PAGSUGOT KI JESUKRISTO SA DISYERTO - ENOT NA DOMINGO NIN KUWARESMA (TAON C)

HOMILIYA PARA SA ENOT NA DOMINGO NIN KUWARESMA (TAON C)

Tema: An PAGSUGOT KI JESUKRISTO SA DISYERTO

Kadaklan sa satuya naghohona na an pagsugot ki Jesukristo garo sana nanggad na drama ni Jesukristo asi kan demonyo na mayo lamang nin koneksyon sa satong pang-aro-aldaw na buhay.

Nin huli sa paghonang ini, tinatawan nyato nin salang interpretasyon an ebanghelyo ngonian na mantang binabasa garo sana baga kita nagdadalan  nin pelikula sa sine na hinihiling ta si Jesukristo na iyo an bida asin kampi sa karahayan na nakikipaglaban ki Satanas na iyo an kontrabida asin kampi sa karatan. Dangan maogma kita ta sa katapus-tapusi, si Jesukristo iyo an nakapasar sa tolong pagtentar kan demonyo. Kaya, masabi kita na nagaya talaga nanggad na an karahayan iyo man giraray an nakakapangyari kontra sa karatan sa kahuri-hurihi.

Kun iyto sana ini an satong pagkaintiyende kan dapit sa pagsugot ki Jesukristo, na garo sine na minabasog sana kan satuyang mga pantasya asin imahinasyon alagad pagtapus kan pagdalan minabalik kita sa mga pangyayari asin eksperyensiya sa tunay na buhay na iba man kisa nadalan nyato sa telon, o mayo nin serbi para sa personal na karahayan asin kaligtasan nyato kontra sa mga kasakitan, problema asin kadepisilan na nangyayari sa buhay ta aro-aldaw.

An tunay na katuyuhan kan ebanghelyo ngonian, na an tema iyo an pagsugot kan demonyo ki Jesukristo duman sa disyerto, iyo an pagdara sa satuyang konsiderasyon asin paghoro-horop kan mga gibo nin Dios nin pagligtas, o pagtabang, sa mga inaagihan nyatong kadepisilan sa aro-aldaw nyatong pagkabuhay. Na kun magtiwala lamang kita sa kapnagyraihan kan tatramon nin Dios, kita na may pagtubod asin pagtiwala sa Dios iyo an makakaligtas sa dakul na mga kasakitan sa satong buhay.

Arog ki Jesukristo na nag-agi nin tolong klaseng pagsugot ni Satanas na nagtesting kan pagtubod  asin pagtitiwala niya sa kapangyraihan kan saiyang langitnon na Ama, na dawa surano kadepisil idtong saiyang pakikilaban, dai siya nagpadara sa mga sugot kan demonyo. Siriing man, an tawong nagtitiwala asi nagtutubod sa Dios, dai madadaog sa mga sugot kan demonyo na minaabot sa aro-aldaw na buhay sa kinaban.

Si Jesukristo, bilang tawo, pinagsugtan kan demonyo makatolong beses nin tolong klaseng sugot (Lk. 4:8-13).

An enot iyo an paghanap nin tinapay. An ikaduwa, an pagsamba sa mga idolo. Asin an ikatolo iyo an paghagad nin mga milagro.

An enot na sugot iyo an mapapadapit sa tinapay.

An sabi kan demonyo: “Kun ika an Aki nin Dios, gibuha na magin tinapay an gapong ini” (v. 4).

Iyo man ini an pinakaenot na klase nin pagsugot na uminabpt sa mga Israelita duman sa disyerto: an mapapadapit sa kagutoman para sa tinapay. An sabi ninda sa Dios: “Tano ta dinara mo pa kami digdi sa lugar na ini na mayo nin makakakan? Mas marhay pa duman sa  Ehipto ta, dawa kami pinagooripon, dai kami nagugutom ta igwa nin kakanon”. Kun kaya an mga tawo nagrerebelde sa Dios asin ki Moises ta habo na pirmeng nag-aayuno sa pagkakan asin pag-inom asin habo nang magpadagos nin pagbaklay sa disyerto na tikapo sa mga kakanon asin inumon. An ginibo nin Dios iyo an pagtao sainda nin manna asin nin tubog sa disyerto tanganing magkulpa an pagkagutom nindapara sa kakanon na pinaugtudan duman sa Ehipto (Ex. 16; Dt. 8:3,).

Idtong mga nagusto kan buhay nin pagaayuno sa disyerto, tinawan sinda nin managom na inumon duman sa dagang dinarahan sainda nin Dios na iyao an ‘dagang nagbubulos nin gatas asin tangguli” (Enot na binasa -Dt. 26:6).

Siring man , sa pagayuno nin kuwarentang aldaw asin banggi, namatean ni Jesukristo an makuring pagkagutom para sa tinapay, sa kakanon para sa hawak, tanganing talikdan niya an trabaho nin pag-ayuno na sarong gaweng pang-espirituwal.

Alagad, an pagsugot na ini, linabanan ni Jesukristo sa pagromdom kan tataramon nin Dios: “Bako lamang sa tinapay nabubuhay an tawo, kundi sa lambang tataramon na minagikan sa nguso nin Dios” (Hilnga an Dt. 8:3; Lk. 4:5a).

An tawo, siring man, pirmeng pinagsusugtan dapit sa pagkagutom sa kakanon para sa hawak. An saiyang pirmeng nasisibotan iyo an paghanap sa mga bagay na makakapakontento kan saiyang hawak, arog kan kakanon asin inumon, pag-atendir sa mga party, bangete asi mga dadalanon.

An saiyang isip pirmeng yaon sana sa pagremedyar kun paano malalaogan an nguso nin masisiram na kakanon, an tulak nin mananagom na inumon, asin an laman nin nakakaaling na kamatean.

Saen siya makua nin kusog asin kapnagyarihan tanganing madaog niya an sugot na ini dapit sa pirmeng paghanap nin mga pagpakontento asin kaalingan sa buhay? Daing iba kundi an pag-arog kan ginibo ni Jesukristo sa ebangheliyo  - na iyo an pag-ayuno sa mga bagay na para sa laman tanganing an pag-adal asin pagsabot sa mga tataramon nin Dios iyo an saiyang magin kakanon sa aro-aldaw na pagkabuhay.

Sa paging ini, an tawo magigin sarong akin in Dios, arog ki Jesukristo kun makakanood siyang pirmeng magtiwala sa kapangyarihan kan tataramon nin Dios na iyong magbabasog sag abos niyang kinakagutuman sa buhay digdi sa ibabaw nin daga.

An ikaduwang klase nin sugot kan demonyo na namatean ni Jesukristo na saiyang pagtawo iyo an mapapadapit sa pagsamba sa mga idolo nin kinaban.

An sabi kan demonyo, “An gabos na saimong nahihiling na mga kapangyarihan asin kamurawayan na yaon sa mga kahadean digdi sa kinaban mapapasaimo na, itatao ko ini saimo gabos, kun masamba ka sako” (v. 6-7).

Iyo man ini an ikduwang pagsugot na nangyari sa mga Israelita duman sa disyerto.

Nin huli ta nalalangkag na sinda ki Moises na haloy nang nakipagolay sa Dios sa itaas kan bukid nin Sinai asin ta an sabi ninda, “Habo na kaminh maglingkod sa sarong dios na dai nahihiling asin nakakaptan. Kaya gumibo kita nin sarong imahen nab aka na gibo sa mga bulawan asin mahalagang metal na uya satuya tanganing sambahon ta asin iyo an magiba sato sa pagbaklay (Hilnga an Ex. 32). Sa paging ini, sinuway ninda an tugon nin Dios na dai magsamba sa mga ladawan asin imahen bilang pag-arog kan ibang mga tawo sa lugar na idto kundi an pagsamba sa tunay asin buhay na Dios sana na nagpaluwas sainda sa Ehipto.

Sinugtan man si Jesukristo sa saiyang pag-estar nin kuwarentang aldaw asin banggi duman sa disyerto na talikdan an Dios nin espirituwal na buhay tanganing maglingkod sa mga dios nin materyal  na mga bagay na iyo an kwarta, trabaho asin apeksyon.

Linabanan ni Jesukristo an ikaduwang klaseng pagsugot na ini sa pagsabi: “An Dios sana an dapat mong sambahon asin paglingkodan” (V. 8). An tawo dai puwedeng makapaglingkod sa duwang kagurangnan…sa Dios asin sa kwarta” (Lk. 16:13; Mt. 16:24). Kaya, linabanan ni Jesukristo an pagsugot na ini na maglingkod sa mga idolo nin kinaban sa paagi nin paglimos.

Siring man, an tawo minaagi sa pagsugot na ini nin paglingkod sa mga idolo nin kinaban na iyo an kwarta, trabaho, asin apeksyon.

An tolong idolong ini konektado sa lambang saro. Tanganing magkaigwa nin kwarta dapat magtrabaho nin huli ta kun may kwarta asin trabaho makakakua siya kan gabos na klaseng apeksyon, simpatea, asin atensyon nin kinaban.

Nin huli ta kun mayo kan tolong ini, an pagmate nin tawo sa buhay niya garo pirmeng magublay. Naghohona siya na maluya an estimasyon na mareresibi niya sa iba, kaya, embes na sa Dios kita magsirbe asin mag-ako nin mga trabaho, minatakod kita tolos sa kwarta, trabaho asin paghagad nin apeksyon tanganing makamtan asin makaptan nyato an estimasyon, respeto, paghanga asin pagsamba kan ibang tawo.

Siring sa ipinahiling sato ni Jesukristo, an ikaduwang pagsugot na ini makokontra nyato sa paagi nin paglimos. Kun kuwarta an satong pinag-iidolo, dapat na maglimos kita nin kwarta sa mga pobre asin mga nangangaipo. Kun trabaho an satong pinag-iidolo, dapat na maglimos kita nin trabaho sa porma nin libreng pagserbisyo sa iba o sa komuidad nyato. Kun apeksyon an satong pinag-iidolo, kaipuhan na maglimos man kita nin apeksyon, o estimasyon, sa iba.

An ikatolong klse nin pagsugot na namatean ni Jesukristo sa saiyang pagkatawo iyo an mapapadapit sa paghanap nin mga milagro.

An boot sabihon kan paghanap nin mga milagro iyo na kun paano madudulagan nin tawo an mga mapait na reyalidad nin buhay, arog kan mga kasakitan, problema, kahelangan, pagtios, asin iba pa, na dai niya kaya, o kaya habong akuon hukli ta kontra ini sa mga ideyal nin buhay na saiyang iniisip, o nasa isip niya.  

An sabi kan Diyablo ki Jesukristo, “Kun talagang aki ka nin Dios, lumampaw ka; huli ta nasasabi sa kasuratan “Ipapadara nin Dios an mga angheles niya tanganing bantayan ka”, asin nasasabi pa, “Sasaluhon ka ninda tanganing an saimong mga bitis dai magtama sa mga kagagapoan”.

Aram ni Jesukristo an saiyang mga depekto, mga kaluyahan, asin mga kakulangan sa saiyang pagkatwo, arog baga na siya aki sana nin sarong karpintero, na dai siya nakapag-adal sa mga famosong eskwelahan, na pobre sana an saiyang mga magurang, asin iba pa. Alagad, boot siyang kumbensiron kan Diyablo na tanganing malabawan niya an mga depektong ini sa buhay, kaipuhan na maggibo siya nin mga imposibleng bagay, o kaya magmilagro siya, tanganing maghanga asin magtubod an mga tawo saiya. 

Sa pagsugot na ini kan Diyablo, nagsabi si Jesukristo: “Hare pagtestinga an saimong Kagurangnan”.

Sa paagi kan mga tataramon na ini, boot ni Jesukristo na ipaintiyende sa Diyablo na an pagmawot na haleon asin dulagan an mga depekto, kadepisilan, asin mga kasakitan sa buhay nin tawo iyo an paghagad sa Dios nin sarong milagro o nin imposibleng bagay.

Dakulang pagsugot man ini sa Dios nin huli ta kan ipadara niya sa tawo an mga kadepisilan, an tuyo niya iyo na magin man akin in Dios an tawo sa pag-arog ki Jesukristo na nag-ako nin kagadanan sa krus tanganing mabuhay-liwat.

Sarong katotoohan an boot itukdo ni Jesukristo na an asenso asin pagtalubo nin tawo pirmeng may kaibang kadepisilan asin kasakitan.

Iyo man ini an ikatolong pagsugot na uminabot kaidto sa mga Israelita kan magbaklay sinda sa laog nin kwarentang taon sa disyerto. Pinagtentaran sinda na isikwal an mga kasakitan, kadepisilan, asin pagtios nin buhay sa pagbaklay ninda sa disyerto. Hinagad ninda sa Dios an milagro na darahon asin ilaog tolos sinda sa Dagang Panuga tanganing matapus na an saindang mga kasakitan sa pagbaklay sa disyerto.

Siring man, pirme kitang pinagsusugutan kan Diablo sa bagay na ini, na iyo an ikatolong sugot kan Diayblo ki Jesukristo asin sa mga Israelita. Pirme ta man  na pinagmamawot na makalibre sa, o mahale, an mga depekto, kahelangan, pagtios, kadepisilan na iyo an tunay na reyalidad nin buhay sa daga.

An gusto nyato iyo an pasil, komportable, asin halawig na buhay digdi sa daga. Habo kitang magsakit asin magadan. Kaya, minadulag tolos kita sa mga bagay na problema, masakit, depisil o magabat huli ta maluya kita asin mayo sato an kusog asin kapangyarihan nin Dios.

Tanganing makua nyato an kusog asin kapangyarihan na ini, arugon nyato si Jesukristo na linabanan an kaluyahan niya sa paagi nin pagpamibi sa langitnon na Ama sa laog nin kwarentang aldaw asin banggi sa disyerto.

Kun siring, an pamibi iyo an panlaban nin tawo laban sa ikatolong sugot kan Diyablo na iyo an paghagad nin milagro asin mga imposibleng bagay sa Dios asin an dai pag-ako nyato kan tunay na reyalidad kan satong buhay na igwang mga kagabatan, kasakitan asin kadepisilan.

Kaya ngonian, naiintyendihan na nyato na an tataramon nin Dios na ini na iyo an pagsugot kan Diyablo ki Jesukristo sa disyerto iyo an sarong tataramon na para man sa sato asin yaon sa laog kan eksperyensya nin pagkabuhay kan lambang saro sato.

An sabi ni Apostol Pablo sa saiyang surat sa mga taga-Roma (Rom. 10:8-13), na iyo an satong Ikaduwang Babasahon ngonian na Enot na Domingo nin Kuwaresma, iyo ini: “An tataramon na ini harani saindo, nasa nguso asin puso nindo…na kun ipahayag kan saindong nguso na si Jesus iyo an Kagurangnan asin magtubod kamo sa saindong puso na binuhay siya liwat nin Dios sa mga gadan, kamo makakaligtas” (vv.8b-10).

Kun siring, an pagsugot tunay na nangyayari sa buhay ta asin namamtean nyatong yaon an Diyablo sa laog kan satuyang pagkatawo, nakikilaban kontra sasa mga kamawotan nyato na maglingkod sa totoo asin buhay na Dios.

An panahon nin kaligtasan uminabot na sa satuya, mga tugang. Ngonian na enot na Domingo nin Kuwaresma, pinunan na nyato an pakikipaglaban sa tolong pinakadarakulnag sugot nin Diyablo sa buhay nyato na iyo an pagsugot sa tinapay, sa pagsamba sa mga idolo nin kwarta, trabaho asin apeksyon, siring man an sugot nin pagsikwal kan mga reyalidad sa buhay. Itinukdo sa satuya ni Jesukristo sa ebanghelyo ngonian kun paano ta lalabanan asin kokontrahon an tolong sugot na minaabot sa aro-aldaw tang pagkabuhay sa paagi kainingtolong gaweng pang-Kuwaresmang ini na iyo an pag-ayuno, paglimos, asin pagpamibi.

Kun gibuhon ta sana ini, segurado na satuyang kapangganahan kontra sa mga bagay na pirmeng nakakaulang asiin nakakagadan sa satuyang aro-aldaw na pagkabuhay.

8 Marso 1992

Parokya ni Ntra, Sra. De la Asuncion

Canaman, Camarines Sur, Islas Filipinas