Ano an Katotoohan - Kristo rey

HOMILIYA PARA SA PINAKAULTIMONG DOMINGO KAN TAON  - (Kristo Rey)

Jn. 18:33-40

“Ano an katotoohan?” - Jn. 18:38

Hapot ini ni Pilato. Gusto ni Pilato na maaraman sa paagi ni Jesukristo kun ano an totoo. Si Pilato saro man sana sa kadakul na tawo ngonian na nariribongan kun arin an totoo asin kun arin an putik. Kaya, naghapot siya ki Jesukristo, na mayo lamang nin pag-alangan, “Ano an totoo?”

Dakul na mg atawo an nagsasabi na sinda an totoo, n asinda an tama, asin kun siring sinda an dapat na paniwalaan o tubodon nyato, o kampihan nyato. Alagad, kapareho ni Pilato na naghahanap nin sarong seguradong paagi kun paano niya maaaraman kun arin  an totoo asin kun ariin an bako, kita man naghahanap nin sarong segurandong batayan kun paano ta maaaraman kun arin an totoo asin kun arin an putik.

Sa sarong parte kan evangelio ni San Juan, sa kapitulong sinusundan kan presenting kapitulong kinuahan nyato kan evangeliong ini na binasa nyato, uya an sinasabi ni Jesukristo dapit sa katotoohan: “Ama, pakabanala sinda sa katotoohan; an tataramon mo iyo an katotoohan” (Jn. 17:17).

Malinaw digi sa sinasabing ini ni Jesukristo kun arin asin kun paano kita makaseseguro na an sarong bagay o tataramon totoo asin bako. An tataramon nin Dios sana an totoo. Kun an sarong bagay bakong sa Dios, kun siring putik iyan. Kun an sarong tawo bako man na sa Dios, putikon man iyan. Asin kun an sarong tataramon bako man na sa Dios, o hale sa Dios, an tatarmoan na iyan bako man na totoo.

May basehan daw kita sa ibang parte kan Bibliya na ining sinasabi nyato sa itaas totoo o bako?

Sa libro kan mga Bilang, uya an sinasabi ni profeta Balaam: “An Dios bakong arog sa sarong tawo na putikon, bakong arog sa sarong akin i Adan na minasibog sa saiyang itinaram. Ugali daw niya na magsabi asin dai mag-otob, na magtaram asin dai maggibo?” (Bilang 22:19).

Malinaw man digdi sa pahayag na ini kan BIbliya na an Dios sana an bakong putikon. Kun siring, an tawo, nin huli ta bako man siyang Dios, siya putikon. Kun kaya, kun gusto nyato na makaseguro na an sarong bagay pirmeng totoo, dapat makaseguro kita na iyan hale sa Dios asin bakong hale sa tawo sana. Kun gusto nyato na makaseguro na an sarong tataramon totoo, dapat na makaseguro man kita na iyan talagang tataramon nin Dios asin bakong tataramon nin tawo sana.

Makaseseguro kita na tataramon nin Dios an itinataram asin itinutukdo kan sarong paratukdoa nin relihiyon kun an mga tataramon na sinasabi o itinutukdo niya bilang adal iyo  an gikan sa Bibliya o Banal na Kasuratan.

Delikado asin peligroso an satuyang pagtubod kun madangog sana kita sa tukdo nin sarong paratukdo nin relihiyon na gikan sana sa sadiri niyang tataramon, nin huli ta tawo man sana siya asin kun siring sakop siya sa sinasabi kan Kasuratan na an gabos na tawo putikon. Anong malay ta kun nanloloko, nandadaya asin nangunguwarta sana  siya sato? Kaya, peligroso kita kun matood kita na mag-adal hale sa mga tataramon na dai ipinasurat nin Dios sa Bibliya. Dapat seguruhon nyato an gabos nyatong ginigibo, isinasabi o ibinabayad hale sa tataramon nin Dios, o nakasurat sa Bibliya, tanganing makaseguro kitang katotoohan o totoo iyan.

Nin huli kan kainosentehan nyato sa Bibliya, kaya kun minsan naloloko kita nin kapwa tawo. Kun minsan, kita mismo an nakakadaya sa stong kapwa tawo, nin huli ta natood na kita sa pagparadangog sa putik, na gikan sana sa mga tataramon nin tawo asin bako an tataramon nin Dios.

An pag-adal ta kan Bibliya suro-Sabadong banggi yaon sa tamang direksyon pasiring sa pagkaaram nyato kan katotoohan sa buhay na ini. Seguro masabi kita na an pakaaram sa Bibloiya dai man madara sato sa kayamanan o sa pagigin sikat o matao sato nin kuwarta. Totoo seguro iyan. Alagad, kun makanood kita na magsarig sa tataramon nin Dios na nakasurat, seguro dai man makaka-hacer an mga nanlolokong nangunguwarta sa sato na makapagloko asin makadaya sa sato nin huli ta buklat an satong duwang mata asin bako kitang mga pikit sa katotoohan.

Kun siring, an sabi ni PIlato, “Ano an katotoohan?”

An tataramon ni Dios sana iyo an katotoohan, asin a totoo. An tataramon nin tawo bakong segurado an pagkatotoo, maski pa ngani an sarong tawo inaapod na onorable, nin huli ta an tawo putikon.

An tataramon nin Dios na ini iyo mismo si Jesukristo, nin huli ta siya iyo an “logos” o an kadonongan na gikan sa Dios bago pa lalangon an tawo asin an kinaban. “An tataramon yaon sa kapinunan, an Tataramon yaon na sa Dios, asin an Tataramon Dios” (Jn. 1:1). An Tataramon na ini na Dios man, nani-tawo sa kabotan kan Dios Ama tanganing magtubos kan tawo sa kasalan. “Asin an Tataramon nagsa-laman, asin nabuhay sa tahaw nyato” (Jn. 1:14). An nagsalaman na Tataramon nin Dios na sinasabi sa evangelio na nanitawong kapareho nyato iyo si Jesukristo sa laman. Kun siring, bako man sana siyang tawo na arog sato kundi may kamugtakan siyang diosnon na saiyang honalaen antes siyang magin tawo. “Diosnon an saiyang kamugtakan, alagad hinuba niya an saiyang pakikipantay sa Dios asin iginubong niya an kamugtakan nin sarong oripon asin nagin siring sa mga tawo” (Fil. 2:6-7). Sa paagi kan paggubing niya kan satong kamugtakan bilang tawo, ginadan niya an saiyang pagka-laman asin ipinako iyan sa krus, tanganing iligtas an gabos na tawo na sagkod ngonian nabubuhay sa kapangyarihan kan laman, na magin mga akin nin Dios na nabubuhay sa banal na espiritu nin Dios na arog ki Jesukristo.

Kan mabuhay liwat si Jesukristo sa mga gadan, natural na magbalik siya sa langitnon na Ama, asin balikan giraray niya an dati niyang kamugtakan bilang Dios duman sa kalangitan. Binalikan niya giraray an saiyang pagigin tataramon nin Dios. Ano an kamugtakan kan tataramon nin Dios duman sa kamurawayan nin langit?

An kamugtakan kan Tataramon nin Dios duman sa kamurawayan nin langit iyo na siya an “Hade kan mga Hade’ asin Kagurangnan kan mga kagurangnan” (Apo. 19:11-21).

Kun siring, tama an an sabi ni Jesukristo ki Pilato na inako niya an saiyang pagigin hade, asin totoo an sinasabi niyang igwa siya nin kahadean. Alagad, an saiyang pagigin hade asin an saiyang kahadean mayo digdi sa kinaban na ini kun saen ini pinapamahalaan nin mg atawong putikon na arog ki Pilato asinb kan gabos na mga kalaban ni Jesukristo.

Nin huli ta si Jesukristo iyo an Tataramon nin Dios, siya Hade kan mga hade asin Kagurangnan kan mga kagurangnan. An saiyang pagkahade iyo an pagigin totoo asi an saiyang kahadean iyo an katotoohan. Kun siring, an gabos na tawong totoo, iyan an mga kabala sa kahadean ni Jesukristo na iyo an Tataramon nin Dios, an logos na nagsalaman asin ngonian iyo an Hade kan mga hade na satuyang pinaghahalat na madatong sa pag-abot kan panahon tanganing punan na niya an paghade sa mga banal sa laog nin sangribong taon, bago magdatong an Huring Paghulom (1 Tes. 4:13-19; Apo. 20:1-15).

An mga patotoong ini kan Bibliya dapit sa katotoohan minakumbensir sa sato na yaon na sa atubangan ni Pilato an hinahanap niyang kasimbagan sa saiyang hapot na “ano an katotoohan?” An katotoohan na iyan iyo mismo si Jesukristo. Gustong sabihon ni Jesukristo ki Pilato na, “Tano ta dai mo pinapaniwalaan an mga sinasabi ko saimo? Ining gabos na sinasabi ko saimo iyo an totoo, asin an mga sinasabi kan mga Judiong lider laban sako ini gabos putik.” Alagad, gustong paniwalaan ni PIlato an kaputikan, kaya kinampihan niya an mga sumbong kan mga kalaban ni Jesukristo nin huli ta sinda mga arog man ni Pilato na mga lider kan banwaan asin sinda gabos putikon.

Sa pangyayaring ini, na si Jesukristo nagpasakop sa kapangyarihan kan mga putikon asin itinao niya an saiyang sadiri sa pag-ako kan kagadanan sa krus, pinaglinaw sa sato ni Jesukristo na an gabos na tawong minakampi saiya asin sa saiyang mga katukdoan, iyan an mga tawong minakampi sa katotoohan. Sinda an mga tawong saiyang pinaghahadean, nin huli ta hade siya nin katotoohan asin an saiyang kahadean iyo an katotoohan.

An gabos na nasa luwas kan saiyang kahadean iyo an mga putikon asin mga paragadan nin kapwa tawo. Kun si Jesukristo ginadan huli sa katotoohan, dapat man na an saiyang parasunod asin an mg amiyembro kan saiyang kahadean nin katotoohan pirmeng hande na magpagadan para sa katotoohan alang-alang kan kaligtasan nin kapwa-tawo.

Kaya, bilang sarong aplikasyon kana dal na ini para sa satuyang pang-aro-aldaw na pagkabuhay, tama ditong nadangog nyato na sinabi kasubago kan sarong tugang nyato na an gabos na grupo nin mga tawo may kakundian, may mga maraot na ugali asin may mga problema. Kun mabale kita sa arin man na grupo na an satuyang katuyuhan iyo an magsunod sana sa uso asin bakoman sa tunay na pagbabago kan satuyang buahy, kun siring inutil asin saying an gabos na ginigibo nyato sa laog kan grupong iyan. Kun kita naghahanap kan totoo, dapat mag-igot kitang hanapon iyan sa Dios asin bakong sa motibasyon asin interes na sa tawo sana tanganing magdanay kita sa arin man na grupo na satuyang kabilangan o balihan. Ta kun sagkod sana an satuyang motibasyon o interes, kapag magluwas na sa sarong grupo an mga kakundian, kaluyahan, pagkakasala nin mg amiyembro, iyan an makakapadisganar sa sato na magpadagos na mag-atendir nin mga pagtiripon kan grupo asin padagos nang dai na magpahiling-hiling pa sa grupo. Kun kita nagkakatiripon, an satuyang konsiderasyon asin dapat na hanapon iyo an Dios, nin huli ta an Dios nakakaseguro kitang dai siya maputik o madaya sa sato,kundi siya an matukdo sa sato dapit sa katotoohan nin buhay. Iyan katotoohan na iyan iyo an mahamis na bunga kan presensya nin Espiritu Santo diyan sa laog kan satuyang aro-aldaw na pagbuhay-buhay sa laog kan satuyang mga harong, o opisinang pinagtatrabahohan, o mga negosyong pinag-aatendiran.

Kun arog kaini an satuyang pagmamawoton na otobon asin gibuhon sa satuyang mga pagtiripon, totoong makakaseguro kita na tunay man nanggad na si Jesukristo asin kita mga miyembro kan saiyang kahadean.