ANO AN KATUYUHAN KAN BUHAY NIN TAWO DIGDI SA DAGA? - PSB 22

Pag-adal sa Bibliya Bilang 22

Tema:ANO AN KATUYUHAN (KAHULUGAN, KAHALAGAHAN) KAN BUHAY NIN TAWO DIGDI SA DAGA?

Petsa: 13 Hunyo 1998

Sa bibliya makukua ining mga minasunod:

Sir. 18:8 – Ano an tawo, anong katuyuhan an saiyang namutugtakan? Ano an yaon saiyang karahayan, asin ano naman an karatan?

Sal. 8:4 – Ah, siisay an tawo na saimong dapat na pag-isipon, an aki nin tawo na dapat mong pangatamanon? (Komentaryo sa v. 8 (f) – An tawo matapo alagad linalang sa kapareho nin Dios, nasa tahaw kan kinaban na espirituwal asin materyal, iyo an tagapamahala kan natural na linalanang.)

Sal. 90:9-10 – Sa irarom nin saimong kaanggotan, minalipas an samong mga aldaw, sa sarong hinangos an samong mga buhay minatapus^d – sagkod sa setentang taon minahalawig an samong buhay, otsenta kun nasa marhay an kondisyon kan hawak, alagad gabos sinda dagdag sa kahaditan asin kapurisawan – minatapus na madalion, dangan kami mayo na.

Sal. 39:4 – Yahweh, sabihi ako kun noarin an sakong katapusan, kun pira an mga aldaw na nakatalaan sako, ipahiling mo sako kun gurano ako katapo.

Qo. 6:12 – Siisay an nakakaaram kun gurano kahalaga an tawo mantang siya nabubuhay, sa kadikit na aldaw na idto na nabubuhay siyang garo duros, mga aldaw na binubuhay niyang garo anino?

Qo. 3:18 – Naghona man ako na an tawo minagawe nin siring kaini tanganing ipahiling sainda nin Dios kun ano talaga sinda, asin ilantad sinda kun gurano sinda ka-brutong mga hayop sa lambang saro.

Jb. 6:11 – Igwa pa daw akong kusog na magpadagos nin paghalat? Ano an karahayan kan buhay para sako, kun nakatalaan na para sa seguradong kagadanan?

Jb. 7:17-18 – Ano ining tawo^j na garo baga pinadakula mo siyang marhay, na isinairarom m osa pagsisiyasat, n asa pagka-aga dangan otro-aga (aga-aga) dapat mo siyang eksamenon asin sa lambang may-oportunidad baloon mo siya? (Komentaryo j – Mapait na kabaliktaran, garo inaaniningal kan kagsurat an tataramon sa Sal. 8. An pangataman nin Dios sa tawo digdi iyo an daing ontok na pagsiyasat. Para sa kagsurat kan Sal. 139 iyo an sarong dahelan tanganing magtiwala an tawo, alagad para ki Job ini sala. Minakirad contra sa sarong legalistang paghiling sa relihiyon asin sa kasalan, minahanap siya nin sarong Dios nin pagkaherak, v. 12) Hilnga an Job 4:19-20; 10:18.

An buhay nin tawo garo ulod na, sa pagkahimsa, makakan kan dahon nin mg atinanom na tanom nin tawo alagad pupusion kun madakop nin huli ta pinepeste an tinanom, gagadanon siya ta daing ibang pakinabang kundi perwisyo.

Sal. 22:6 – Uya pa ako. Ngonian mas ulod kisa tawo, kinakaongisan nin katawohan, pinagngingisihan nin mga tawo.

Sal. 109:23 – Napapara ako siring sa anino, pinagpag ninda ako siring sa sarong duronⁱ (Komentaryo i – An sitas na ini inaplikar sa nagsakit asin mamurawayon na Kristo, Ph. 2:7-11).

Jb. 17:14 – Sinasabihan ko an panteón, ‘Ika an sakong ama’, asin inapod ko an ulod na sakong ina asin sakong tugang na babae.

Jb. 21:26 – Pareho na sindang mahigda sa alpog, natatahoban nin mga ulod. Hilnga Job 7:5.

Sir. 10:11 – Kun an tawo umabot na sa saiyang kagadanan, an saiyang pamana iyo an mga nagkakamang na bagay, mga hayop na minakakan nin mga bankay, mga ulod.

Is. 14:11 – An saimong kadakulaan itinapok n asa irarom nin Sheol, kaiba an musika nin saimong mga harpa; an saimong higdaan sa irarom iyo an mga ulalo, asin sa ibabaw mo iyo an sarong tamong nin mga ulod.

Is. 41:14  - Dai ka matakot, pobreng ulod, Israel, sadit na tungaw^j.

Is. 66:24 – An saimong ulod dai magagadan, ni an saindang kalayo matotomtom; mangingiri sainda an gabos na katawohan.

Jdt. 16:21 – Ipapadara niya an kalayo asin mg aulod sa saindang laman asin magtatangis sinda sagkod p aman huli sa sakit.

Sir. 7:17 – Magpakumbaba kamong marhay, huli ta an kastigo para sa mga mayong dios iyo an kalayo asin mga ulod.

2 M. 9:9 – Sa mismong mga mata kan tawong ining mayong dios nagruluwas an mga ulod asin an saiyang laman naglalapa mantang nagpapadagos siyang magsakit nin kulog, asin an parong kan saiyang pagkalapa nagpasuka sa enterong armada.

Mk. 9:48 – kun saen an saindang ulod dai nagagadan ni an saindang kalayo natotomtom.

An garo garo doot na pakatambo, matalubo sa kadikit na panahon asin makunsumo kan sustansya nin daga, alagad dai mahahaloy gagabuton ta nakakaperwisyo sa tinanom.

Job 8:11-12 – Bako daw na an ragiwdiw minatalubo sa mga palna? Kun mayong tubig matarambo daw an mga kangkong? Gabota sinda maski mga berde pa: masigkat sa gabos na tinanom sinda magagadan. Vv. 16-18, Siring sa matabang tinanom sa init kan saldang, pinatuwa niya an saiyang amay na supling sa mahiwas na hardin; alagad an saiyang mga gamot nakaburubod sa mga tambak na gapo, ginuguno niya an saiyang buhay diyan sa mga kagapoan. Gabota siya sa saiyang hinihigdaan asin manegar na nahiling man laman niya siya. Ngonian siya nalalapa sa gilid kan dalan, asin sa dagang iyan, matarambo man an iba.

Jb. 14:2 – Minaburak siya, asin naluluyos, na garo burak; marikas p asa anino, minalipas.

Sal. 37:2 – Marikas pa sindang naluluyos siring sa doot, minalipas siring kan mga berde sa oma. (Hilnga man Sal. 58:7-8, 90:5-7, 103:15-16).

Is. 40:6-8 – Sarong tingog an nagsabi: ‘Magkurahaw ka! Asin nagsimbag ako, ‘Ano an ikukurahaw ko?’ – Doot an gabos na laman asin an kagayonan kaiyan siring sa mga lalaw na burak. Naalang an doot, an burak minaluyos kun an hinangos ni Yahweh minaduros sainda.

Mt. 6:30 – Kun arog kaiyan binabadoan nin Dios an mga doot sa oma na yaon diyan ngonian dangan naoodma isinusugba sa kalayo, bako daw na mas aatendiran niya kamo, kamo na mga lalaking kulang sa pagtubod?

Mt. 13:30 – Patuboa sindang pareho sagkod sa tig-ani; asin sa panahon nin tig-ani sasabihan ko an mga paraani: enot gavota an mg adoot asin bugkuson tanganing suluon, dangan tipunon an mga trigo sa sakong balayan.

Stgo. 1:10-11 – Asin magpasalamt an sarong mayaman na siya pinagin-dukha, nin huli ta an kayamanan – an minalipas siring sa mga burak nin doot; minasubang an nakakatomtom na saldang, asin an doot naluluyos, nahuhulog an burak; an magayon sa paghiling ngonian nawawara. Pareho in isa sarong mayaman na tawo; nagpapadagos an saiyang negosyo; siya mismo nagagadan.

1 P. 1:24 – Doot an gabos na laman asin an kamurawayan kaiyan siring sa burak na lalaw. An doot naluluyos, nahuhulog an burak.

An buhay nin tawo kabaing sa atang pinapalid nin duros:

Jb. 21:18 – Gurano kaparating nahihiling ta siyang dinadaguso siring sa dagami sa atubang nin duros, o pinapalid siring sa ata sa atubang nin sarong aripuros?

Sal. 1:4 – Para sa mga maraot bakong arog kaini, mayo lamang na makakaarog kaini! Dai, arog sinda sa atang pinapalid kan duros (Hilnga Sal. 35:5, 83:13) Dn. 2:35.

Kad. 5:14 – Iyo, an paglaom kan mg amaraot siring sa atang dinadara kan duros, siring sa mga pinong gapas na tinutulak nin aripuros; nagkakasiriblag iyan siring sa aso sa atabang nin duros, minalipas siring kan pagromdom sa sarong aldawon na visita.

Is. 40:24 – Kadikit na panahon sinda itinatanom, kadikit man na panahon na isinabwag, kadikit pa sanang panahon na an saindang balagon nakagamot sa daga, na hinayop niya sinda. Dangan sinda naluyos asin dinara sinda kan aripuros siring sa mga dagami (Hilnga 29:5ab).

Mt. 3:12 – An saiyang nigo yaon na saiyang kamot; sisighidad niya an saiyang salog na ginikan asin titipunon niya an saiyang mga trigo sa balayan; alagad an ata susuluon niya sa kalayong dai nasisigboⁱ (Komnetaryo i – An kalayo nin Gehenna na naglalad sagkod p aman tanganing matomtom an anuman na bagay na dai nalinigan (Is. 66:24, Jdt. 16:17; Si. 7:17, Zp. 1:18; Sal. 21:9 aspba.).

An tawo ibinabaing man sa aso:

Sal. 37:20 – Para sa mga tampalasan – sinda magkakagaradan, ining mga kaiwal ni Yahweh; mapapara sinda siring sa mga magayon kan mga kapatagan, mawawara sinda sa aso.

Sal. 102:3 – Huli ta an sakong mga aldaw mapapara siring sa aso, an sakong mga tulang nagbabaga siring sa sungo, an sakong puso nagkukupos siring sa nasusulong doot.

Kad. 2:2 – Sa dai tinutuyo namundag kita, asin pagkatapus kan buhay na ini magigin kitang garo dai man sana nabuhay. An hinagos sa satong dungo sarong buga nin aso, an pagrarason sarong silyab hale sa pagpitik kan satong mga puso^c.

Kad. 1:14 – An mabuhay – para digdi linalang niya an gabos^m, an gabos na mga bagay na linalang sa kinaban igwa diyan sa sainda nin kahirahayan, mayo sa saindang makukua nin nakakagadan na hilo, asin mayong kapangyarihan an Hades sa kinaban.

An buhay nin tawo ibinabaing man sa duros na hinangos asin anino:

Job 7:7,16 – Romdoma na saro sanang hinagos an sakong buhay, asin an sakong mga mata dai na nanggad makakakita nin kagaya-gayahan, ako napupuspos na, an sakong buahy mayong daing katapusan; kun siring bayae ako, huli ta an sakong mga aldaw siring sana naggad sa sarong hinagos. Hilnga Jb. 20:8.

Sal. 39:4-6, 13 – Yahweh, sabihi ako kun noarin an sakong katapusan, kun pira an mga aldaw na nakatalaan para sako, ipahiling mo sako kun gurano ako katapo. ‘Hilnga, tinawan mo ako nin saro o duwang pulgada nin buhay, an halaba kan sakong buhay mayo iyan para saimo; lambang tawong nakatindog sa daga saro sanang buga nin aso, lambang tawong naglalakw, siring sana sa anino, asin an kayamanan na saiyang tinipon siring sa buga nin aso- dai niya aram kun siisay an masunod na makua kaiyan. Maghiling k asa harayo, pahangosa ako, bago ako maghale asin mapara! (Hilnga Sal. 62:9, 94:11, 144:4, 73:20, 102:11).

Kad. 2:4-5 – Maabot an panahon, an satong ngaran malilingawan, mayon siisay p aman an makakaromdom kan satong mga naginibuhan; malipas an satong buhay siring sa gira nin panganuron (balukag), matunaw siring sa ambon na pinapalid kan mga sirang kan saldang asin nakakatomtom an init kaiyan. Iyo, an satong mga aldaw minalipas siring sa sarong anino, sa satong pagkagadan mayo nin makakabalik, an selyo ibinugtak: mayo ni saro an makakabalik.  

Sa mata kan Bibliya, an buhay nin tawo mayong halaga kun para sa tawo sana. Ini may halaga sana nin huli ta an tawo sadiri nin Dios asin linalang niya iyan na may katuyuhan para sa Dios. Kun siring, an kahulugan kan buhay nin tawo iyo an kahulugan kan Dios kan linalang niya siya, asin an kahalagahan kan buhay nin tawo na itinao nin Dios kan linalang niya siya. Kaya an katuyuhan, kahulugan asin kahalagahan kan tawo yaon sa kun ini may pakinabang para sa Dios na naglalang saiya, o mayo. Nahiling nyato sa Bibliya na, sa pagkumparar sa tawo sa mga ulod, doot, duros, anino, asbpa., ining mga bagay na ini mga mayong pakinabang sa tawo, kun kaya an saindang buhay mayong halaga para sa tawo asin sinda bale-wala sana para saiya. Siring man, an tawo sa Dios, kun mayo siyang pakinabang sa Dios siring sa mga tawong parakasala o maraot na habong magmidbid sa Dios na kaglalang sa tawo, siya asin an saiyang buhay mayo man nin kahulugan asin halaga, alagad ini may kahulugan asin halaga kun ini minataong kapakinabangan sa linalang na mas nakakahalangkaw saiya. Sa Rm. 12:2, ini an mababasa, ‘Dai nindo pag-arugon an mga gawe-gawe kan kinaban na nasa palibot nindo, alagad baguhon nindo an saindong gawe-gawe, na inarog huli kan saindong bagong pag-iisip. Iyo lang ini an paagi sa pagdiskubre kan kabotan nin Dios asin maaaraman kun ano an marhay, kun ano an gusto nin Dios, kun ano an pinakatamang dapat gibuhon.’ Ano an katuyuhan nin Dios kan paglalanga an tawo? Dangan, paano siya magkakaigwa nin pakinanabg para sa Dios?

Is. 42:5-7 – Iyo ini an sabi nin Dios, si Yahweh, na naglalang kan kalangitan asin nagbiklad kaiyan, na iyong nagtao nin porma sa daga asin an minatalubo diyan, na iyong minataong hinangos sa saiyang katawohan asin buhay sa mga linalang na naghihiro diyan: ako, si Yahweh, an nag-apod saimo tanganing maglingkod sa kawsa nin katanosan; kinabit taka sa kamot asin pinorma taka^e; pinili takang magin tipan kan banwaan asin ilaw nin mga nasyon, tanganing buksan an mga mata kan buta, iluwas sa bilanggoan an mga priso, asin idtong nageerok sa diklom nin bilanggoan sa irarom nin daga.

Lk. 12:6 – Dai daw nindo nababakal nin duwang sentabo an limang dignos? Minsan pa ni saro sainda an nalilingawan sa mata nin Dios. Tano, lambang buhok sa saindong payo bilang. Kaya, mayong dapat katakotan, mahalaga kamo mas p asa ginatos na dignos.

Lk. 12:22-23, 31-32 – Dangan sinabihan niya an saiyang mga disipulos, ‘Kaya sinasabihan ko kamo na dai maghadit dapit sa kun ano an kakakanon, ni dapit sa saindong hawak asin kun paano nindo babadoan iyan. Huli ta an buhay^b nangangahulugan na mas p asa kakanon, asin an hawak mas p asa vado. Dai, ibugtak nindo an saindong mga puso sa saiyang kahadean, asin ining iba pang mga bagay siring man itatao saindo. ‘Sadir na ripunpon, dai kaipuhan na matakot kamo, nin huli ta gusto kan saindong Ama sa langit na itao saindo an kahadean. (Komentaryo b – Literal ‘an kalag’ sa bibliyang pagkasabot, siirng sa v. 19).

Rm. 9:16, 19-21 – Sa ibang tataramon, an sarong bagay sanang mahalaga bako kun ano an gusto o boot gibuhon nin katawohan, kundi an pagkaherak nin Dios. Hahapoton nindo ako, ‘Kun siring, paano mababasol nin Dios an siisay man, nin huli ta mayo nin siisay p aman an makakakontra kan saiyang kabotan?^f Alagad bilang sarong linalang, ano an deretso mo na imbestigaran an Dios? An kuron mayong deretsong magsabi sa pagkuron: Ano ta ginibo mong arog kaini an itsura ko? Segurado na an parakuron pwedeng gibuhon an anuman na gusto niya sa dalipay. Seguradong yaon saiya an pagdesisyon kun magamit siya nin sarong particular na clase nin dalipay tanganing maggibo nin sarong espesyal na kuron o sarong ordinaryong kuron sana.  (Komentaryo f – Kun an pagigin biko nin tawokun siring magin parte kan plano nin Dios, paano ikaka-akusar an tawo na dai minaotob kan kabotan nin Dios? Minasimbag si Pablo, siring kaidto sa parehong kaso (3:7; 6:1,15) sa paagi kan pag-olang kan pag-kontra. An Dios na uyo an enterong kagurangnan kan gabos niyang ginibo, dai puwedeng tukaron an bagay dait sa inhustisya, Hil. Mt. 20:15).

Kunsiring, tanganing may pakinabang an buhay nin tawo para sa Dios dapat na may paglilingkod siya para sa iba:

2 Tim. 2:20-21 – Bakong gabos na mga plato sa sarong dakulang harong gibo sa bulawan o plata; an iba gibo sa kahoy o sa dalipay: an iba tinatagama para sa mga espesyal na okasyon aisn an iba para sa mga ordinaryong katuyuhan. Ngonian, an pagibitar sa mga kakundian na ini na sakong isinasabi iyo an paagi para sa saro katawo na magin kagamitan para sa mga espesyal na okasyon, maniningo na pag-gamiton mismo kan Maestro, asin inihahanda para sa anuman na marhay na trabaho.

Ep. 4:1,11 – Ako, an risonero sa Kagurangnan, kun siring nakikimaherak saindo na mamuhay nin sarong buhay na maniningo sa saindong pangangapodan… Asin an balaog niya sa iba iyo na sinda magin apostol: sa iba, profeta, sa iba, mga ebanghelista; sa iba, mga pastor asin mga paratukdo^h (Komentaryo h – Ilinimitar ni Pablo an saiyang lista kan mga karisma na may relasyon sa pagtukdo na iyo an mga nanonongod sana sa mga itinaram niya digdi, vv. 13-15. Para sa iba pa, hilnga 1 Co. 12:28-30, 7-11; Rm. 12:6-8, 1 P. 4:10-11).

Jb. 7:1, 14:14 – Bakong an buhay nin tawo digdi sa daga saro sanang pirit na paglingkod^a, an oras niya bakong mas marhay kisa mapawot na pagpatandan?^b Siring sa oripon, naglalanat nin naghihidaw kan limpoy, o an trabahador na mayong ibang iniisip kundi an saiyang tandan.

Qo. 2:21 – Nin huli ta pareho siyan sa sarong tawo na nagpakamadonong sa trabaho, nagpakarhay asin nagpaka-asenso, na dapat bayaan an anuman sa saiya sa iba na dai lamnag nagpagal kaiyan. Ini man sarong suros asin dakulang inhustisya; nin huli ta ano an saiyang naganansya sa gabos niyang pagpagal asin kahandalan na sinapo niya sa irarom kan saldang?Ano an resulta kan gabos na aldaw na saiyang ipinagtrabaho, an saiyang mga kasibotan sa opisina, an daing kapahingaloan na mga banggi? Duros man ini. Mayong ibang kaogmahan para sa tawo kundi magkakan asin maginom asin magpakakontento sa saiyang trabaho^c (Komentaryo c – May pagka-epikuryanong salak, an kasabihan na ini ginagamit bilang argumento: maski ngani ginagamit kan kagsurat bilang sarong ‘refrain’, 5:17, 7:15-16, 8:14-15, 9:2,7; alagad dai man minaretrato kan entero niyang pananw sa buhay; dai niya irinerekomendar an pagpapasiram bilang pagsikwal sa obligasyon, bi;ang pinakahuring motivo nin mga gibong sa-tawo.)

Ep. 2:10 – Kita magayon na trabaho nin Dios, linalang ki Kristo Jesus tanganing mabuhay sa marhay na buhay siring kaidtong sa kapinunan na pinagisip niyang ipamuhay nyato.

Qo. 1:2 – Duros nin gabos na mga duros, sabi ni Qoheleth. Duros nin mga duros. An gabos duros^c (MOnentaryo c – An tradisyonal na ‘vanidad’ (duros) iyong ginagamit digdi: an Hebreong termino nangangahulugan enot sa gabos ‘ambon’, ‘duros’, saro sa mga tardisyonal na imahen (tubig, anino, aso, asbpa) na ginagamit sa poesiang Hebreo bilang pagladawan kan naglilipas na kamuigtakan kan tawo. Alagad sa Qo. nawara kan tataramon an iyan an kahulugan na ini asin minapamidbid kan ilusoryong kamugtakan nin mga bagay asin kun siring an pagkadaya na naginibo sa katawohan. Komentaryo sa Qo. 12:8^f – Minatapus an libro siring nanggad sa pagpapoon kaiyan alagad sa tahaw dakul an natukar. Itinukdo niya sa tawo an saiyang makaherak-herak na kamugtakan alagad an saiya man na kadakulaan, sa paghiling na an kinaban na ini dai maninigo saiya. Inipapagamiaw kaini an parabasa sa disinteresadong relihiyon asin sa sarong clase nin pamibi na an sarong linalang, buklat sa saiyang pagigin mayong kuwenta, minasamba sa misterio kan Dios. Hilnga Sal. 39).

Sir. 11:28 – Dai mo pag-omawon an sarong tawo na dai pa siya nagagadan: an saiyang katapusan iyo an mapamidbid sa sarong tawo^l (Komentaryo l – Kay si Ben Sira naghahalat nin sarong paghusgar asin an pagpanao nin mga desierto sa aldaw nin pagkagadan, hil. 7:36+ asin an Intro sa libro nin Kadonongan).

Qo. 12:13-14 – Bilang sumada kan gabos na tinukar: matakot sa Dios, asin otoba an mga katugunan, nin huli ta iyo ini an enterong obligasyon nin tawo. Nin huli ta huhusgaran nin Dios an gabos na gibo, marhay asin maraot.

Lk. 2:49 – Nagsimbag siya, ‘Tano ta hinahanap nindo ako? Dai nindo aram na dapat pagsibotan ko an mga kasibotan nin sakong Ama?^l (Komentaryo l – Iniinsistir ni Jesus an saiyang sadiring personal na obligasyon sa saiyang Ama (Mt. 4:3+) asin, sa kapakanan kan obligasyon na iyan, kaipuhan an total na independensya sa mga linalang, Hilnga Jn. 2:4; Mt. 12:46-50).

Rm. 8:28 – Aram ta na an Dios minakooperar sa gabos na namomoot saiya sa paagi nin pagbaliktad na mapakarhay an lambang bagay, duman sa gabos na inapod niya sosog sa saiyang katuyuhan.

2 Co. 5:5 – Iyo ini an katuyuhan kun tano ta linalang kita nin Dios, asin itinao sato an pangako kan Espiritu.

Col. 3:1-4 – Nin huli ta ibinalik na kamo sa totoong buhay kaiba nin Kristo, dapat na maghiling kamo sa mga bagay na nasa langit, kun saen iayo si Kristo, nagtutukaw sa toong kamot nin Dios. An saindong pag-iisip dapat yaon sa mga langitnon na bagay, bako sa mga bagay na yaon sa daga, huli ta kamo gadan na, asin ngonian an buhay na yaon diyan sa saindo iyo an nakatago diyan sa Dios kaiba ni Kristo. Alagad kun ipahayag si kristo – asin siya an buhay nindo – kamo man ipapahayag sa entero nindong kamurawayan kaiba niya.

1 Th. 4:1 – Bilang ultimo, mga tugang, hinahagad asin nakikimaherak kami saindo sa Kagurangnan Jesus na magpadagos na magpadagos an pag-asenso nindo sa clase nin buhay na tuyo saindong ipamumuhay: an buhay na gusto nin Dios, siring sa nanodan nindo samo, asin siring sa ipinamumuhay na nindo ngonian.

Phil 1:21 – Tama, an buhay para sa sako iyo si Kristo, alagad an kagadanan man madara man sako nin saro pang bagay: alagad na naman, kuna n pagkabuhay sa hawak na ini nangangahulugan nin pagtrabaho na nagkakaigwa nin mga marhay na resulta – dai ko aram kuna rin an sakong pipilion (Hilnga 4:17).

Phil. 2:13 – Para sa saiyang mamomoton an katuyuhan, an Dios iyo an minabugtak kan determinasyon asin aksyon sa saindo.

Ga. 6:9-10  - Dai dapat kitang magpagal sa paggibo kan marhay nin huli ta kun dai kita magsuko sa pakikipaglaban kita mag-aani sa tamang panahon. Mantang igwa pa kita nin panahon, dapat gumibo kita nin marhay lalo n asa satong mga tugang sa pagtubod.

Ga. 2:20 – Ngonian nabubuhay na ako bakong sa sadiri Kong buhay kundi an buhay kaiba ni Kristo na nabubuhay sa sako. An buhay ko ngonian sa sakong hawak iyo an buhay sa pagtubod: pagtubod sa Aki nin Dios, na namoot sako asin isinakripisyo an sadiri para sa sakong kapakanan.

Heb. 1:14 – Sa katunayan gabos sinda espíritu na an ttrabaho iyo an paglingkod, ipinadara tanganing tabangan idtong magigin mga tagapagmana nin kaligtasanⁱ (Komentaryo i – Sa pagpareho sa Aki, an mga anghel iyo an mga suruguon sana na pinapagtrabaho tanganing magligtas sa mga tawong linalang).

Sal. 62:12 – Asin ika mismo an minabalos sa tawo sosog sa kun may pakinabang an saiyang mga trabaho^e (Komentaryo e – Doktrina kan indibidwal na retribusyon na itinutukdo kan mga profeta (espesyalmente si Ez. 14:12+), kan mga kagsurat nin mg akadonongan asin mga salmista, 37:1+).

1 Tm. 6:18-19 –

An ultimong bagay na dapat tawan paliwanag, na konektado sa temang ini, iyo an mapapadapit sa problema sa mga mararaot na tawo. An pag-eksistir ninda sa kinaban, asin an paglakop ninda na sobrang marhay sa bilang kan mga manaos o makadios na tawo, iyo an minapahandal sato. An distroso na ginigibo ninda ssa buhay nin tawo labi-labi na, mala ngani ta haros dai na nyato aram kun paano na an pagligtas kan satong buhay sa mga pamemeste asin pangraraot kaining mga tawong mayong dios. Tano ta tinutugotan nin Dios an paglakop ninda? Hilnga Mt. 13:30. Sinda ngonian haros garo dai mapupuksa, sige an lakop, asin idtong sinabi nin Dios na ‘magpakadakul kamo asin panoa nin do an daga’ garong nangyayari sa mga tawong mayong dios kisa sa mga duman sa mga makadios. Sa sitwasyon na arog kaini, sinabi man ni Pablo an saiyang gigibuhon. Phil. 1:21 asin Ga. 6:9-10.

An kapaladan nin mga tawong mayaman asin pobre. Hilnga Lk. 16: 19-31, An lalaking mayaman asin si Lazaro. Digdi sa parábola, malinaw an doktrina ni Jesus dapit sa destino kan buhay nin tawo digdi sa daga. Kun ano an klase nin pamumuhay niya ngonian digdi sa ibabaw nin daga iyan babaliktadon duman sa ikaduwang buhay. Sa parabolang ini sa Lk. 16:19-31, ipinapahiling na pagtios asin kasakitan an nagin buhay duman sa ikaduwang buhay kan mayaman na tawong nabuhay na marangya asin sagana kan yaon pa sa ibabaw nin daga. Alagad an tawong pobre, nagsakit asin nagtios mantang nabubuhay pa digdi sa daga, iyo an nakanamit nin kaginhawahan duman sa ika-duwang buhay.