Paglobong nin Gadan

Homiliya para sa Paglobong nin Gadan

AN KALAG KAN MGA BANAL NASA MGA KAMOT NIN DIOS

(Kad. 3:1)

                “An kalag kan mga banal nasa mga kamot nin Dios, asin dai sinda mahaharanihan nin anuman na kasakitan.”

An mga kamot nin Dios iyo an nagsisimbolisar kan saiyang pagtrabaho (Apo. 13:16; 20:4; Dn. 5:5,24; Sal. 89:13,21; Is. 42:6; 49:16; 51:16-17; Ef. 4:28, 1 Co. 4:12; Kad. 5:15-16).

An seguradong tanda na yaon sag abos na trabaho nin Dios iyo an kadonongan, siring sa nasusurat:

“Saro man sana an madonong, makangurungirhat nanggad, nagtutukaw sa saiyang trono, an                 Kagurangnan. Siya mismo an naglalang sa saiya, nagbantay asin nagsisyasat saiya, asin inuula                 niya siya sag abos niyang mga trabaho tanganing mapasa-tawo bilang saiyang regalo, asin ipinapadara niya duman sa gabos na may pagkamoot saiya

                            (Sir. 1:8-10; Hil. man an Job. 28:27; Tal. 8:22m).

An kadonongan na yaon sa kalag kan gabos na mga banal iyo an dakulang tanda na yaon sinda sa mga kamot nin Dios, huli ta nabubuhay sinda na may pagkamoot  asin pagkatakot sa saiya (Sir. 1:11-20; Job. 28:28; Dt. 4:6; Tal. 1:7+; 8:13). Kun an kadonongan yaon sa kalag  nin sarong banal na tawo, kun siring, trabaho iyan nin Dios sa saiya bilang regalo. An epekto kaiyan iyo na dai siya mararanihan nin anuman na kasakitan (Tal. 13:13; Sir. 33:1; Tal. 12:21; Sal. 91:10).

Ginigibo nin kadonongan na an kalag nin sarong banal na matakot sa Dios asin makamidbid  na an dalan pasiring sa buhay iyo an pagsunod  sa Tugon asin an pagkuyog kan saiyang kabotan.

Ining mga tataramon na ini iyo an satuyang poprobaran.

An pagkakabaing kan liwanag kan saldan asin  kan kadonongan:

Mahapot kita, paano itinatao asin nakakaabot an kadonongan diyan sa kalag kan mga banal?

An simbag sa hapot na ini yaon sa kumparasyon kan liwanang saldang  asin sa kadonongan (Tal. 4:18; Qo. 7:11).

An dahon kan tinanom nangangaipo nin liwanag kan saldang tanganing mabuhay asin magbunga nin marhay.

Siring man, an kadonongan minagikan sa Dios bilang sarong liwanag na minahugpa asin minalaog sa isip kan tawo tanganing magtao saiya nin mga marhay na ideya asin gibo (Sir. 32:16).

Kun minsan , may mga bagay na dai naaabot kan sirang kan saldang. Halimbawa, kun kita minasabi, “Ihubo mo an sinablay sa libod ta yaon duman an saldang.” An katotoohan iyo na an saldang dai man minahale diyan sa saiyang kinamumugtakan sa itaas kan langit. Alagad kun minsan an init o an sirang kaini dai nakaabot sa sarong lugar nin huli ta natatahoban nin panganuron o kaya nalilindongan nin mga dahon kan kahoy, asin iba pang dahelan. Kaya hinahale nyato an sinablay sa atubangan kan harong asin ibinubugtak nyato sa libod nin huli ta an sirang kan saldang naoolang asin nalilindongan duman sa atubangan kan harong. Alagad duman sa libod, ini nakakabuwelong marhay. Kaya, yaon duman sa libod an saldang asin mayo duman sa atubangan kan harong.

Siring man kaiyan an pagdatong kan kadonongan sa katawohan. Totoong iwinawarak nin Dios an kadonongan sag abos niyang mga trabaho. Alagad, kun igwa nin mga lugarna dai inaabot kan sirang kan saldang huli sa lindong o sa ulang, siring man igwa nin mga tawo na dai inaabot kan kadonongan huli man sa mga lindong o sa mga ulang. Duman sa mga tawong may pagkamoot asin pagkatakot sa Dios, an kadonongan garo sirang kan saldang sa buwelong lugar na nakakaabot huli ta mayo nin nakakaulang o nakakalindong. An tawong iyan garo nakabantad sa liwanag asin init kan saldang nin katotoohan kan buhay. An tawong tampalasan asin parakasala na talikod asin mayong pagkatakot sa Dios, ini garo sarong lugar na dai inaabot kan sirang o liwanag kan saldang, nin huli kadakul na bagay an nakakaolang o nakakatakop sa saiyang pagkabuhay na dai siya mabuhay sa katotoohan jundi sa kadikloman (Hilnga an Rm. 13:11-14; 11:33; Ef. 1:17; Col. 1:27-28). An mga tampalasan asin mga parakasala na dai nababanaagan o naliliwanagan kan kadonongan nin Dios iyo an tawo na dai nakakamidbid kan tama sa sala, o kaya, pinapasipara an tama. Sinda mga mangmang na kaipuhan map[asala muna antes makua an tama. Alagad, an mga tawong sinsero, banal asin matanos iyo an mga tawong madonong na nakakamidbid kan tama asin may pagkatakot na makaginibo nin kasalan o nin sala. Sinasaing mga sutil sinda kan mga kapwa-tawong parakasala, alagad an pagkasutil ninda iyo nah abo nindang bayaan an katotoohan asin an tamang dalan.

An mga parakasala iyo an may kadonongan man alagad bakong gikan sa Dios an kadonongan ninda kundi gikan sa kinaban.  An kadonongan ninda iyo an dapit sa mga bagay asin mga agi-agi kaining kinaban. Iyo iyan an mahalaga para sainda, an buhay ninda digdi sa kinaban (Sir. 19:22-23). An may kabatiran sa kasalan bako iyan kadonongan nin huli ta dai nakakamidbid kan tama sa sala. Kun mayo an kadonongan, antawo pirmeng nakagakod  na materya.

An kadonongan ni Solomon:

Sarong pambihirang klase nin kadonongan an itinao nin Dios sa sarong tawo na iyo si Hadeng Solomon (1 Hde. 3:5-15).

Tanganing matesting nin Dios an kadonongan na itinao niya ki Solomon, tinawan niya siya nin sarong problemang pagsosolusyonan (1 Hde. 3:16-28).

Sarong aldaw, duwang babaeng patotot an nagdulok siya. An saro nagrereklamo na, mantang turog siya, ining ikaduwang babae nagdulok saiya asin kinua an saiyang buhay na aki asin itinibay sa saiyang buhay na aki an gadan na aki kaini. Kan magmata siya, nahiliing niya na an aki na kataid niya gadan na, mantang an aki niyang buhay kuro-karga na kan ikaduwang babae.

Mayong ibang maginibo si Solomon tanganing maarman an tunay na ina kan arin man sa duwang aki. Kaya, nagboot si Solomn na an buhay na aki bangaon sa duwang pidaso asin tawan nin tigkabaak an duwang babae. Idtong ikaduwang babae na nagkakapot kan buhay na aki nag-uyon tolos sa ideya ni Solomon asin naogma kan madangog na an buhay na aki gagadanon man. Alagad idtong enot na babae na nagrererklamo, na iyo an nagkakapot kan gadan na aki, kan madangog an pagboot kan hade nagsabi ki Hadeng Solomon na, ‘Kagurangnan ko, itao nindo sa babaeng ini an buhay na aki,a sin dai nindo siya pag-gadanon.’ Danga, nagsabi si Solomon, ‘Tawan sa enot na babaeng ini an buhay na akin in huli ta nakakasego ako na iyo ini an tunay na ina kana king buhay.’

An estoryang ini iyo an sarong demonstrasyon kun ano an nagiginibo kan kadonongan na hale sa Dios para sa sarong tawo tanganing makagibo siya kan tama asin marhay. An kadonongan na hale sa itaas igwa nin relasyon sa satong paggibo o pagtrabaho kan satong mga kamot. Kun siring maaraman kun an sarong tawo igwa nin kadonongan na hale sa Dios sa paagi kan pagsiyasat kan saiyang mga gibo-gibo sa aroaldaw niyang pagkabuhay.

Pagpatotoo kan kadonongan na yaon sa mga tawo:

Alagad, masabi kamo, ‘Bako man akong arog ki Hadeng Solomon. Ako sarong ordnaryong tawo sana. Paano ako matatawan nin arog kaining kadonongan niya?’

Siring na tinesting nin Dios si Solomon kun igwa na siya kan kdonongan na gikan saiya, testingon ta man daw kun igwa na kamo kan kadonongan na ini na hale sa Dios.

Hapot sa mga tawo. Arin an mas mahalaga sa saindo, an saindong madadara sa ikaduwnag buhay kun kamo magadan, o an saindong mawawalat?

(Sa paagi kan pagsimbag sa hapot na ini, maaaraman kan mga tawo na kaipuhan ninda asin mahalaga sa sainda na magkaigwa nin kadonongan na hale sa Dios ngonian pa sana. Kun igwa nin gusting magsimbag tolos sa hapot, puwede man na pasimbagon. Alagad, kun nahahaloy na magsimbag an mga tawo nin huli ta pinagiisipan pa ninda an simbag, puwede man na ipadagos an homiliya asin sa pagtapos na sana itao an kasimbagan).

An tunay na kadonongan nin Dios:

Si Jesukristo iyo an tunay na kadonongan nin Dios. Arin sa mga linalang nin Dios an guminikan sa langit asin buminaba sa mga tawo? An kadonongan o an Verbo (Tataramon) (Kad. 7:22-30; Tal. 8:22-31) siring sa nasusurat, “Kan ini magsabi, ‘Siya nagsakat’, ano an kahulugan kaiyan kundi na siya naghilig sagkod diyan sa mga hababang lugar kan daga? An saro na suminakat sa mga halangkaw pa sag abos na mga langit tanganing mapano an gabos na bagay mayong iba kundi iyo an saro na huminilig” (Ef. 4:9-10).

An kadonongan na ini nani-tataramon asin nani-tawo (Jn. 1:1-18; Fil. 2:6-11; Col. 1:15-20; 1 Tim. 3:16). An kadonongan na ini na iyo an Tataramon na nai-tawo iyo si Jesukristo na ipinako sa krus (Lk. 11:49; Mt. 23:34; 10:41; 13:52; 1 Co. 1:24; Rm. 16:25-271 Co. 2:1-9; Ef. 3:1-19; Rm. 11:33-36; Col. 2:2-23; Apo. 7:12; Col. 1:27-28; Ef. 1:17). Si Jesukristo iyo an Tataramon nin Dios asin an tinapay na gikan sa langit na itinao nin Dios tanganing kakanon nin tawo (Dt. 8:3; Mt. 4:3; Jn. 6:29-40), tanganing mabuhay sa paagi kan pag-otob kan mga kabotan nin Dios, na iyo an mga katukdoan, adal asin mga katugonan nin Dios.

Bilang kadonongan asin tataramon nin Dios na naggikan sa langit (Jn. 8:23) asin buminaba sa  daga, siya iyo man an nagsakat giraray sa langit pagkatapus na siya magadan (Rm. 10:5-10; Col. 3:1-4; Jn. 3:13; 20:17+; Tal. 30:4; Is. 40:12). Siya nagbalik giraray sa itaas kan langit na saiyang hinalean (Ef. 4:8-10).

An tataramon ni Jesukristo gabos katotoohan, asin seguradong nagpapamidbid sa tawo kan tama asin kun arin an sala, sirin g sa nasusurat, “An kadonongan yaon na entero sa pagkatakot sa Kagurangnan, asin an kadonongan entering binibilog kan pag-otob kan mga Katugonan. Alagad an pagkaaram sa karatan iyan bakong kadonongan, asin mayo nin madunong na hatol sa mga hulit kan mga parakasala. Igwa nin katusuhan na sala, siya na mayo nin kadonongan iyo an sarong mangmang” (Sir. 19:20-24; Hil. Man an Jn. 8:31-32,40; 17:17-19).

An kaligtasan kan kalag nin tawo:

An tawo binibilog nin tolong arte: an hawak na pisikal (material), an espiritu, asin an kalag (Gn. 2:7; 1 Co. 15:44-45; 1 Tes. 5:23; Heb. 4:12; Jn. 3:6; Stgo. 2:26).

An hawak na laman dai kaipuhan na iligtas (Qo. 12:7; 3:20-21+; Sal. 104:29; 146:4; Gn. 2:7; 3:19; Jb. 34:15; 14:10; Tal. 15:24; Si. 16:29; 17:1), kundi hubaon (Col. 2:11;  Rm. 2:25-29; Ph. 3:3). An laman asin dugo nagiisip sana nin pagkakasala (Sir. 17:31; Gn. 6:5; 8:21; Jb. 15:14-16; Jn. 3:5-6; 6:63; 1 Co. 15:50; Rm. 8:10; Kad. 9:15). An hawak ibinabaing sa temple nin Dios na marurumpag (Kad. 9:8-9; Jn. 2:21; 1 Co. 3:17; 2 Co. 6:16; Rf. 2:22).

An espiritu dai man kaipuhan na iligtas nin huli ta, bilang sarong elementong gikan sa Dios, ini direktang mabalik sa Dios sa oras kan pagkagadan kan tawo (Qo. 12:7; Gn. 2:7; Kad. 9:17; 7:3; Jb. 33:4; 27:3).

An kalag nin tawo iyo sana an nangangaipong iligtas (Lk. 21:19; 9:25; Heb. 6:19; 10:19; 1 P. 1:9) sa kamangmangan.

Sa oras nin pagkagadan, an kalag kaipuhan na magpili kun saen siya maiba, kun sa hawak na mabalik sa daga tanganing matunaw, o kun sa espiritu na mabalik sa Dios (Sal. 49).

Kaipuhan na tubuson nin Dios an saimong kalag sa kasalan asin sa kastigo (Sal. 49:15; Tal. 11:4; Ezk. 7:19; Heb. 9:27-28; 1 Tim. 2:5; Heb. 3:1; 8:6). Sa momentong ini nin pagkagadan, makakaligtas an kalag kun mapili niya an tamang pagkikiibanhan. Mantang buhay pa siya digdi sa daga, dapat maaraman na niya an pagpili kan tamang pakikiibanhan, kun an buhay kan laman o an buhay kan espiritu (Rm. 8:9-11; 1 Co. 2:14-16), tanganing sa momento nin pagkagadan insigidang pipilion kan kalag an pag-iba sa espiritung pabalik sa Dios (Jn. 3:5-6; Gal. 6:8; Ef. 4:22-24).

Dai sinda mararanihan nin anuman na kasakitan:

An kalag kan mga banal dai nararanihan nin anuman na kasakitan nin huli ta nabubuhay sinda na may kadonongan na gikan sa Dios, na takot sinda na magkasala o magharani sa pagkakasala. Kaya mayong karatan an minaharani sa sainda. Kun kaya, dai sinda natatakot sa anuman na kasakitan o kararatan nin huli ta iyan minaharayo sa sainda. Maski nasa palibot niya an gabos na klase nin kararatan digdi sa kinaban, ini dai niya mati nin huli ta panu-pano nin kadonongan an saiyang kaisipan (Sal. 15:1-3)

Huli kan kadonongan, na iyo an regalo nin pagtubod na itinao nin Dios sa sainda, nabubuhay sinda sa bilog nindang pagkabuhay sa pagtubd sa Dios asin pagkuyog kan saiyang tataramon (katugonan, panuga, mga adal o katukdoan, asin mga patanid o pagsaway), kaya nakakaginibo sinda nin mga marhay na gibo na inaako sa Dios bilang katanosan para sa saiya (Gn. 4:3m.; Heb. 11:4; 1 Jn. 3:12; 2 Co. 4:13; Ef. 4:28; Sir. 32:16; Apo. 14:13; Ef. 2:10; Sal. 15).