EVA -PSB No. 02-3

Pag-Adal sa Bibliya No. 02-3

Tema: Eva

30 Marso 2001

  I.      Sa Libro Historiko asin Kadonongan:

Gen. 2:18-25 - Si Yahweh Dios nagsabi, ‘Bakong marhay na an lalaki magsolo-solo. Magibo ako nin sarong magigin katuwang niya.’ Kaya, hale sa daga, ginirbo nin Dios an gabos na mga lalaw na haup asin an mga gamgam sa langit. Ini gabos dinara niya sa lalaki tanganing hilngon kun ano an iaapod niya sainda: an lambang saro madara nin ngaran na itatao kan lalaki. Tinarawan kan lalaki nin mga ngaran an gabos na hayop, an gabos na mga gamgam sa langit asin an gabos na lalaw na hayop. Alagad mayong nakuang katuwang na angay saiya an nakua kan lalaki. Kaya pinaturog nin sarong haraom na pagturog ni Yahweh Dios an lalaki. Asin mantang siya natuturog, kinua niya an saro sa saiyang gusok asin pinatos niya iyan nin laman. Ginibo ni Yahweh Dios nin sarong babae an gusok na kinaua niya sa lalaki, asin dinara niya siya sa lalaki. Nagtaram an lalaki: ‘Ini nanggad an tulang na hale sa sakuyang mga tulang, asin laman na hale sa sakuyang laman! Aapudon ining babae, huli ta hale siya sa lalaki.’ Kaya, binabayaan kan sarong lalaki an saiyang ama asin ina  dangan minasaro kan saiyang sadiri sa saiyang agom na babae, asin sinda nagigin sarong hawak. Ngonian pareho sindang huba, an lalaki asin an babae, alagad dai sinda nasusupog na maghiling sa lambing saro.

Gen. 3:1-6, 12, 16, 20 - An serpiente iyo an pinakatuso sa gabos na lalaw na hayop na ginibo ni Yahweh Dios. Hinapot kaini an babae, ‘Totoo dawn a nagsabi an Dios na dai kamo magkakan hale sa arin man na kakahoyan sa hardin?’ Sinimbag  kan babae an serpiente, ‘Puwede kaming magkakan kan bunga kana in man na kahoy sa hardin. Alagad dapit sa bunga kan kahoy na nasa tahaw kan hardin an Dios nagsabi. “Dai kamo magkakan kaiyan, ni dumotdot kaiyan, ta kun iyo kamo magagadan”.’ Dangan nagsabi an serpiemte sa babae, ‘Dai! Dai kamo magagadan! Sa katunayan aram nin Dios na sa aldaw na kamo magkakan kaiyan magkakaburuklat an saindong mga mata asin kamo magigin mg adios, na aram an marhay asin an maraot.’ Nahiling kan babae na an kahoy marhay na pagkakanon asin magayon sa paghiling, asin nakakaakit an kaaraman na puwedeng ikatao kaiyan. Kaya nakua siya nin nagkapipirang bunga asin kuminakan kaiyan. Tinawan man niya an saiyang agom na kaiba niya kaidto asin nagkakan man siya…Nagsimbag an lalaki, ‘An babae na itinao mo sako, siya an nagtao sako kan bunga, asin kuminakan ako’…Sinabihan niya an babae: ‘Pakadadakulon ko an simong mga sakit sa pangaki, sa sakit ka mangangaki kan saimong mga aki. An saimong kamawotan magigin iyan para sa saimong agom na lalaki, maski siring siya an magigin kagurangnan mo’…Nginaranan kan lalaki an saiyang agom na ‘Eva’ huli ta ina siya kan gabos na nabubuhay.

Gen. 4:1, 25-26 - Nagdurog an lalaki sa saiyang agom na babae na si Eva, asin nangidam siya asin nangaki ki Cain.  Nagsabi siya, “Nakua ko an sarong aking lalaki sa tabang ni Yahweh’. Nakidurog si Adan sa saiyang agom na babae, asin nangaki siya nin sarong aking lalaki na nginaranan niyang Seth, asin nagsabi siya, ‘Huli ta tinawan ako nin Dios nin saro pang aki bilang karibay ni Abel, nin huli ta ginadan siya ni Cain’. Nangaki man si Seth nin sarong aking lalaki, asin nginaranan niya siyang Enosh.  An tawong ini iyo an primerong nag-apod sa ngaran ni Yahweh.

Tob. 8:6-7 - Ika an naglalang ki Adan, ika an naglalang ki Eva na saiyang agom na babae na magin siyang katabang asin support; asin hale sa duwang ini an katawohan namundag. Ika an nagsabi, “Bakong marhay na magsolo an lalaki; magibo kita nin sarong katuwang na siring saiya”. Kaya dai ko sinasaroan an sakuyang tugang na babae huli sa motibong kalibogan; ginigbo mo ini sa pagkasolido sa puso. Konsideraron mo siya sa saimong pagkaherak asin ako man asin daraha kami pareho sa edad nin pagkagurang.

Sir. 25:24 - An kasalan nagpoon sa sarong babae, asin salamat saiya kita gabos dapat magadan.

II.      Sa Libro nin mga Profeta:

Is. 3:16-24 - Nagsabi si Yahweh: Huli sa kahambugan kan mga aking babae ni Sion, an manera akn saidnang paglakaw na nakatingag an saindang mga payo asin nakakatuksong mga mata, an manera kan saindang pagtataram, na pinapatanog an mga pulseras sa saidang mga bitis, tatawan nin Kagurangnan an mga aking babe ni Sion nin mga payong magatol, asin hahaleon an tahob sa saindang kahubaan. Sa aldaw na iyan hahalean kan Kagurangnan an mga adorno sa bool. An mga korona, gargantilya asin mga pulseras, an mga velo, turbante, an mga kadena sa bitis asin paha, an mga perfume asin mga medalya, an mga singsing na pantatak asin singsing sa dungo, an mga mamahalon na gubing, mantilyas, mga aliknoy asin bulsa, an mga salming, mga badong lino, mga turbante asin mantilyas. Embes na pahamot, sarong bata; embes nap aha, sarong pisi; embes na sinalapid na buhok, sarong inaris na payo, asin embes na mamahalon na gubing, sarong sako; asin mga labod nin latigo embes na kagayonan.

III.      Sa Libro kan Ebantghelio:

Mt. 19:3-6 - Nagdulok saiya an nagkapipirang Pariseo, asin nagsabi sinda saiya tanganing testingon siya, ‘Kontra daw sa Katugonan na idiborsyo kan lalaki an saiyang agom na babae sa anuman na dahelan?’ Nagsimbag siya, Dai nindo nabasa na an kaglalang sa kapinunan linalang saindang lalaki asin babae asin siya nagsabi: Kaya kaipuhan na bayaan kan lalaki an saiyang ama asin ina dangan masaro siya sa saiyang agom na babae, asin  sindang duwa nagigin sarong hawak? Kaya bako na sindang duwa, kundi saro na sanang hawak. Kun kaya, kun ano an pinagsaro nin Dios, dai dapat pagsuhayon kan tawo.’^a

IV.      Sa Libro kan mga Surat:

Rom. 5:12 - Marhay, kun siring, huli sa sarong tawo luminaog an kasalan sa kinaban, asin kagadanan huli sa kasalan asin, kun kaya, naglakop an kagadanan sa enterong katawohan huli ta an gabos nagkasala.

1 Co. 11:1-16 asin 14:34-35

2 Co. 11:3 - Alagad an serpiente, sa saiyang katusuhan, pinagtentaran si Eva, asin natatakot ako na sa parehong paagi na raoton man an saindong mga ideya asin mabaling hale sa simpleng debosyon ki Kristo.

1 Tim. 2:9-15 - Dai ko tinutugotan an sarong babae na magtukdo o magtaram sa sarong lalaki kun ano an dapat niyang gibuhon. Dai dapat magtaram an sarong babae, huli ta si Adan iyo an ento na pinurma asin pagkatapus si Eva, asin bakong si Adan an nalagalag kundi an babae iyo an nalagalag asin nahulog sa kasalan. Minsan siring, makakaligtas siya sa paagi nin pag-aki, bastang nabubuhay siya nin sarong angay na pamumuhay asin magmapusog sa pagtubod asin sa pagkamoot asin kabanalan.

1 P. 3:2-6 - Sa parehong paagi, an mga agom na babae dapat magin makinuyog-kuyog sa mga agom nindang lalaki. Dangan, kun igwa nin mhga agom na lalaking habong magkuyog sa tataramon, mahiling nindang naaakit sinda, dawa dai nin itinaram na tataramon, sa paagi kan paguugali kan saindang agom na babae, kun mahiling ninda kun paano kaimbod asin kun gurano kadedikado an saindang agom na babae. Dai kamo magbado tanganing magpasikat, na may sulot nin mamahalon na bulawan asin magayoon na gubing; may sinalapid na buhok; an gabos na ini dapat nasa irarom, sa puso nin sarong persona; dai malalapa: an ornament nin sarong mahamis asin mahuyong disposisyon - iyo ini an mahalaga sa mata nin Dios.Iyo iyan an pagbulos na may kagayonan kan mga babae kaidto - masarig sinda sa Dios asin mahuyo asin malambing asin nagkukuyog sa saindang agim na lalaki; siring ki Sarah na makikuyog-kuyog ki Abraham, asin inapod niya siyang saiyang kagurangnan. Kamo ngonian mga kaakian niya, mantang nabubuhay kamo nin sarong marhay na pamumuhay asin dai nagpapadaog sa pagkatakot o sa kahaditan.

DOKTRINA PARA SA TEMANG “EVA”

1.    Linalang nin Dios an babae sa sarong gusok na kinua hale sa hirog kan lalaki, “tulang kan saiyang mga tulang, asin laman kan saiyang laman (Gen. 2:21, 23), nginaranan na babae (Gen. 2:23), o “Eva” (Gen. 3:20).

2.    Linalang an babae tanganing magin katuwang kan lalaki (Gen. 2:18), sarong katabang asin support (Tob. 8:6).

3.    An kasalan naglaog sa kinban sa paagi kan babae (Gen. 3:1-6, 12; Sir. 25:24; 2 Co. 11:3; 1 Tim. 2:14), huli kan pagkaori asin pagka-ara kan Diyablo (Kad. 2:24; Stgo. 3:14-4:3) o serpyente (Gen. 3:1; 2 Co. 11:3; Apo. 12:3,9 20:2,3).

4.    An epekto kan kasalan sa buhay kan babae: an dakul na sakit sa pagpangaki, an gabos na kamawotan niya ipapahunod sa agom na lalaki (Gen. 3:16; 1 P. 3:5). Ipinangaki niya an katawohan sa lindong nin pagkakasala (Gen. 4:1, 25-26; 51:5; Tal. 8:6-7 Rom. 5:12).

5.    Sa pagtubod, kaipuhan na an babae magpasakop asin magkuyog sa lalaki (1 Co. 11:1-16; 14:34-35; 1 Tim. 2:15; Gen 3:16).

6.    An mga pag-uugali  na dapat na mahiling sa sarong kristyanong babae (Is. 3:16-24; 1 P. 3:2-6): an paggamit nin velo sa payo kan babae bilang paggalang sa anghel (1 Co. 11:1-16; Is. 3:24). An ayong arit iyo an sarong tanda nindisgrasya (Ezk. 7:18), asin sarong pagmundo (Am. 8:10).