahunod sa mga tawong idto maski sa sarong momento. Blang resulta, an mga tawong ini na minimidbid na mga líder – bako na an saindang importansya igwa nin kahulugan sakuya, nin huli ta mayo nin mga paborito an Dios – an mga líder na ini, siring sa sinasabi ko, mayo lamang nin idinagdag sa Marhay na Bareta siring sa ipinaghuhulit ko. Sa kabaliktaran, minidbid ninda na inapod ako sa paghulit kan Marhay na Bareta sa mga bakong turi siring na si Pedro inapod na maghulit kaiyan sa mga turi. V. 14 – Kan mahiling ko na dai ninda iginagalang an totoong kahulugan kan Marhay na Bareta, sinabihan ko si Cephas sa atubangan kan lambang saro, ‘Maski kamo mga Hudyo, namumuhay ka siring sa mga pagano asin bakong siring sa mg aHudyo, kaya mayo kan in deretso na ipaarog sa mga pagano an mga gawe-gawe kan mga Hudyo.’

3:7-9, 17-18 -  Dai nindo nahihiling na idtong minasarig sa pagtubod iyo an mga aki ni Abraham? Hinulaan kan kasuratan na gagamiton nin Dios an pagtubod tanganing gibuhon matanos an mga pagano, asin ipinahayag an Marhay na bareta kan sinabihan si Abraham na: Sa saimo bebendisyonan an mga pagano. Kun siring idtong minasarig sa pagtubod minaako nin parehong bendisyon siring ki Abraham, an tawong igw anin pagtubod. Alagad an sakong punto iyo ini: kan ipinahayag nin Dios an saiyang kabotan sa tamang porma, mayong lehe na nagsunod kuwatrosiyentos asin treyntang taon pagkatapus an puwedeng magpawarang saysay kaiyan asin waran nin kahulugan an panuga. Kun minamana kamo nin sarong bagay bilang sarong legal na deretso, iyan minaabot saindo bakong bilang bunga nin sarong panuga, asin sa porma talaga nin sarong panuga na itinao nin Dios an saiyang regalo ki Abraham.

116.  Ep. 2:17 – Pagkatapus duminatong siya tanganing darahon an Marhay na Bareta nin katoninongan, katoninongan para saindo na nasa harayo asin katoninongan para duman na yaon sana sa harani. Huli saiya, pareho kitang nagkaigwa sa sasarong Espiritu kan satong dalan pasiring sa Ama. Kaya bako na kamong mga ibang tawo o mga bisitang dayuhan: kamo mga siyudadano siring kan gabos na mga santo, asin miyembro kan harong nin Dios.

3:1-3 – Si Pablo, sarong suruguon kan ministerio.

3:6 – Nangangahulugan iyan na an mga pagano minahiras ngonian kan parehong panuga na itinao saindo kaidto, diyan ki Kristo Jesus, huli kan evangelio. Ako ginibong suruguon kan evangeliong iyan huli kan sarong regalong hale sa Dios na itinao sako huli kan saiyang sadiring kapangyarihan. Ako, na iyo an pinakamenos sa pinakasadit sa gabos na mga santo, pinaniwalaan kan espesyal na regalong ini, bako sanang sa pagrokyaw sa mga pagano kan daing sukol na kayamanan ni Kristo, kundi an pagpaliwanag man kun pano itatao an ministeryong ini.

6:15,19 – Isulot nindo bilang sapatos sa saindong mga bitis an kalistohan sa pagwarak kan evangelio nin katoninongan…asin ipamibi man nindo ako tanganing matawan nin oportunidad tanganing mabuksan an sakong nguso asin magtaram na daing takot aisn ikatao an misterio kan evangelio, na huli kaiyan makataram logod akong maisog siring sa dapat.

117.  Phil. 1:5,7,12,14,16,27 – Maogmang namimibi ako, sa pagromdom kun pano tinabangan nindo ako sa pagwarak kan Marhay na Bareta magpoon sa aldaw na enot nindong nadangog iyan sagkod ngonina na presente. Natural sana na arog kaini an mamatean ko para saindo, huli ta naghihiras kamo kan mga pribilehiyo na para sa sako: an sakong mga kadena asin an sakong trabahong pagdepensa asin pagpatindog kan evangelio. Mga tugang, maogma akong sinasabi saindo na an mga bagay na nangyari sako nagin aktuwal na tabang para sa Marhaye na Bareta. Dakul sa mga tugang nakakua nin isog sa Kagurangnan huli kan mga kadenang ini asin mas lalong nagigin maisog sa pagpahayag kan Mensahe na mayong takot…hale sa mayo kundi pagkamoot, mantang aram ninda na iyo ini an naiiba kong paagi sa pagdepensa kan evangelio. Sa aro-aldaw nindong pagkabuhay, maglikay sa anuman na bakong angay sa evangelio ni Kristo, tanganing, kun umabot ako saindo asin mahiling ko mismo, o maghiling sa harayo asin makadangog lamang dapit saindo, maaaraman ko na sararo kamo sa pagsabat sa mga ataque na may pusog na pakikitusayan, sararo sa saindong pagkamoot para sa pagtubod sa evangelio asin garo dai mayuyugyog kan saindang mga kaiwal.

2:22 – Alagad aram nindo kun pano niya pinatotoohan an sadiri sa paagi nin pagtrabaho kaiba ko huli sa Marhay na Bareta siring sa sarong aking lalaki sa saiyang ama.

118.  Col. 1:4-6,19-23,25-29 – Dai pa sana nahahaloy na nadangog nindo ini, kun ini ibinareta saindo an mensahe nin katotoohan. An Marhay na Bareta na nakaabot saindo naglalakop sa bilog na kinaban asin nagtatao nin kaparehong bunga siring kan nangyari diyan saindo magpoon kan aldaw na nadangog nindo an dapit sa grasya nin Dios asin nasabotan kun ano talaga ini…huli ta gusto nin Dios na an gabos na perpeksyon makua saiya asin an gabos na bagay makabalik sa paagi niya asin para saiya, gabos na yaon sa langit asin gabos na yaon sa daga, kan guminibo siya nin katoninongan huli kan saiyang pagkagadan sa krus. Dai pa sana nahahaloy, kamo mga dayuhan asin mga kaiwal, sa dalan na saindong iniisip asin sa mga bagay na maraot na giniribo nindo; alagad ngonian ibinalik nya kamo, huli kan saiyang pagkagadan asin sa hawak na iyan na magagadanon. Ngonian nakakaatubang na kamo saiya na banal, malinig asin daing digta – mantang nagdadanay kamo asin nakatindog na pusog sa solidong pundasyon nin pagtubod, na dai minapabayang iatang an saindong sadiri hale sa paglaom na ipinanuga kan Marhay na Bareta, na saindong nadangog, na ipinaghulit sa enterong rasa nin katawohan, asin ako, si Pablo, an nagin surugoon kaiyan. Ako nagin surugoon kan iglesia kan ginibo ako nin Dios na responsable sa pagdara kan mensahe nin Dios saindo, an mensahe na sarong misterio na nakatago sa laog nin mga henerasyon asin siglo asin ngonian ipinahayag na saiyang mga santo. Katuyuhan idto nin Dios na ipahayag iyan sainda asin ipahiling gabos na mayaman na kamurawayan kan misteriong in isa mga pagano. An misteryong ini iyo na si Kristo yaon saindo, an saindong paglaom sa kamurawayan; iyo ini an Kristo na samong irinorokyaw, iyo ini an kadonongan na iyong iniensayo ming marhay sa lambang saro asin itinutukdo sa lambang saro, tanganing sinda gabos magin perpekto ki Kristo.

119.  1 Th. 1:5,8 – Asin dinara kamo tanganing arugon kami, asin kan Kagurangnan; asin huli sa kaogmahan sa Espiritu Santo na magpasakop kamo sa evangelio, maski igwa nin grabeng kaolangan sa palibot nindo…nin huli ta hale diyan saindo na an tataramon nin Kagurangnan nagpoon na maglakop – asin bako lamang sa bilog na Macedonia asin Akia, huli ta an bareta kan saindong pagtubod sa Dios enterong lakop na.

2:2-4 – Siring sa naaaraman nindo, kami pinapasakitan asin grabeng iniinsulto sa Philippi, asin an satong Dios iyo an nagtao sato nin kusog-boot na ipahayag an saiyang Marhay na Bareta saindo sa atubangan nin dakulang oposisyon. Dai kamo naghuhulit huli ta kami raot an payo, o imoral, o gustong manloko sa kiisay man; an Dios iyo an nagdesisyon na kami maninigo na paniwalaan kan Marhay na Bareta, asin kun kami nagtataram, dai kami nagmamawot na magpaogma sa tawo kundi sa Dios, na iyong nakakabasa kan pinakasekreto nyatong  kaisipan…

2:8-9 – Namatean nyamo na pagkadayupot asin maasekaso para saindo, asin nagin mapinadangat saindong marhay, na grabe an samong kagustuhan na ihiras saindo bako sana an Marhay na Bareta kundi siring mana n enterong buhay nyamo. Pinapagiromdom nyamo saindo, mga tugang, kun gurano kamo nagtrabaho nin marhay, nagpaoripon aldaw-banggi tanganing dai makapagabat sa kiisay man saindo mantang ipinapahayag nyamo an Marhay na Bareta nin Dios sa saindo…v. 12-13 – nagtukdo saindo kun ano an tama, nagsasadol saindo asin nakikimaherak saindo na mamuhay na maniningo sa Dios, na nagaapod saindo na maghiras sa kamurawayan kan saiyang kahadean. Saro pang rason kun tano ta pirme kaming nagpapasalamat sa Dios para saindo iyo n asa pagadangog nindo tolos kan mensahe na dinara mi sa saindo bilang mensahe nin Dios, inako nindo iyan siring sa kun ano talaga iyan, an mensahe nin Dios asin bakong anuman na kaisipan nin tawo, asin iyan saro pang buhay na kapangyarihan diyan sa saindo na nagtutubod kaiyan.

3:2,6 – Ipinadara an samong tugang na si Timoteo, na iyo an katabang nin Dios sa pagpalakop kan Marhay na Bareta ni Kristo, tanganing mapasupog asin mapakusog kamo sa pagtubod…Alagad si Timoteo ngonian nakabalik na hale diyan saindo asin siya an nagdara nin bareta kan saindong pagtubod asin pagkamoot, sinabi niya na danay nindo kaming naroromdoman na maogma asin gusto nindo kaming mahiling siring nagusto mi man kamong mahiling.

220.  2 Th. 1:8, 7:14 – Madatong siya na naglalaad na kalayo tanganing itao an kastigo/penalidad sa gabos na habong magmidbid sa Dios asin nagsayumang mag-ako kan Marhay na Bareta ni Jesukristo satong Kagurangnan. Huli sa Marhay na Bareta na samong dara inapod niya kamo digdi tanganing maghiras kamo sa kamurawayan kan satong Kagurangnan Jesukristo.

221.  2 Tim. 1:8,10 – Kaya dai kamo dapat masupog sa pagsaksi sa Kagurangnan, o na masupog kamo para sako na saiyang bilanggo; alagad kaiba ko, daraha an mga kagabatan huli sa Matrhay na Bareta, na may pagsarig sa kapangyarihan nin Dios. An grasyang ini itinao sato, ki Kristo Jesus, antes kan kapinunan kan panahon, alagad nagin hayag sana iyan huli sa pagpahiling ka satong paratubos na si Kristo Jesus. Dinaog niya an kagadanan, asin ipinahayag niya an buhay asin imortalidad sa paagi kan Marhay na Bareta, asin pinagnomrahan ako bilang mensahero kaiyan, an apostol kaiyan asin an paratukdo kaiyan.

2:8-10 – Romdoma an Marhay na Bareta na sakong dara, ‘Si Jesukristo na nagbangon sa mga gadan, gikan sa rasa ni David’; ini an dahelan kun tano ta igwa akong mga kagabatan na dara, sagkod na kadenahan ako siring sa sarong kriminal – alagad dai ninda pwedeng kadenahan an bareta nin Dios. Kaya tinitios ko an gabos na ini para sa ikakarahay kan gabos na pinili, tanganing sa katapusan magkaigwa sinda kan kaligtasan na iyo si Kristo Jesus asin an daing tapus na kamurawayan na kaibahan kaiyan.

222.  1 P. 1:12 – Inipanahayag sainda na an bareta na saindang dara nin gabos na mga bagay na ngonian ibinareta saindo, kaidtong naghulit saindo kan Marhay na Bareta sa paagi kan Espiritu Santo na ipinadara hale sa langit, iyan para saindo asin bakong para sa saindong sadiri. Maski an mga anghel gustong makahiling kan mga bagay na ini.

4:6,17 – Asin huli ta siya mana n huwes ninda, kaipuhan na an mga gadan sabihan man kan Marhay na Bareta, tanganing maski an saindang buhay sa daga nag-agi na sinda nin paghukom na minaabot sa gabos na katawohan, makaabot man sinda sa buhay nin Dios sa espiritu.

223.  1 Jn. 1:5 –Iyo ini an samong nadangog hale saiya, asin an mensahe na samong ibinabareta saindo: an Dios liwanag: mayo lamang saiya nin kadikloman.

3:11 – Iyo ini an mensahe siring na saindong nadangog sa kapinunan: dapat na mamomoot kit asa lambang saro. Hilnga 2:7.

224.  Apo. 10:7 – ‘An panahon nin paghalat tapus na; sa panahon na an ikapitong anghel madangog na magpatanog kan saiyang trumpeta. An mga sekretong intensyon nin Dios maootob na, siring sa ibinareta niya sa Marhay na Bareta na isinabi sa saiyang mga suruguon na propeta.’