Disyerto - Ika-2ng Domingo kan Adbiyento (Cycle B)

Homiliya para sa Ikaduwang Domingo kan Adbiyento

“Sarong tingog an nagkukurahaw sa langtad: andama an sarong dalan para sa Kagurangnan, tanosa an saiyang aagihan” (Mk. 1:3)

                Tano ta sa langtad o disyerto pamadadangog an tingog ni Juan Bautista, nagkukurahaw na “Andama an sarong dalan para sa Kagurangnan”?

                Tano ta bako siya magkurahaw sa laog kan sarong marangyang Templo, o kaya sa sarong sinagoga, sa kalye o plasa o sa saodan nin sarong syudad na pirmeng tinatawo? Tano ta disyerto o langtad?

                Sa Bibliya, an langtad o disyerto iyo an sarong espesyal na lugar kun saen ginigibo ni Dios an saiyang mga mahalagang trabaho o kaya magpa-abot kan saiyang mahalagang mensahe.

                Uya an mga instansya:

1.       Dinara nin Dios si Abram asin an bilog nyang pamilya sa disyerto kan Haran, asin duman tinaraman siya na “Bayae an saimong nasyon asin an saimong pamilya asin pumaduman ka sa daga na ipapahiling ko saimo” (Gn. 11:31; 12:1; Gibo 7:2-3).

2.       Nakaresibi si MOises nin mensahe hale sa Dios duman sa kalngatadan kan Horeb asin nakipag-olay an Dios saiya duman sa disyerto tanganing duman magdolot nin pagsamba ki Yahweh (Ex. 3:18). Nangyari an Exodo kan mga Israelita sa disyerto paghale sa Ehipto pasiring sa Dagang Panuga, asin nagerok an mga Israelita duman sa laog nin kuwarentang taon (Jos. 24:7), itinao duman an katugonan asin ipinundar an primerong Iglesia sa disyerto (Gibo 7:38; Dt. 4:10; 9:10).

3.       Pinagtentaran si Jesukristo kan Diyablo duman sa disyerto sa laog nin kuwarentang aldaw (Mt. 4; Mk. 1:12-13; Lk. 4). Naghulit si Jesukristo sa mga pangpang kan danaw (Mt. 4:13) asin salog (Mt. 19:1), sa mga sinagoga kan burobanwa asin mga baryo (Mt. 4:23; 9:35), mg alugar na apartado (Mt. 14:13) asin sa mga disyerto (Mt. 16:1), asin iba pa.

4.       An babae na nhihiling ni Juan Apostol sa sarong bisyon sa langit (Apo. 12:1) duminulag sa disyerto (Apo. 12:14).

 Tano ta disyerto an pinipiling lugar nin Dios para sa saiyang mga mahalagang mensahe asin trabaho sa tawo?

An tataramon nin Dios mayong lugar sa laog kan natural na relihiyon kun saen an mga marahay na gibo nin tawo iyo an nagmamayor kundi sa lugar na mga depisil asin abandonando nin tawo kun saen an pagtubod asin pagtiwala sa Dios na dai nahihihling iyo an pinapamayor. Kun siring, sa lugar na disyerto an tawo nakakanumpong nin tunat na pagtubod.

Magpoon ki Abraham, an ama sa pagtubod, sagkod sa pinakahuring panahon kan tunay na Iglesia o komunidad nin Dios digdi sa daga, an inagi-agi kan kasaysayan kaini iyo an kasaysayan nin pagtubod. Durodiretsong linea ini nin kasaysayan magpoon 1850 B.C. sagkod sa presente. Kun minsan an kasaysayan na ini minatagilid nn huli ta nasasalaky nin matural na pagkareliyoso, arog kan panahon kan Judaismo na iyo an panahon na inabotan ni Juan Bautista asin ni Jesukristo.

Kun tano ta an paghulit asin pagtukdo ni Juan Bautista sa mga tawo nangyari o ginibo niya sa disyerto iyo ta an katuyuhan niya iyo an pag-andam nin sarong dalan tanganing matawan nin lugar na an komunidad o iglesia o asembleya sa disyerto na ipinundar ni Moises  kaidto ikapatindog giraray. An pagpatindog kan asembleya o iglesiang ini nin Dios sa disyerto iyo an ginibo ni Jesukristo (Mt. 16) kan sinabi niya na “Ika, si Pedro, asin sa gapong ini papatindogon ko an sakong Iglesia” (Mt. 16:17). An trabaho ni Juan Bautista iyo an pag-andam sana kan sarong dalan na ini sa disyerto para sa pagdatong kan panahon ni Jesukristo. An bunga kan trabahong ini ni Juan Bautista asin Jesukristo iyo an pagbangon kan nakatumbang Iglesia nin Dios nin huli ta an tunay na pagtubod na Pinatubo asin inataman duman sa disyerto nasalakan asin nasalakay kan natural na relihiyon.

Kamo man, tano ta yaon kamo nagtititripon digdi sa mga harong-harong asin sa mg alugar na gilid-gilid, embes na sa mga darakulang katedral, basilica, simbahan, eskuwelahan, seminary, asin iba pa?

An simbag iyo nin huli ta naghahanap kamo nin tunay na pagtubod.

An tunay na kristyanong pagtubod asin an mga seguradong tanda kaiyan dai nindo nahihiling sa laog kan presenteng Iglesia, nin huli ta kan taon 316 A.D. nasalakay man iyan kan natural na relihiyon. An resulta kan pagsalakay na iyan sa iglesiang pinundar sa pagtubod ni Jesukristo, na iyo an relihiyon para sa B.T., kan natural na relihiyon sa instigasyon o ideya kan Romanong Emperador kaidto iyo an Iglesia Konstantina. An Iglesia Konstantinang ini nagmundag kan duwang magkasuhay na iglesia na iyo an Iglesia Katolika Romana sa sulnupan asin an Iglesiang Ortodoks sa subangan. An enot na nasambit na iglesia sa duwang ini iyo an nagimatan tang iglesia na nagdara sa sato sa Romanong pagtubod.

Mayo man kitang maraot na sinsabi dapit sa iglesiang nagimatan nyato na iyo an sanga kan Iglesia Konstantina na nakagubing nin natural na pagkarelihiyoso apwera sana na dai nyato haros mahiling an mga buhay na tanda kan tunay na pagtubod sa Dios nin huli kan mahibog na suson nin natural na pagkarelihiyoso na nakatakop digdi.

Kan 1964, an Iglesia Katolika Romana nangapodan para sa sarong repormang pangrelihiyon tanganing  makabalik an iglesia sa panahon kan enot na kristyanong Iglesia na yaon sa Bagong Tipan. An pangangapodan na ini ipinaagi asin ipinaotob sa paagi kan Konsilyo Vaticano II. An mayor na pangangapodan kan Konsilyong ini iyo, na tanganing mahiling na an Iglesia nakabalik na tunay sa Iglesia kan Bagong Tipan, iyo an Ekumenismo. Sa madaling pagtaram, an ekumenismo iyo an pagkasarao kan dating magkaribal asin magkasuhay na iglesia kristyana na iyo an Iglesia Katolika Romana sa sulnupan asin an Iglesia Ortodoks sa subangan na magin sasaro sanang iglesia kristyana. Ining Iglesia kristyana iyo an iglesia kan mga apostol ni Jesukristo na ipinaundar ni Jesukristo mismo na pinag-andam ni Juan Bautista sa disyerto.

                Kun siring, an iglesiang pinapangapodan kan Konsilyo Vaticano II para sa modernong panahon nyato iyo mismo an iglesia sa disyerto na gikan pa ki Abraham kan taon 1850 B.C. Tanganing ikapundar an siring na iglesia, kaipuhan na balikan nyato an disyerto kun saen an iglesia enot na ipinundar asin padagos na inaataman sagkod na mangyari an hula ni Apostol Juan sa Apokalipsis na an Babae aatamanon duman  sa disyerto sagkod sa katapusan kan panahon.

                Iyo ini mga tugang an rason kun tano ta an pangapodan sa sato kan evangelio ngonian iyo na dangogon nyato an tingog ni Juan Bautista duman sa disyerto, nin huli ta an hinahanap nyatong tunay na pagtubod yaon sana makukua sa lugar nin disyerto.