Per Totam Noctem Laborantes - 5th Sunday of the Year

Homiliya para sa Ika-Limang Domingo kan Taon (for the ME Bible Study Group)

Base sa Lk. 5:1-11

Seryeng hale sa “Mga Paghorop-horop asin Katukdoan kan Disyerto”

PER TOTAM NOCTEM LABORANTES…

“Magdamlag kaming nagtrabaho, alagad mayo kaming nadakop; Alagad, sa tataramon mo, ibubntog mi an samong hikot” - Lk. 5:5

A.      An classroom ni Jesukristo

An classroom ni Jesukristo iyo an mga pangpang kan danaw asin salog (Mk. 4:1-2; 2:13; Lk. 5:1), asin an saiyang stage iyo an baroto (Lk. 5:3).

Bako siyang arog kan mga modernong paratukdo ngonian, na kaipuhan na magpatugdok nin mga darakulang edipisyo, arog kan mga convention hall, mga katedral asin mga simbahan, asin magbugtak nin mga kuwartong kumpleto sa mga modernong kagamitan asin mga libro, tanganing magtukdo.

An blackboard ni Jesukristo iyo mismo an natura. An saiyang libro iyo an mga bagay na yaon na asin nahihiling kan mga tawo, arog kan mga tinanom, gamgam, mga hayop, asbpa., asin an mga sitwasyon o kamugtakan kan mga ordinaryong tawo. Sa mga bagay asin sitwasyon na ini minakua siya nin mga adal o doktrina na itutukdo sa mga tawo.

B.      An pag-apod kan enot niyang mga disipulo o estudyante

Sa paglibot niya sa mga buro-banwa asin baryo, tanganing maghanap kan mga nawawarang karnero kan Israel (Ez. 34:4; Mt. 10:6; Lk. 15:4-7; 19:10; Is. 40:10-11), nasumpungan ni Jesukristo an pinaka-enot niyang mga disipulo. Sa Mateo 4:18-20, an enot na disipulong nginaranan iyo si Simon na inaapod Pedro, asin an saiyang tugang na si Andres na parehong parasira (v. 18), asin si Tiagong akin i Zebedeo, asin an tugang kaining si Juan, na mga parasira man asin nagsusursi kaidto kan saindang mga hikot, kaiba ab saindang amang si Zebedeo (v. 21). Pareho man ini duman sa estorya ni Markos (Mk. 1:16-20) asin digdi ki Lukas (Lk. 5:1-11). Sa apat na evangelista, an estorya sana ni Juan an naiiba, nin huli ta an enot na mga disipulong nagsurunod ki Jesukristo iyo an duwang dati nang disipulo ni Juan Bautista, na an saro iyo si Andres na tugang ni Simon Pedro, dgan dinara ni Andres si Pedro ki Jesus tanganing ipabisto saiya, asin an nagsunod iyo si Felipe asin natanael (Bartolome) (Hilnga am Juan 1:35-31).

Sa pagkasumpong iya ki Pedro asin Andres, sinasabihan sinda ni Jesukristo  na “Sunod na kamo sako, asin gigibuhon ta kamong mga parasira nin tawo” (Mt. 4: 19), asin digdi sa Lukas, an sabi ni Jesukristo ki Pedro iyo na “Dai ka matakot, magpoon ngonian mga tawo na an saimong pagdadakupon” (Lk. 5:10).

C.      An kahulugan kan mga tataramon na “parasira nin tawo”

                                                                                                

Masasabotan nyato an kahulugan kan mga tataramon na “parasira nin tawo” na sinasabi ni Jesukristo kun kukuahon nyato an nagkapipirang sitas sa Bibliya na nagsasabi dapit sa mga parasira.

Sa libro ni profeta Jeremias, ini an saong makukua: “Mapadara ako ngonian nin dakul na mga parasira - si Yahweh iyo an nagtataram - asin iyo ini an madarakop sa sainda; sunod, mapadara ako nin dakul na mga parahasog, asin ini an mahasog sainda tanganing magruluwas sinda hale sa lambang bukid, bulod, asin mga bungag nin kagagapoan” (Jer. 16:16).

Ini naman an satuyang makukua sa libro ni Habakkuk, na nagsasabi na “An tratamyento mo sa mga tawo garo siring sa mga sira sa dagat, siring sa mga nagkakamang, mga bagay na daing mga paratukdo. May mga tawong madarakop sa sainda gabos sa mga banwit ninda, na hahawason sinda sa mga hikot ninda, sa mga lambat ninda sinda titiripunon, kaya mag-orogma sinda nin labi-labi” (Hab. 1:14-15. Hil. Man an Jr. 16:16; Ezk. 12:13; 17:20, 29:4m; 32:3).

Sa saiyang pagtukdo, ibinaing man ni Jeuskristo an kahadean nin langit sa sarong hikot. “o, an kahadean in langit nakakaagid sa sarong hikot na ibinuntog sa dagat na nakakadakop nin gabos na klaseng sira. Kun iyan pano na, iginigilid na iyan kan mga parasira sa pangpang; dangan minaturukaw sinda tanganing pillion an mga marhay asin ibubugtak sa basket asin itatapok giraray sa dagat idtong mga dai pa pwedeng mapakinabangan. Arog kaini an mangyayari sa katapusan kan panahon: maburutwa an mga anghel tanganing suhayon an mga tampalasan duman sa mga matanos  asin itatapok sinda sa nagkakalayong hurno kun saen yaon an pagtangis asin pagragot kan mga ngipon” (Mt. 13:47-50).

Malinaw na sinsabi sa mga halimbawang ini na an sinasabing mga sira iyo an mga tawo, asin an mga parasira iyo an mga paratukdo kan mga tawo.

Sa antigong kristyanong ikonograpiya, an sira iyo an simbolo o representasyon o imahen ni Jesukristo asin kan mga kristyanong miyembro kan igklesia ni Jesukristo. Sa tataramon na Griyego, an pag-apod sa sira iyo an ICTUS (ì χƟϒƩ), na ginamit kan mga enot na kristyano bilang acronym ni Jesukristo na an kahulugan “Iesus Christus Tot Uomos Soter”. An sarong drawing kan sira iyo an simbolo kan mga kristyanong antigo na ginamit ninda tanganing maaraman na an sarong kaolay saro man na kristyano o bilang sarong password ninda.

Huli kan pruwebang ini na hale sa antigong tradisyon nin mga enot na kristyano, masasabi nyato ngonian na an simbolismo kan sarong sira digdi sa evnagelio nangangahulugan man kan sarong kristyano o kan sarong disipulo ni Kristo.

Kun kaya, kan sinabi ni Jesukristo na gigibuhon niya si Pedro bilang sarong parasira nin mga tawo, an gusting sabihon ni Jesukristo iyo na si Pedro asin an mga apostol na kapareho niya gigibuhon ni Kristo bilang mga paradkop nin mga tawong gigibuhon nindang sarong kristyano o bilang disipulo ni Kristo.

D.     Paano daw an pagdakop nin mga sira?

            Sosog sa estorya kainig evangelio na satong binasa, kan mahiling ni Jesukristo an duwang baroto na harani duman sa pangpang, na an sarong baroto pagsasadiri kan magtugang na Simon asin Andres asin an saro naman iyo idtong pagsasadiri kan mag-amang Zebedeo na mga kabakas ni Simon (Lk. 5:10; Mk. 1:19), sinabihan niya si Simon Pedro na ipatahaw nin kadikit nin huli ta gagamiton niya an baroto tanganing magtukdo sa mga tawo (Lk. 5:3).

            Pagkatapos kan pagtukdo sa mga tawo, sinabihan niya si Simon na,  “Pumalawod ka asin ibuntog mo an mga hikot tanganing magdakop nin mga sira” (Lk. 5:4). An mga sirang dinadarakop kaidto duman sa Danaw kan Gennesaret (Danaw kan Galilea, sosog sa Mt. 4:18 asin Mk. 1:16) iyo an Tilapia Nilotica (sosog sa Ezek. 29:4).

            Alagad, sa pagkadangog kan sugo na ini ni Jesukristo, si Pedro nagsabi: “Maestro, magdamlag kaming nagtrabaho, alagad mayo kaming nadakop, alagad, sa mga tataramon mo, ibuuntog mi giraray an samong mga hikot” (Lk. 5:5).

            An protesta o reklamong ini ni Pedro dapit sa dai ninda pagkadakop nin sira maski magdamlag sindang nagtrabaho, igwa nin saro pang kabaing na estorya na makukua sa evangelio ni San Juan (Jn. 21:4-8).

            Sosog sa parallel na sitas na ini sa Jn. 21:4-8, si Jesukristo  nakatindog sa pangpang pagka-agang amay, asin nag-apod siya sa saiyang mga disipulo na yaon pa sa baroto, na an sabi, “Mga amigo, may nadakop na lamang daw kamo?” (Jn. 21:4-5). Nagsimbag an mga disipyulo na dai nabisto na idto si Jesukristo asin an saiyang tingog, na “Mayo”. Dangan sinabihan sinda ni Jesus na “Ibuntog nindo an saindong mga hikot sa toong parte kan baroto asin ugwa kamong madadakop”. Ini an saindang ginibo asin kadakul sindang nadakop na sira mala ngani ta dai na ninda kayang hawason an saindang hikot, kaya kinaipuhan na an ibang mga disipulo magharani duman sa baroto na sinasakyan ni Pedro asin Juan tanganing saklolohan sinda sa pagbuntog kan hikot asin an mga sira pasiring sa mamarang pangpang. An distansya kan pangpang asin an nadakopan na tubig iyo an ma-sanggatos na yarda (Hilnga an Jn. 21:6-8).

            An insidenteng ini digdi sa Juan 21:4-8, kun ikokonektar duman sa pahayag nin pagprotesta ni Pedro sa Lk. 5:5, igwa nin saro sanang adal o leksyon. An sasarong adal o leksyon na boot ikatukdo sa sato kan evangelio iyo an dapit sa bagong estilo nin pagdadakop nin mga sira na gustong ikatukdo ni Jesukristo sa mga disipulo o mga apostol niya.

            Tano ta an sabi kan mga disipulo digdi sa Jn. 21:6 na “Mayo kaming nadakop na sira”, asin duman sa Lk. 5:5, si Pedro mismo an nagsabi na “Magdamlag kaming nagtrabaho, alagad mayo kaming nadakop”? Tano ta, maski nagdamlag na sindang nagtrabaho, alagad mayong nadadakop na sira an mga disipulo?

            Kun sasaboton nyato an bagong instruksyon ni Jesukristo duman sa saiyang mga disipulo na nakalunad duman sa baroto sa lawod na “Ibuntog nindo an saindong mga hikot sa toong parte kan baroto”  (Jn. 21: 6), an boot sabihon kaini iyo na, kun tano ta dai sinda nin nadadakop, nin huli ta an mga disipulo nagbubuntog kan saiyang hikot sa walang parte kan baroto. Kaya, kan ribayan ninda ab saindang estilo o paagi nin pagbuntog kan hikot sa toong parte, sosog sa baong tukdo sainda ni Jesus, dangan na sainda nadakop nin kadakul na sira ini nangyari na haranihon sanang marhay sa pangpang, na-sanggatos sanag yarda, asin dai ninda kaipuhan pang mag-ilawod na harayoon na marhay.

              An insedenteng ini igwa nin aplikasyon sa saindang futurong trabaho nin pagdakop nin mga tawo, asin bako na sanang mga literal na sira, na saindang gigibohon na mga disipulo o mga kristyano.

             Sa trabaho kan mga apostol, asin sa satuya man na mga modernong apostol ni Cristo, nin pagkukumbusir sa mga tawo tanganing mag-atendir sa mga katekisis nin ebanghelisasyon o sakramentalisasyon, parating minareklamo kita na haros mayong tawo kitang nabubutong o nakukumbesir na mag-atendir nin huli sa kadakul na dahelan sa parte nyato o sa parte kan mga tawo, maski pirang aldaw na kitang nagparalibot tanganing magpaisi o mag-imbitar. Sisay daw talaga an may problema kun tano ta mayo liyang nakukumbensir, an mga tawo daw an may problema o kita?

           Kun ibabasar nyato an paliwanag sa problemang ini didi sa paliwanag dapit kan insidenteng ini sa Jn. 21:4-8 asin sa Lk. 5:5, an may problema talaga, sosog ki Jesucristo, iyo an paagi o estilo nin pagkukumbisir kan mga apostol sa mga tawo, na sinasabin digdi sa evangelio bilang sarong salang estilo kan mga disipulo nin pagdakop nin sira o pagbubuntog nin hikot sa pagdakop nin sira.

          Sosog sa insedenteng kan Jn. 21:4-8, an mga disipulo nagbubuntog kan saindang hikot sa walang parte kan baroto, kaya sinda nadakop nin sira, maski “magdamlag na sindang nagtratrabaho” (Lk. 5:5). An sinasabi digdi na “walang parte kan baroto”, ini igwa nin sarong hararomna kahulugan.

         An kahulugan kan pagbuntog kan hikoy sa walang parte” iyo na an mga disipulo nagtratrabaho na may kaluhayan, nin huli ta an boot sabihon kan wala iyo an “maluya”. Kaya, kun igwa nin sarong tawo na nagtratrabaho na walahan o ginagamit an walang kamot sa patratrabaho, an resulta iyo na maluya an klase kan trabahong nagiginibo. Kun siring, sa BIbliya, an walang minasimbolisar kan sarong posissyon o kamugtakan na maluya, o mayong kusog, o mayong epecto , (Sa kristyanismong ikonograpiya, tradisyon na ibinaladawan si Satanas o an Diyablo na nasa walang parte kan Dios o kan yawo-Jb. 1-6, Mt. 25:33, 41-.Siring na an mga marhay na angel ibunugtak sa toong parte. Mt. 25:34). Kay , kun sa pagtatrabaho, an gagamiton  nyato iyo an wala. An boot sabihon kaiyan iyo an makakalaom kita na mayong marhay na resulta o epecto an trabong iyan. Alagad, kun tooong kamot an gagamiton nyato sa pagtratrabaho, makakalaom kita na an trabohong iyan puwersadon asin may magagayon na resulta o epecto.

         Kun babalehon nyato idtong problema  na sinasabi nyato kasubago, an problema na parating nasasabatan nyato dapit sa trabaho nin pagkumbusir sa nga tawo, masasabotan nyato an dahelan kan problemang ini duman sa mga apostol o misyonaryong mismo na embes na magin puwersado sa saindang trabahong pagkukumbusir, alagad an pinapa-orog asin pinapa- aser iyo an saidang mga kaluyahan. An boot sabihon kaini iyo na, an mismong apostol o misyonaryong iyo an nagbugtak nin malean laen na kaulangan asin dahelan sa saiyang mismong trabaho nin pangubesir, kaya an resulta ito an mayo o kakulangan an saiyang mga tawong nabubutong o nakkukumbusir o naiimbitaharan na mag-atendir, Kun an paostol maluya man an saiyang pag-eslikar, o pag-paliwanag, mayo man saiyang madakop na mga tawong mailalaog niyang mga bagong miyembro kan iglesia. Kun tano ta mayyong nadadakop na mga sirao kau may nadakop man alagad sa katapusan nakudarulang man giraray, an boot sabihon kaini iyo na an trabahador  nagrarabaho na may dakul na lakuyahan sa parte niya. Iniling maluyang resultang ini kan saiyang trabaho isinimbolisar sa “pagbubuntog kan hikot sa walang parte kan baroto”.

         An proweba na may katotohanan an katukduan na ini iyo mismo an yaon sa evangelio sa satong binasa na nagsasabi na “Magdamlag na kaming nagtratrabaho, alagad mayo kaming nadakop, alagad sa tataramon mo, ibubuntog mi giraray an samunyang hikot” (Lk. 5:5). Sinabi digdi ni Simon Pedro na, “sa tataramon mo, ibubuntog mi giraray an samuyang hikot”. Arin an tataramon ni Jesus na ini? An tataramon ni Jesus iyo an “Ibubuntong nindo an saindong hikot sa toong parte kan baroto” (Jn. 21:6).

        Kan sinunod kan mga disipulo an mga tataramon na ini ni Jesus, kadakul na mga darakulang sira an saindong nadakop asin dai na sinda kaipuhan na marharyo pa pailawod kundi maski sa distansya sanang sanggatos na yarda pano-pano na ini mga sira an saindang hikot.

        An kahulugan kan mga tataramon na ini na, kun susundon sana kan apostol o misyonaryong an instruksyon ni Jesus na magtratrabaho sinda na ginagamit an entering puwersa, kahigosan asin abilidad, dakul saindang makukumbusir na mga tawo, bako sanang saradit kundi darakulang parakasala para sa Dios. Asin dai na sinda kaipuhan na magharayo pa, kundi maski sa distansya sanang sangatos na yarda dakul na sindang makukumbensir na mga tawo.