NEHEMIAS - Scrutatio Scripturarum

ESCUELA CATEKUMENAL COMMUNITIES

Probinsya ni Camarines Sur asin Albay

SCRUTATIO SCRIPTURARUM

Tema: NEHEMIAS

20 Abril 2002

HOMILIA

Puwede nyatong isumaryo an gabos tang nadangog ksubago hale sa apat na baabsahon asin sa mga “sharing” nindo dapit sa temang “Nehemias” sa sasarong tataramon na iyo an ‘PAGSUKIT” (Restorasyon).

Kasubago, nadangog nyato an tataramon na “pagpabalik”. An pagbalik asin pagsulit iyo na magkaiba an mga ini. An “pagbalik” ginagamit para sa mga tawo, bagay o lugar. Alagad an pagsulit ginagamit sa mga kondisyon o kamugtakan. Kaya, an angay na tataramon na gagamiton ta para sa mga paratukdo na si Esdras asin Nehemias iyo an “pagsulit” huli ta sinda iyo an mga para sulit kan mga dating pag-obserbar kan mga tawo dapit sa mga Katugonan nin Dios, mantang si Nehemias, gobernador ni Hadeng Cyrus kan Persia, iyo an nagsulit kan nagabang kudal kan lumang siyudad kan Jerusalem.

Sosog sa ika-duwang bihasa (Is. 44:28-45:6) minimidbid ni Isaias si Hadeng Cyrus bilang sarong Mesias o sarong  pinahidan nin Dios tanganing iyo an magpabalik kan saiyang banwaan hale sa pagkadistierro pabalik sa saindang dating lugar sa Israel. Siya man iyo an nagboot tanganing patindugon liwat an Templo (Esdras), asin an kadakul kan dating siyudad nin Jerusalem (Nehemias 1-2).

Paano nakakakumparar si Nehemias ki Jesukristo?

Sa ebangheliong binasa (Mt. 23:37-39), tinangisan ni Jesukristo an siyudad nin Jerusalem kan ini mahiling niya sa harayo asin nagsabi “O Jerusalem, Jerusalem, ginagadan mo an mga profeta dangan ginagapo mo an mga sinugo nin Dios saimo! Magkapirang beses na gusto kong tiripunon an saimong mga akin a arog kan paglukob nin guna sa saiyang mga siyo, alagad habo ka” (Mt. 23:37-38). Hilnga ta pinabayaan na an saimong harong, asin mayo nang nag-eestar na tawo”.

Para ki Jesukristo, gaba an espirituwal na harong ni Israel. kaya, arog ki Nehemias, ipinadara siya nin Dios sa daga tanganing patindugon giraray asin itugdok liwat an bagong Jerusalem (Gibo 15L16-17; Apo. 21:10-24), na iyo an Sta. Iglesia tanganing ikasulit an langitnon na Jerusalem sa dati niyang kamugtakan hale sa daga.

Ano naman an kumparasyon nindo sa tema kan mga babasahon na hale sa Banal na kasuratan?

An nadangog nindo sa ika-tolong binasa hale sa Apokalipsis iyo na an kudal kan langitnon asin bagong Jerusalem na ipinatugdok ni Jesukristo hale sa doseng klaseng mamahalon asin pambihirang mga gapo bilang adorno  sa pundasyon: hasper, sapiro, agata, Esmeralda, onise, kornalina, krisolito, berilo, topasyo, kriseprasa, hasinto, asin amatista.

BIlang mga miyembro kan komunidad na binago hale sa lumang Iglesia, kamo an ginagamit ni Jesukristo bilang mga buhay na gapo tanganing ipantugdok kan bagong Iglesia, an bagong Jerusalem sa langit (1 Co. 3:12, 16-17; 1 P. 2:5-10; Ef. 2:20-22).

Kaya, magin logod kamo mga pambihira asin mamahalon na gapong buhay, asin bakong mga ordinary sana, nin huli ta kun gamiton asin ibugtak kamo ni Jesucristo sa saiyang bagong edipisyong pinatokdok alagad mga ordinaryong tawo sana, na an mga kaisipan mga osdinaryo man sana asin dai man nabago kan mga tatramon nin Dios na saindang pinag-aadalan asin nadadabgog, kamo pagtatasaran asin tutuyawon ngapit kan mga tawo, na embes midmidon kamo bilang pambihira asin marhay na mga tawo, kamo saindang pag-uulog-ologon kaiba pati an entering Iglesiang binago maski gurano kagayon asin kamahalaga iyan.

Siring man, dai kamo magsayuma kun kuahon o apodon kamo ni Cristo bilang mga gapo sa mga tanganing ikapatindog kan saiyang bagong Iglesia, nin huli ta sasag man sa mga tataramon kan satong eroeng si Dr. Jose Rizal, “an gapo sa oma na dai pinurot tanganing ibugtak na magin parte nin sarong bagong edipisyo, an gapong iyan sarong inutil asin daing pakinabang.”

An panahon, abilidad, kuwarta, mga kasangkapan patin an bilog nindong personang itinatao o dinara nindo digdi sa konunidad, na iyo an binagong Iglesia, asin an bagong Jerusalem, na pinatindog ni Jesucristo sa ngonian na panahon, iyo an nagpapagin saindong mahalaga asin pambihirang mga gapo, mga tampok sa kudal kan Bangong Jerusalem na langiton asin diosnon. Sa pagkapatukdok asin pagkabilog kan Bagong Jerusalem na ini mahihiling kan gabos na tawo an mga mahalaga asin pambihirang gapo na ginamit ni Jesucristo sa saiyang edipisyo asin sinda magngangalas, maghahanga, asin mag-oomaw sa Dios huli saindo.