May mag tugang na lalaki asin mga tugang na babae daw si Jesus o mayo? - PSB 21

Pag-adal sa Bibliya Bilang 21

Tema: May mag tugang na lalaki asin mga tugang na babae daw si Jesus o mayo?

Petsa: 6 Hunyo 1998

Saen makukua sa Bibliya an sinasabi dapit sa pamilya ni Jesus: an saiyang ina, ama, mga tugang na lalaki asin mga tugang na babae?

Mt. 12:46 – Nagtataram pa siya sa mga tawo kan uminabot an saiyang ina asin mga tugang na lalakiⁿ; nakatindog sinda sa luwas asin talaganag gusto ninda siyang makaolay^o (Komentaryo ( ⁿ ) – Bakong mga aki ni Maria kundi mga haraning kadugo, seguro pinsan, na tinataram pareho sa Hebreyo asin Aramaika na ‘tugang’. Hilnga Gn. 13:8, 14:16, 29:15, Lv. 10:4; 1 Kron. 23:32m; (^o) v. 47 (Igwang saro na nagsabi saiya: An saimong ina asin mga tugang na lalaki yaon nakatindog sa luwas asin gusto kang makaolay) nilalampasan kan ibang mga testigo tekstwal. Pag-otro na seguro ini kan v. 46 na inarog sa Mk. Asin Lk.; (^p) – An pagmidbid sa relasyon pisikal o pamilyang relasyon sa dugo pang-duwa sana sa espirituwal, Hilnga 8:21m; 10:37).

Mk. 3:21 – Kan madangog ini kan saiyang mga kadugo, naghale sinda tanganing dakupon siya, tubod^d na mayo siya sa saiyang tamang pag-iisip.

Mk. 3:31m – Uminabot na ngonian an saiyang ina aisn mga tugang na lalaki asin, nakatindog sa luwas, nagpadara nin sarong mensahe na pinapatabian siya. Sa oras na idto napapalibotan siya nin mga tawong nakaturukaw kan ipaabot saiya an mensahe, ‘An saimong ina asin mga tugang na lalaki asin mga tugang na babae yaon sa luwas pinapatabian ka.’ Nagsimbag siya, ‘Siisay an sakong ina asin mga tugang na lalaki?’ Dangan hiniling niya idtong mag nakaturukaw sa palibot niya, siya nagsabi, ‘Ini an sakong ina aisn mga tugang na lalaki. An siisay man na minagibo kan kabotan nin Dios, an personang iyan iyo an sakong ina asin tugang na babae asin tugang na lalaki.’

Lk. 8:19-21 – Uminabot an saiyang ina asn mga tugang na lalaki na naghahanap saiya, alagad dais inda makaharani saiya huli sa mga tawo. Sinabihan siya, ‘An saimong ina asin mga tugang na lalaki yaon sa luwas nakatindog asin boot kan mahiling.’ Bilang simbag, nagsabi siya, ‘An sakong ina asin mga tugang na lalaki iyo idtong minadangog kan tataramon nin Dios asin isinasagibo iyan.’ (Komentaryo a – Ilinisya ni Lk sa ideya an mga sitas na ini sa Mk. 3:33-35 tanganing magserbing konklusyon para sa sadit na seksyon nin mga parábola kun kaya binago niya an v. 21 (Hilnga Mk. 3:35) tanganing magpareho sa v. 15).

 Mt. 13:55 – Iyo ini an aking lalaki kan karpentero, segurado? Bakong an saiyang ina iyo an babaeng inaapod Maria, asin an saiyang mga tugang na lalaki iyo si Jaime (Santiago) asin Jose asin si Simona sin si Judas? An saiya man na mga tugang na babae, bakong sinda gabos yaon man digdi sato?

Mt. 27:56 – Asin dakul na mga babae an yaon duman, nagmamasid sa harayo, an parehong mga babae na nagsunod ki Jesus hale sa Galilea asin iyo an nagrereparo saiya. Sa kaiba ninda yaon si Maria kan Magdala, si Mariang ina ni Santiago asin Jose, asin an ina kan mga aki ni Zebedeo.

Lk. 3:23 – Kan si Jesus magpoon na magtukdo, siya ma-treyntang taon na an edad, na siring sa pighohona siya aking lalaki ni Josef aking lalaki ni Heli.

Mt. 1:1-17 – An asendensya ni Jesus. Sarong pag-adal sa pamilyang ginikanan ni Jesukristo, aki ni David, aki ni Abraham^a. (Komentaryo a – Maski ibinugtak an dayuhan na elemento kan sa babaeng parte, vv. 3,5,6, linilimitaran ni Mateo an saiyang geneyalohiya sa Israelitang desendensya ni Kristo. An katuyuhan kaini iyo na ikapahiling na si Jesus konektado sa mga nangengenot na kag-ako kan mga panugang mesianiko, boot sabihon ki Abraham asin David asn sa kamahalan na línea ni David. Universal an geneyalohiya ni Lukas na minapoon pa ki Adan, an pamayo kan raso nin katawohan. An duwang lista, hale ki David pasiring ki Josef, igwa sana nin duwang mga ngaran na komun. Duwa an pwedeng magin paliwanag: pwedeng mas gusto ni Mateo an dinastikong pagkasurunod kisa desendensya sa dugo o pisikal, o kun dai an desendensya legal (leheng levirata, Dt. 25:5+) kinokonsiderar bilang pareho sa pisikal. Alagad, sa Mt an sistematikong kamugtakan kan geneyalohiya nahihiling sa pagkabaranga kan mga apoon ni Kristo sa tolong pasurunod-sunod na 2 x 7 na mga ngaran (hil. 6:9), sarong paagi n apirit nilihisan an tolong hade sa tahaw ni Joram asin Azariah. Napipiritan mana n dobleng pagbilang ki Jekonias (vv. 11-12). Posible ini nin huli ta parehong sa-Griyegong ngaran an itinatao sa duwang magkaparehong ngaran ni Joiaqim asin Joiakin. An mga lista ni Mt asin Lk parehong minatapus ki Josef na iyo an legal na ama sana ni Kristo; an rason iyo na sosog sa antigong kaisipan an paternidad legal (adopsyon, levirata, aspba.) supisyente na, tanganing ikatao an gabos na deretso sa pamana; an deretsos digdi iyo idtong línea mesianika. Dai ini nangangahulugan na si Maria dai kabale sa lineang iyan, dawa ngani dai sinasabi kan mga  ebanghelista na kabale siya.

Mt. 1:18-19 – Ini an dapit kun paano si Jesukristo ipinangaki. An saiyang inang si Maria itinalaan nang ipa-agom ki Josef^e; alagad bago sinda nagsaro nadiskubreng vados na siya sa paagi kan Espiritu Santo. Huli ta lalaki siyang iginagalang asin boot niyang iligtas siya sa kasusupgan, an saiyang aggom na si Josef nagdesisyon na suhayan siya^f – (Kometaryo (^e) – An puwersa kan sa Judiong kapangakoan naipa-agom iyo na an kailusyon inaapod nang ‘agom’ asin pwedeng tapuson niya an pinagtalaan o pinagkasundoan sa paagi nin gaweng pagsubol, v. 19; (^f) – minaluwas na an integridad ni Josef dai sana nakataya huli ta boot niyang ilikay an saiyang ngaran naikatao sa sarong aking anb ama dai niya midbid, kundi nin huli man ta kumbensido siya sa kaliningan (inosensya) ni Maria boot man niya na dai siya ibugtak sa kastigo nin Katugonan (Dt. 22:20m) huli sa sarong misteryong dai pa niya sabot).

Mt. 1:25 – Asin, maski ngani dai siya nagdurog saiya, nangakiⁱ siya nin sarong aking lalaki asin nginaranan niya siyang Jesus. (Komentaryo i – Literal na pagsurat ‘asin dai niya siya namidbid sagkod sa aldaw na siya makapangaki’. Ining tekstong ini dai labot sa peryodo na nagsunod asin, kun ining tekstong ini sana an babasahon, dai ini minataram dapit sa daing sagkod na pagka-birhen ni Maria na hinohona sa ibang lugar sa mga ebanghelio asin tinutubod n aman kan tradisyton kan Iglesia. Dapit sa mga tugang ni Jesus. Hilnga 12:46+).

Jn. 7:2-5,10, 14-52 – Kan harani na an piyesta nin mga Tabernakulo kan mga Judio, an saiyang mga tugang^b nagsarabi saiya, ‘Ano ta dai mo na binabayaan an lugar na ini asin magpasiring sa Judea asin tanganing mahiling kan saiyang mga disipulo^c an mga trabaho na ginigibo mo; kun gusto nin sarong tawo na mabantog siya dai siya minagibo nin mga bagay sa sekreto, dapat ipahiling niya sa bilog na kinaban’. Sa totoo lang, maski an saiyang mga tugang mayo nin pagtubod saiya. Alagad pagkahale kan saiyang mga tugang pasiring sa pag-piyesta, naghale man siya paduman, alagad siya lang na solo tanganing dai siya makakua nin atensyon para saiya^g. V. 22 – Alaad aram ta kun saen siya hale, alagad kuna n Cristo magpahiling mayong makakaaram kun saen siya hale^j (Komentaryo (^b) – Mga pinsan, mga kadugo, sa mahiwas na pagkaintiyende, hilnga an Mt. 12:46+; (^g) 7:14-52 binibilog nin mga suruhay-suhay na mga sitas na may komun na tema – an daing kaseguruhan na ginikanan kan Mesias. 1. An sa tawong ginikanan niya minapadiklom kan saiyang diosnon na ginikanan: dai siya nagin estudiante nin mga rabbi, kun kaya ano an halaga kan saiyang mga naaaraman? (vv. 14-18); arama na gayo an mga detalye kan saiyang pagka-aki, paano siya magigiin an Mesias? (vv. 25-30). 2. An napapabantog na pagkamundag niya sa Nazareth minapahiling na bako siya an Kristo (vv. 40-52). An tema nin saiyang ‘paghale’ (vv. 33-46, Hilnga 8:21-23), nakatakin man diyan sa saiyang diosnon na hnalean: an tawong Kristo minapasiring duman sa lugar kun saen (sa saiyang diosnon na kamugtakan, hilnga vv. 29 asin 34) siya danay na naggikan. Vv. 19-24 iyo an konklusyon para sa 5:1-16 kun kaya suhay sa presenteng kinalulugaran; (j) arama ninda na an Mesias imujmundag sa Bethlehem, v. 42; Mt. 2:5m, alagad mahiwas an pagtubod na tataguon siya sa sarong sekreto o tagong lugar, hilnga Mt. 24:26  (sosog sa iba, sa langit) sagkod sa ladaw kan saiyang pagdatong. An paniniwala na ini pinatotoohan, maski ngani dai namidbiran kan saiyang mga paradangog, kan langitnon na ginikanan ni Kristo).

Jn. 2:1,12 – Pakalihis nin tolong aldaw a nagkaigwa nin kasalan sa Cana sa Galilea. Asin an ina ni Jesus yaon duman ^b…pagkatapus kaini nagpaibaba siya sa Capernaum kaiba an saiyang ina asin mga tugang^g, alagd nag-estar sinda duman nin nagkapira sanang aldaw. (Komentaryo (^a) – Boot sabihon, tolong aldaw pagkatapus na mahiling siya ni Felipe asin Nathanael. Kaya, an mga primerong pangyayari kan ebanghelio nasa laog sana nin sarong semana asin an lambang aldaw nanonotaran: minatapus in isa pagpahiling kan kamurawayan ni Kristo; (^b) – Presente si Maria kan enot na magpahiling kan saiyang kamurawayan si Jesus; yaon na naman duman sa krus, 19:25-27. An duwang osipon igwang nagkapipirang detalyeng komun, hayag na may malinaw na katuyuhan; (^g) – An iba ‘asin an saiyang mga tugang’; idagdag ‘asin an saiyang mga disipulo’. Ining mga ‘tugang’ digdi bako man na tugang sa dugo ni Jesus kundi an pinaka-ubod na grupo nin saiyang mga enot na disipulo, Hilnga Gibo 1:15+).

Mk. 6:3 – Segurado iyo ini an aking lalaki kan karpentero, an aki ni Maria, an tugang ni Jaime asin Joset^a asin Judas asin Simon? An saiya man na mga tugang na babae, bako daw na yaon sinda digdi sato? (Komentaryo a – An iba ‘Jose’ o ‘Josef’).

Mk. 15:40-41 – Igwa nin mga babaeng nagmamasid sa harayo. Kaiba ninda iyo si Maria nin Magdala, si Maria, na iyo an ina ni Jaimeng mas nguhod asin Joset, asin si Salome^f (Komentaryo f – Seguro an babaeng inapod sa Mt. 27:56 na ‘ina kan mga aki ni Zebedeo’).

Jn. 6:42 – Nagsarabi sinda, ‘Seguradong ini iyo si Jesus na aki ni Jose. Midbid ta an saiyang ama asin ina. Paano niyang masasabi ngonian na, ‘Nagbaba ako hale sa langit?’

Gibo 1:13-15 – Asin kan maka-abot sinda sa siyudad nagdagos sinda sa itaas na kuwarto kun saen sinda nag-eestar; yaon duman si Pedro asin Juan, Jaime asin Andres, Felipe asin Tomas, Bartolome asin Mateo, Jaimng aki ni Alpeos asin si Simon Patriota, asin Judas na aki ni Jaime^o. An gabos na ini nagkasararo sa padagos na pamibi, kaiba an nagkapirang babae, kaiba si Mariang ina ni Jesus, asin an saiyang mga tugang na lalaki^p. Sarong aldaw nagtindog si Pedro tanagning magtaram sa mga tugang^q – igwang maabot sa siyento-beynteng persona sa kongregasyon. (Komentaryo (^o) – ‘An aki” (ni Alfeos, ni Jaime) mayo sa Griyegong Bibliya. Si Apostol Judas iba man sa Judas na ‘tugang’ ni Jesus, hilnga. Mt. 13:55, Mk. 6:3, asin tugang ni Jaime (Judas 1). Dai man puwedeng mangyari na si apostol Jaimeng aki ni Alfeos iyo si Jaimeng tugang  kan kagurangnan, Hilnga 12:17; 15:13, aspba. (^p) Mga pinsan ni Jesus, Hilnga Mt. 12:46+. (^q) Ining tataramon na ini boot sabihon ‘mga kristyano’, parating an seglar an boot sabihon bilang iba sa mga apostol asin presbítero, Hilnga 11:1, 12:17, 17:18, Rm. 1:13, aspba.).

Gibo 12:17 – Pinaontok niya sinda sa pagtaram sa paagi nin paghiro niya kan saiyang kamot, asin inosiponan niya sinda kun paano siya iliniuwas sa prisohan nin Kagurangnan. Idinagdag niya, ‘Sabihi nindo si Jaime^f asin an mga tugang’. Dangan huminale siya asin nagpa-ibang lugar. (Komentaryo f – An ‘Jaime’ na mayong ibang ngaran iyo ‘an tugang nin Kagurangnan’. San panahon kan enot na pagbisita ni Pablo sa Jerusalem, Ga. 1:19 (sa 38-39, hilnga Gibo 9:1+) asin pagkatapus, si Jaime iyo an líder kan seksyon Hebreo kan mga kristyano sa Jerusalem. Paghale ni Pedro, siya an enkargado kan inang iglesia, hilnga Gibo 15:13, 21:18, 1 Co. 15:7. An surat ni Jaime (Santiago) minaluwas sa irarom kan ngaran niya).

Ga. 1:19-20 – Mayo akong nahiling naiba sa mga apostol; an nahiling ko sana iyo si Jaime, an tugang nin Kagurangnan^l, asin ako minasumpa sa atubang nin Dios na an sako pa sanang sinurat iyio an hayag na katotoohan. (Komentaryo ^l – Literal ‘kundi si Jaime sana…’ An iba minasabi ‘apuwera ki Jaime’, na pwedeng iminamalo an Jaimeng ini duman sa Jaimeng aki ni Alfeos,’ Mt. 10:3p., asin namaloan man siya bilang saro sa Dose, o kun dai an boot ipakahulugan niya kan ‘apostol’ iyo idtong sa mas mahiwas na kahulugan, Hilnga Rm. 1:1+).

Rm. 1:3 – An baretang ini iyo an dapit sa Aki nin Dios na, sosog sa kamugtakan niyang sa tawo na saiyang kinua, siya sarong desendensya ni David (Hilnga 2 S. 7:1+, Mt. 9:27+, 1 Tim. 3:16).

1 Co. 9:5 – Asin an pagkua nin sarong babaeng kristyano^c na makaiba nyamo, siring sa ibang mga apostol asin mga tugang nin Kagurangnan asin ni Cephas? (Komentaryo c – Literal ‘sarong tugang na babae, sarong babae (agom)’ Tanganing magreparo kan mga pangangaipo kan apostol. Hilnga Mt. 12:46+).

Jn. 19:25 – Harani sa krus ni Jesus nakatindog an saiyang ina^j asin mga tugang na babae^k kan saiyang ina, si Marian a agom ni Clopas, asin si Maria kan Magdala. Pagkahiling kan saiyang ina asin an disipulong namomotan niya na nakatindog na harani saiya, sinabihan niya an saiyang ina, ‘Babae, ini an saimong aki’. Dangan sa disipulos siya nagsabi, ‘Ini an saimong ina’^l. Asin magpoon sa oras na iyan an disipulo nag-andam na nin lugar para saiya sa harong niya. (Komentaryo (l) –Ining dai maipaliwanag na terminong ‘babae’ minapasabot na may ibang nahihiling an ebanghelista digdi na bako sanang sarong gawe nin pagpalasakit nin sarong aking makinuyog-kuyog: na ini sarong deklarasyon na si Maria, an bagong Eva, iyo an espirituwal n aina kan gabos na paratubod, na irinerepresentar digdi kan namomotan na disipulo).

DOKTRINA (Bilang 21)

MAY MGA TUGANG DAW SI JESUS O MAYO?

1.      Makusog an ebidensya sa Bibliya na an sinasabing ‘mga tugang na lalaki asin mga tugang na babae’ ni Jesus (hilnga Mt. 12:46-47, 13:55; Mk. 3:31m, 6:3; Lk. 8:19-21, Jn. 2:1,12; 7:2-5,10; Gibo 1:13-14, 1 Co. 9:5; Dapit ki Jaime (Santiago) bilang tugang nin Kagurangnan, Gibo 12:17, Ga. 1:19), an mga ini mga pinsan o mga ‘paryentes’ sana niya (Hilnga Mt. 27:56, Mk. 3:21, 15:40-41). An komentaryo ⁿ kan Mateo 12:46 minasabi na ‘ining mga tugang na lalaki’ ni Jesus bako man mga aki ni Maria kundi mga haraning paryentes, seguro pinsan, na parehong tinataram magsa-Hebreo asin magsa-Aramiko na ‘tugang’. Bilang pagsuporta kan argumentong ini, ipinipresentar sato an mga sitas sa Gn. 13:8, ‘Sosog kaini sinabihan ni Abraham si Lot, ‘Sa tahaw ko asin saimo dapat dai magkaigwa nin pag-iriwal, ni maski sa sakong mga pastor asin sa saimo man, huli ta kita magtugang’, dangan sa Gn. 14:16, ‘Sinalakay niya giraray an gabos na kayamanan, kaiba an saiyang pinsan na si Lot asin an saiyang mga pagrorogaring, kaiba an mga kababaehan asin mg atawo’, sa Gn. 29:15, “Sinabihan ni Laban si Jacob, ‘Huli ta ika sakong paryentes, matrabaho ka sako na may tandan? Sabihi ako kun ano an gusto mong tandan’”, sa Lv. 10:4, “Ipinaapod ni Moises si Mishael asin Elzaphan, mga aking lalaki kan tiyo-on ni Aaron na si Uzziel, asin sinabihan sinda, “Madya asin halea an saindong mga tugang na harayo sa santuwaryo, sa luwas kan kampo’’,  asin sa 1 Kron. 23:32, “Inootob ninda an ritwal kan Tolda nin Miting sa paglingkod sa Templo ni Yahweh, an ritwal kan santuwaryo asin an ritwal kan saindang paryentes, an mga aki ni Aaron’. Digdi sa mga sitas sa AT marereparo na binunuro-baliktad an paggamit kan mga terminong ‘paryente’ asin ‘tugang’ na garo baga saro sana an pakahulugan sa duwang ini para sa kadugo. Kun kaya, dakul sa mga komentaryo maski na BT dapit sa ‘mga tugang’ ni Jesus mina-ampuyon asin nai-impluwensiyahan kan opinyon na ini n asa tataramon na Hebreyo asin Aramika saro sana an ginagamit na tataramon pareho para sa ‘pinsan’ asin ‘tugang’ (Hilnga an komentaryo sa Mt. 12:46 n, Gibo 1:14 p, Jn. 2:12 g. Ini man an pinaniniwalaan nin dakul na mga parabasa asin mg awtorisadong mga paratukdo kan Bibliya ngonian.

2.      Alagad kun bakong malisyoso an parabasa asin paratukdo kan Bibliya na tinatawan nin maating pakahulugan an tataramon na ‘tugang’ na garo baga mga ordinaryong tawo sana si Jesus asin Maria nin huli ta sinda gikan man sa sarong normal na pamilyang may dakul na aki asin mga tugang siring sa mga ordinaryong tawo sa kinaban, bakong sala o maraot na magtubod asin magtukdo na si Jesus may ibang mg atugang, lalaki asin babae, na mga aki sa dugo asin laman ni Maria, siring nanggad sa ibang mg anormal na tawo. An mga dahelan kaini iyo an minasunod:

a.      May dakulang leksyon na may relasyon sa misyon asin trabaho ni Jesukristo bilang Mesias an pagkakaigwa nin totoong ‘mga tugang na lalaki asin mga tugang na babae’ kun tutubudon nyato an sinabi ni Juan Apostol sa saiyang evangelio (Jn. 7:5) na,  ‘Sa totoo lang, maski an saiyang mga tugang mayo nin pagtubod saiya.’ Sa totoong buhay kan mga espirituwal na paratukdo o maestro, an primerong mga tawo na masakit o dai nagtutubod saiya asin nag-aako kan saiyang mga katukdoan iyo an pinakaharaning miyembro kan saiyang pamilya: ama, ina, mg atugang, tiyo-on, tiya-on, sobrino, sobrina, mga aki, pinsan, aspba. Maski gurano kakukumbensir nin sarong paratukdo sa saiyang mga kadugo, magsa-tataramon o magsa-gibong marhay, masakit sindang madara kun espirituwal na bagay an pinagoorolayan.  Sa puntong ini dapat nyatong maintiyendihan an sinasabi kan mga ebangehelistang ‘mga tugang’ ni Jesus sa Mt. 12:46-50, Mk. 3:31-35, asin Lk. 8:19- 21. Digdi malinaw na sinasabi mismo ni Jesus, ‘Siisay an sakong ina asin mga tugang na lalaki asin mga tugang na babae? An siisay man na minagibo kan kabotan nin sakong Ama sa langit, iyan an sakong tugang na lalaki asin tugang na babae asin ina.’ (Mt. 12:50). An boot sabihon kaini ni Jesus iyo an ‘An pagmidbid sa pisikal  na relasyon o sa laman asin dugo (pamilya) pangduwa sana sa espirituwal’ (Hilnga komentaryo para sa Mt. 12:50p. Kun sa espirituwal na grado na relasyon, an ‘tugang’ puwedeng mangahulugan na tugang sa pagtubod (Hilnga Jn. 2:12, Gibo 1:15, Heb. 2:11-17), asin si Maria na ina ni Jesus sa pisikal pwede man magin espirituwal n aina nin mg aparatubod (Hilnga Jn. 19:25). An kadepisilan na ini ni Jesus sa saiyang ‘mga tugang’, na sinda mayo nin pagtubod saiya, malinaw na isinurat man kan ebanghelista sa Lk. 4:16-24, Mk. 6:1-6, Mt. 13:53-58, na sinabi ni Jesus, ‘An profeta dai inaako sa saiya man sanang banwa, asin sa saiyang sadiring harong (Mt. 13:57)…kun kaya dai siya naggibo nin dakul na milagro duman nin huli kan saindang kulang nin pagtubod (v. 58). Kun siring, an pagkaka-igwa nin ‘mga tugang’ si Jesus bako tanganing menoson an halaga kan pagka-profeta ni Jesus kundi itukdo an dakulang leksyon sa buhay nin gabos na profeta sa kinaban, na sinda isinisikwal asin an primerong mga tawong minagibo kaini iyo an saindang mga pinakaharaning miyembro sa pamilya asin harong. Sa espirituwal na buhay, an pagtalikod sa pagkadayupot sa pamilya, o ining pagsikwal nin mg amiyembro kan pamilya sa sarong tawong naliwanagan dapit sa espirituwal na buhay, kaipuhan na mangyari (Hilnga Mt. 16:24-26, 10:21-22,37-39, 8:21-22; Lk. 14:26-27; Mt. 19:29; Mk. 8:34-38) tanganing lubos na mapalibre siya sa pagkadayupot sa mg abagay na ini nin kinaban, lalo n asa mga pisikal o sa laman na mga relasyon (pamilya), tanganing hanapon niya an lubos na pakikirelasyon sa espirituwal na Ama sa langit asin kan saiyang espirituwal na pamilya sa langit kun saen siya Datong miyembro (Hilnga Heb. 2:11,16-17).

b.      Sa pagtubod na si Jesus may ‘mga tugang’, kun siring mga aki man ni Maria, dai man ini nakakadespresyo sa pagkatawo ni Maria na tinutubod ta bilang Inang Birhen ni Jesukristo nin huli ta makukua sa komentaryo i ni Mt. 1:25 na ‘an tekstong ini dai labot sa peryodo na nagsunod asin kun ining tekstong ini sana an babasahon, di ini minataram dapit sa daing sagkod na pagkabirhen ni Maria na hinohona sa ibang lugar sa mga ebanghelio asin tinutubod n aman kan trdisyon kan Sta. Iglesia.’ Kun totoong nagka-aki si Maria ki Josef pagkatapus niyang mangaki ki Jesus, kun siring si Jesus iyo an panganay na aki ni Maria, ini sosog p aman giraray sa Banal na kasuratan na nagsasabing “Asin dai niya siya namidbid sagkod n asa aldaw na siya mangaki’ (Mt. 1:25). Bilang dagdag p asa doktrina sa numero sa numero 1, an temang ini minadara sato sa pagkagamiaw asin pagkamidbid na boot ni Jesus punan an pag-isipon nin tawo gabos an dakulanbg katotoohan asin reyalidad dapit sa satong orihinal na pamilyang langitnon, an espirituwal na pamilya nin Dios asin mga angheles sa langit (Ep. 2:19), na iyo-iyong tunay asin totoong pamilya nin tawo, asin magpoon na siyang magsikwal kan saiyang pamilyang sa laman o sa pangkinaban na ini kaiba an padagos na pakikirelasyon sa mg atawo asin mga bagay-bagay sa kinaban na ini. Ini an rason kun tano ta sa ebanghelio dai kaipuhan na sambiton, totoo man o bako, an dapit sa pag-agom ni Jesus asin an pagkaigwa niya nin sadiring pamilya nin huli ta an pagkaka-igwa nin sadiring agom asin pamilya sagabal sa misyon o trabaho nin pagdara sa mga tawo sa saindnag espirituwal na pamilya. An doktrinang ini malinaw na ipinahayag ni Pablo sa 1 Co. 9:5, ‘Asin an pagkua nin sarong babaeng kristyano^c na makaiba nyamo, siring sa ibang mga apostol asin mga tugang nin Kagurangnan asin ni Cephas?’ Maski si Jose, agom ni Maria, dai man nauunambitan n asa mga mga ebanghelio, apuwera kaidtong nasa Mt. 1:1-19,25; Lk. 3:23; Rm. 1:3, Jn. 6:42, nin huli ta mayo siya nin dakulang parte sa espirituwal na misyon ni Jesus kundi an pagkani-aki asin an pagpadakula saiya na sarong natural na trabaho nin sarong magurang sa laman.