Homiliya para sa Kapiyestahan kan Pagbautismo sa Kagurangnan
(para sa mga miyembro kan ME Bible Study Group)
Seryeng hale sa “Mga Paghorop-horop asin Katukdoan sa Disyerto”
Base sa Jn. 2:1-12
“Mayo na sinda nin arak” - (Jn. 2:3)
An estorya kan kasal sa Cana iyo an saro sa mga estorya nin pagkasal na yaon sa Bibliya. An saro pang estorya iyo idtong makukua sa Tobit 7-10.
An estoryang piyestang pangkasal sa Cana nagdadara sato nin sarong mahalagang katurkdoan o doktrinia ni Jesukristo dapit sa kristyanong pag-inaragoman mantang idiniepikto kaini an sarong mahalagang regalo ni jesukristo para sa mag-agom na bagong kasal sa paagi nin pakikilabot niya sa saindang mga problema.
Ano daw an kahulugan kan primerong milagrong ginibo ni Jesus sa kapinunan kan saiyang misyon para duman sa bagong kinasal sa Cana asin para man sa satuya ngonian na panahon?
An relasyon nin mag-agom puwedeng masilag digdi sa duwang simbolong ini kan tubig asin arak sa paagi kan ginibong milagro ni Jesukristo kan ginibo niyang arak an tubig.
An sabi sa evangeliong binasa iyo na “Mayo na sinda nin arak” (Jn. 2:3). Para sa sarong okasyon nin pagkasal, an pagkawara o pagkaubos nin arak sa tahaw nin kapiyestahan, ini sarong trahedya o distroso, nin huli ta an tanda nin sarong marhay na piyesta iyo an mayong patod na kaogmahan asin kagaya-gayahan nin mga bisita na ipinapahiling sa abundang pagbulos kan managom na arak para sa kagduenyo asin sa gabos na bisita.
An Punsyon Pangkasal sa Kahadean nin Dios
An kahadean nin Dios ibinabaing ni Jesukristo sa sarong dakulang punsyon nin kasal (Hil. Tal. 9:1-6; Mt. 22:1-14; Lk. 14:16-24).
An sabi ni Jesukristo: “Sinasabi ko saindo, magpoon ngonian dai na ako mainom ni arak sagkod sa aldaw na mag-inom ako kaiba nindo nin bagong arak sa kahadean nin sakong Ama” (Mt. 26:29).
Ining punsyon sa kasal saro man ining klase nin piyesta. An piyesta bakong kumpleto asin dai puwedeng apodon na piyesta kun mayo nin arak. Kaya sinabi man ni Jesus na “Sinasabi ko saindo na dakul an madatong hale s subangan asin sa sulnupan tanganing magtukaw sa kahadean nin langit kaiba ni Abraham asin ni Isaaak asin ni Jacob s sarong kapiyestahan” (Mt. 8:11).
Sa pagdatong kan panahon, mangyayari an sarong dakulang piyestang pangkasal sa langit, kun saen magkakaigwa nin dakulang kaogmahan asin kagaya-gayahan: “Mag-orogma asin maggaya-gaya kita asin magtao nin kaomawan sa Dios, nin huli ta iyo ini an panahon para sa kasal kan Kordero. Handan a an saiyang nobya, asin siya nakagubing nin makintab na lining puti, huli ta an saiyang lining trahe nahaman hale sa mga marhay na gibo kan mga santo” (Apo. 19:7-8; Hil. Man an Apo. 21:2).
An Interbensyon ni Maria asin ni Jesus sa Cana
An kaogmahan asin kagaya-gayahan na ini na dapat mamatean kan gabos na bisita sa sarong punsyon o piyestang pangkasal isinisimbolisar sa libreng pagbulos kan managom na arak nin huli ta an kasal saro man na klase nin piyesta, asin ta an piyesta bakong kumpleto kun mayo nin masiram na arak. An sarong punsyon nin kasal na maubosan nin arak, ini sarong trahdeya para sa kagduwenyo asin sa mga bisita. An boot sabihon kan pangyayaring ini kan pagkaubos kan arak iyo an katapusan kan gabos na kaogmahan asin kan mismong piyesta, asin ta an mga bisita mapuruling bitin an kaogmahan.
Digdi nyato masasabotan an pagkasibot ni Maria, an ina ni Jesus, na makatabang sa pagremedyo tolos kan arog kaining sitwasyon. Aram ni Maria an dakulang kasusupgan na inaabot kan kagduwenyo asin kan nobyo. Dara nin dakulang pagmalasakit sa boot asin aram niya an kakayahan ni Jesus sa mga arog kaining problema, nagsabi si Maria sa saiyang akin a, “Mayo na sinda nin arak” (Jn. 2:3).
An pagdulok na ini ni Maria ki Jesus tanganing magsabi na mayo na sinda nin arak, ini sarong pagpahayag ni Maria kan saiyang ebalwasyon kan sitwasyon tanganing kun igwang naiisip na solusyon si Jesukristo, iyan magibo niya na. Dai man sinusunsunan ni Maria si Jesus na magmilagro o kaya maghagad saiya nin pabor o biyaya, siring kan pag-interpretar kan iba dapit sa pagdulok na ini ni Maria ki Jesukristo tanganing sabihan siya na mayo na sinda nin arak.
Para sa ibang mga tawong ini, si Maria daa makusog asin epektibong intersesor para ki Jesus, nin huli ta kada hagad o pangangayo-ngayo daa ni Maria dinadangog ni Jesukristo na arog kan nangyari duman sa kasal sa Cana. Mala ta binansagan pa ngani ninda si Maria bilang tulay o tagapag-ultanan (mediatrix) daa ninda pasiring ki Jesukristo.
Kun baga, si Maria iyo an sarong tulay nin huli ta si Jesus iyo sana an tunay na tulay (mediator) nin tawo pasiring sa Dios (1 Tim. 2:5; Heb. 8:6; 9:15; 12:24; 1 Jn. 2:1). Kun si Maria saro man na tulay (mediatrix), asin si Jesukristo tulay man (mediator) asin si Maria iyo an tulay pasiring ki Jesus na saro man na tulay, kun siring ining sasarong totoong tulay tinulayan man. An resulta kaini iyo, enot, na puwedeng an tulay na ibinugtak nin Dios mismo pasiring sa tawo tibaad putol o naputol na dai nakaabot sa tawo. O kaya, an ikaduwang implikasyon iyo na an primerong tulay puwedeng raot, kaya kaipuhan an ikaduwang tulay.
Kun arog kaini an kamugtakan kan satuyang tulay pasiring sa Dios, sosog sa iniisip kan mga tawong ini na nag-aapod ki Maria bilang tagapag-ultanan ninda pasiring ki Jesukristo, puwedeng maabala kita sa satuyang pagbiyahe pasiring sa Dios.
Sa insienteng ini duman sa kasal sa Cana, mayo man hinagad o ipinakemaherak na pabor o grasya si Maria ki Jesukristo tanganing ta siya bilang tagapag-ultanan nyatosa Kagurangnan, asin ta dai man kaipuhan ni Jesukristo, sa totoo lang, nin saro pang tagapag-ultanan o nin saro pang parahagad para satuya.
Sa pangyayaring ini sa Cana, dai man talaga naghagad si Mariaki Jesus na magmilagro kan paggibo kan arak sa tubig, sa dahelan na si Maria asin si Jesukristo, kaiba an iba pang mga bagong recruit na disipulo ni Jesus, gabos mga bisita man sana duman. Si Maria bako man kadugo o may relasyon sa mga kinasal, na puwede siyang makilabot asin makimaherak para sa saindang problema. Kaya, bakong tama para sa sato na mag-isip na naghagad si Maria ki Jesus nin sarong pabor para sa mga bagong kasal na mag-agom, huli ta dai man iyan puwedeng gibuhon ni Maria.
Kaya ngani, kan magdulok si Maria ki Jesus tanganing magsabi na mayo nan in arak, naintiyendihan asin iginalang ni Jesus an dakulang pagmalasakit ni Maria para sa mga kagsibot. Inaako man ni Jesus na kaipuhan niyang tabangan na masolusyonan tolos an problemang ini. Alagad, sindang duwa dai nagkauyon dapit sap unto-de-vista kun siisay an dapat tabangan. Dapat dawn a tabangan an mga bagong kasal na mag-agom, o an mga tawong bisita?
An duwang punto-de-vistang magkaiba ni Jesus asin Maria
An problema kan pagkaubos kan arak duman sa kasal sa Cana iyo an problema kan gabos na tawo duman naturalmente. Maski ngani seguro dai pa aram kan mga bisita na mayo nan in arak, alagad apektado man sinda. Alagad, an punto-de-vista kun siisay an mga tawo duman na dapat na tabangan huli kaining problema, sa parte ni Jesukristo, an gusto niyang tabangan iyo an bagong kasal na mag-agom.
Kaya, kan magdulok saiyan an saiyang ina tanganing magsabi na, “Mayo na sinda nin arak” (Jn. 2:3), an sabi ni Jesukristo sa saiya iyto na “Babae, tano ta ako an sinasabihan mo kaiyan? Dai pa uminabot an sakuyang oras” (Jn. 2:4).
Sa kiisay na oras o panahon an dai na nag-aabot? Sa Dios dawn a oras an dai pa mina-abot? O, an oras daw ni Jesukristo? O, an oras dawn i ibang tawo?
Siyempre, masabi kita na an oras ni Jesukristo an dai pa minaabot. Alagad, arin na oras ni Jesukristo an dai pa minaabot?
An boot ipaintiyende sa sato ni Jesukristo sa paagi kan mga tataramon niyang ini iyo na dai pa oras na maginterbenir o makilabot sa mga problema kan bagong kasal na mag-agom na ini. An pangyayaring ini, na maubosan nin arak an saindang kasibotan, ini primero pa sana nindang problemasa buhay ninda bilang mag-agom. Kadakul pang ibang problema, saradit o darakula man, an maarabot sa mag-agom na ini. Seguro, kun igwa na sinda nin mga darakulang problema o krisis sa saindang buhay, saka na sinda makakagiromdom sa Dios sa paghagad nin tabang o interbensyon. Kaya ngonian na an problema ninda iyo an pagkaubos kan arak pa man sana, seguro dai ninda namamateng apektado sinda. Sa paghona ninda seguro, iyo an problema ini kan saindang mga magurang na iyo an kaglalaki sa kasal na ini. Seguro nagiisip an mag-agom na ini na marhay man nganing ubos na an arak tanganing magpuruli nan in amay an mga bisita tanganing makapoon na an saindang “honeymoon”.
An oras na hinahalat ni Jesukristo na mag-abot iyo an oras na an mismong mag-agom na ini na bagong kasal pa sana iyo an magdulok saiya, tanganing maghagad nin tabang o interbensyon ni Jesukristo sa ngaran nin pagtubod asin pagtiwala sa saiya bilang Mesias asin Dios. Kun umabot an oras na iyan, saka pa sana si Jeukristo mahiro tanganing maggibo kan milagro na maggibo nin arak hale sa tubig.
Kun siring mahalaga an oras na pinaghahalat ni Jesukristo na mag-abot. Aktuwalmente, an oras na iyan na magpahiling kan tanda nin pagtubod ki Jesukristo an mag-agom na ini, iyo an oras kan pagdatong kan pagkahiling kan mag-agom na ini kan kaligtasan asin kan kamurawayan mismo nin Dios (Jn. 7:6, 30; 8:20; 12:23). Kun umabot na an oras na ini digdi sa mag-agom na bagong kasal, saka pa sana si Jesukristo mapamidbid duman sa mga tawong bisita sa kasal na siya iyo an Kadonngan asin an tataramon ni Dios na nagsa-laman, asin may kapangyarihan siya na magmilagro tanganing patotoohan niya sa paagi nin mga tanda na siya totoo asin tunay na profeta nin Dios.
Iyo kutanan ini an gusting paluwason ni Jesus, kan siya nagsabi: ‘Babae, tano ta ako an sinasabihan mo kaiyan. Dai pa uminabot an sakuyang oras.’ An boot sabihon kaini iyo na, dai pa oras ni Jesukristo na makilabot o maginterbenir sa problema o krisis kan mag-agom na ini, nin huli ta mayo pang nahihiling na tanda nin pagtubod hale sa mag-agom na ini na sinda mismo an makimaherak, mamibi asin magdulok ki Jesukristo tanganing magpatabang sa saindang presenteng problema, kaya dai pa man oras ni Jesukristo na magpahiling sa sainda kan milagro, o tanda, nin kaligtasan na hale mismo sa Dios. Seguro, para sa mag-agom na ini, an oras na madulok sinda sa Dios tanganing magpatabang iyo an panahon na gipiot na gipit na sinda huli kan mga problema o krisis sa buhay ninda bilang mag-agom. O, seguro kun madali na sinda magsuruhay, o magadan an saindang pamilya, saka na lang sinda mahagad nin kaligtasan nin Dios, kun umabot pa man nanggad an oras na iyan.
Alagad, kun tano ta naginibo ni Jesukristo an pagmilagro kan tubig na nagin arak iyo na isina-alang-alang niya an mga tataramon na isinabi kan saiyang inang si Maria duman sa mga ayudante na “Gibuha sana nindo an ipapagibo niya saindo” (Jn. 2:5).
An punto-de-vista kan saiyang inang si Maria na dapat saklolohan ni Jesukristo iyo mismo an okasyon asin an mga tawong yaon gabos duman na dai maputol an kaogmahan. Para ki Maria, kun an mismong mag-agom na iyo an mtga bida kan okasyon habong magpahiling nin tanda nin pagtubod, dangan maghagad nin tabang para sa promerong problema ninda bilang bagong mag-agom, an bagay na iyan dapat nang ipagpasyensya ni Jesukristo nin huli ta, seguro an mga ini mga hoben pa, alagad dapat na isalbar ni Jesukristo an kamugtakan kan mga bisitang yaon duman asin an kasusupgan kan mga kagduwenyo. An okasyon na saindang inaatendiran nagkakaigwa nin problema sa presente, asin gusto ni Maria na magkaigwa nin kaibahan an dalagan kan buhay nin mga tawo kun yaon presente si Jesukristo. Iyo ini an presentasyon ni Maria kan magdulok siya ki Jesukristo tanganing magsabi na mayo na sinda nin arak.
Sa ngaran kan mga tawong bisita, kaiba an mga bagong disipulo, asin sa ngaran kan okasyon na saidang pinagtitiripunan an gusto niyang isalbar, si Maria iyo an nagpipresentar sa saiyang aking si Jesukristo kan tanda nin pagtubod na hinahanap kaini tanganing mag-abot na an saiyang oras nin paggibo kan mga tandang ngangalasan o milagro na hale sa Dios. An tanda nin pagtubod na ini ni Maria sa saiyang aki iyo an kahandaan niya na magpasakop sag abos na kagustuhan, kabotan asin desisyon ni Jesukristo. Huli kan pagtubod na ini, nagsabi siya sag abos ona ayudanteng yaon duman na nagsiserbi sa kasal na “Gibohan sana nindo an gabos na isabi niya sa saindo” (Jn. 2:5).
An pagtubod ki Jesukristo na gustong itao ni Maria, na bako sanang siya an dapat na magpahiling kundi an gabos man na mga tawong yaon duman sa kasal sa Cana, kaiba na man kita diyan, alagad siya an primerong tawong nagpahiling kan arog kaining klase nin pagtubod, bako bilang ina ni Jesukristo kundi bilang sarong marhay na disipulo kan Kristo, na dapat handa na magsunod asin magpasakop sa gabos na oras sa kagustuhan asin desisyon kan saiyang Maestro. Iyan an klase kan pagtubod ni Maria, na sarong magayon na panalmingan para sa gabos na boot magin disipulo kan saiyang aking si Jesukristo, asin bako an klase nin pagtubod na ginigibo nyatong diktador o parahagad nin mga pabor si Maria ki Jesukristo huli ta ginibo nyato si Maria bilang medyador, o tulay, o tagapag-ultanan, nyato pasiring sa sasaro sanang totoong tulay o tagapag-ultanan nin tawo sa Dios, na mayong iba kundi si jesukristo na akin i Maria sa laman. Dapat na handa an gabos na midbidon si Jesukristo bilang an tataramon asin Mesias nin Dios.
An kahulugan kan tubig na nagin arak
Kaya, kan pagbotan ni Jesukristo an mga ayudante na panuon nin tubig an anom na tapayan na yaon duman, asin pagkatapos ginibo na niya nin arak an tubig sa laog kana nom na tapayan, dangan pinagbotan niya an mga ayudante na magdara kan sinakdong arak duman sa mayordomo, an gabos na pangyayaring ini ginibo ni Jesukristo, bako sanang ipahiling niya an paggalang sa sentimyento nin pagmalasakit kan saiyang ina, kundi bilang regalo man para sa bagong kasal na mag-agom na kaipuhan asin angay na pagamiawon na sag abos na oras na kaipuhan ninda an tabang, yaon si Jesukristo na mag-iinterbenir asin pwdeng masarigan kan saindang problema.
An interbensyon o pakikilabot ni Jesukristo sa buhay mag-agom idinidepikto niya digdi sa evangelio bilang sarong kapangyarihan nin paggibo kan tubig na magin arak. An an boot sabihon kan tubig asin arak na ini?
Kan manamitan kan mayordomo an arak na ginibo ni Jesukrito hale sa tubig, an mayordomo nagsabi na “Sa kadaklan na tawo, parating ini-enot na iserbi an pinakamanagom na arak, dangan kun burat na an mga bisita, saka na ilinuluwas an pinakabaratng klase nin arak, alagad ika, baliktad, ipinahuri mo an pinakamanagom sag abos na arak sagkod ngonian” (Jn. 2:10). An sinasabihan kainin kan mayordomo iyo mismo an nobyo na dai nag-aaram-aram na igwa na palan sindang problema kasubago, asin an problemang ini sinilusyonan nan i Jesukristo maski dai siya nin pagtubod asin dai pa niya bisto kun siisay si Jesukristo, nin huli ta saro man sana siyang bisitang ordinaryo.
Ano daw an gustong sabihon nin Jesukristo digdi sa nobyong ini, asin sa saiyang nobya na bagong ikasal sa saiya, kun tano ta ginibo niyang managom na arak an sarong matabang asin daing kuwentang tubig? Ano an mahalagang katukdoan kan evangelio na yaon sa likod kaining milagro ni Kristo duman sa kasal sa Cana, na may dakulang mensahe para sag abos na mag-aragom na kristyano?
An mahalagang katukdoan, patin an magayon na mensahe, na puwedeng mapurot kan gabos na kristyanong mag-aragom iyo an mapapadapit sa saindang danay asin managom na relasyon o pag-iribahan bilang mag-agom.
Kadaklan na mag-aragom na bago pa sanang kasalon, parating minapoon kan saindang pag-iribahan na garo siring sa sarong mamahalon na arak, na managom, maisog asin malinig sa namit asin parong. An boot sabihon kaini iyo na sa marhay sana nindang boot, ideya, kaisipan, plano, o disposisyon asin kusog, na mayong ibang tawo o Dios na sinasarigan o iniimbuwelto, sinda nakakapagpadagos na pirmeng magkadayupot asin nagkakaminootan sa lambang saro, asin kun may pagkukulang o pagkakaksala an siisay man sa sainda, sinda madalion na maka-intyende, magpasyensiya, asin magpatawad. An espiritung ini nin pagkaminootan na yaon sa sainda sa pagpoon kan saindang pagkainagoman iyo an arak na sinasabi ni Jesukristo digdi sa evangelio.
Alagad, mantang naglilipas an panahon pagkatapos kan kasal, ano an nangyayari sa arak na ini? An dating managom, mahal asin pusog na pagiribanhan nagigin nang matabang, malabnaw asin baratong garo tubig.
Kaidto , kan bago pa sana sindang kasalon, an mag-agom na ini garo dai magkapuruknitan, mahahamis an pag-arapodan asin maggalang sa mga kamatean asin ideya kan lambang saro. Alagad ngonian, nakalihis sana an anom na bulan, o sangtaon, o limang taon, o smapulong taon, dai na haros sinda nagtitirinuhan, o nagoorolay man lamang. Kun mag-orolay pa man, ini sa paging anggot, o sirilyakan, o hirinanakitan, na parating nagpupuruli sa iriwal, asin dai na naman pagtirinuhan. Mantang naghahaloy na arog kainin an pirmeng sitwasyon kan mag-agom, mas lalong naghahararom an lugad nin maribok na relasyon. An arog kaining mga gawe-gawe asin pag-uugali sa laog kan harong nagigin buwisit sa pagorobanhan, kaya patin kabuhayan kan pamilya apektado. Kun apektado an pangunguwarta kan pamilya, nagigin depisil an pagmantenir asin pagsustenir kan mga panganagipo kan pamilya. Dangan an relasyon nagigin konsumisyon, sagkod na magtapos ini sa separasyon.
Sa arog kaining pangayayari na nagpoon na magayon an pagiribanhan kan mag-agom na siring sa mahal, managom asin maisog na arak, na minasimbolisar kan dayupot, liputok asin malinig na relasyon kan mag-agom sa mga primerong taon, alagad ngonian, nagin nang sarong malabnaw, barato asin matabang na tubig, na minasimbolisar kan matabang, malipot asin inaburidong relasyon sa p[resente, ano daw an mga nagin pagkukulang, kapabayaan o pagkakasalang naginibo kan lambang saro tanganing mahulog an siring na relasyon hale sa pagigin arak sa pagpoon, alagad ngonian tubig na? Bako daw iyo ini an sinabi kan mayordomo na “sa kadaklan na mga tawo, inienot munang iluwas an pinakamanagom na arak, dangan na sana ilinuluwas an baratong arak kun burat na an mga bisita”?
An nangyari sa mag-agom na ini, na nagpoon sa arak dangan natapos sa pagigin tubig an pagiribanhan, iyo an tuyong inulang o pinasipara o initsa-puwera ninda si Jesukristo sa saindang buhay. Dati, sa pagpoon, kumbensido asin segurado an pagtitiwala asin pagsarig ninda sa saindang mag sadiring plano, ideya, kakayahan asin kusog tanganing magsustenir kan saindang pagiribanhan. Alagad, sa pag-agi kan mga panahon, kadakul na mga sorpresang uminarabot sa saindang buhay na dai sinda handang mag-atubang na sa sadiri sana ninda. Pagkatapos na magsarig asin magtiwala sinda sa mga pangako asin mga sumpa na ginibo ninda sa lambing saro, na maigot na malingkod asin mapagadan sinda sa lambing saro, alagad ngonian nakapaggamiaw na sinda sa reyalidad na mayong nangyari duman sag abos na mga pangakong binutsan kan promerong aldaw nin saindang pag-iribanhan. Ngonian, muklat na sinda na kaipuhan ninda an ibang tataramon, na bakong tataramon kan sadiri kundi an Tataramon nin Dios na dai nagbabago, dai nagpuputik asin dai nagtatalikod sa gaboso na sinumpaan asin pinangakoan, asin an Tataramon na iyan iyo si Jesukristo.
Iyo iyan an punto kun tano ta si Jesukristo nag-interbenir o nakilabot man giraray sa problema kan bagong kasal ma mag-agom duman sa Cana, maski ngani naghahalat si Jesukristo kan tanda nin pagtubod na dapat maggikan sa sainda. Gusto ni Jesukristo na ipahiling sa mag-agom na ini na igwa siyang kakayahan na isalbar an saindang relasyon sa paagi kan paggibo nin arak hale sa tubig, na nagsisimbolisar kan dating malipot asin barato nang relasyon pasiring sa pagigin mainit asin mahal na pagiribanhan giraray.
An bagong arak ni Jesukristo
Paano nakikilabot si Jesukristo sa buhay kan mga mag-aragom, kun saen nahihiling nyatong ginigibo niyang managom an arak an saindang pag-iribanhan o relasyon na nagigin tubig?
Kun an mag-agom makanood na magtubod asin magsunod ki Jesukristo, na magin niyang mga disipulo bilang mga kristyanong totoo asin tunay na paraotob kan saiyang mga katukdoan, kun siring an mag-agom na iyan mabubuhay sosog sa espiritu ni Cristo. An espiritung ini iyo an inaapod sa evangelio bilang “arak”, asin an kabaliktaran kan espiritung ini iyo an “tubig”, na minarepresentar kan espiritu nin kinaban.
An kalidad na sa-arak na sinasabing nagpapatibay, nagpapanagom asin nagpapamahal sa arin man na relasyon nin magkasi-tawo, puwedeng sa laog kan pamilya o sa sosyedad, iyo ining kalidad nin sakripisyo, sosog sa pormulang itinukdo sato sa evangelio na, “An buhay iyo an suma total kan pagkamoot asin sakripsiyo”. An pormulang ini puwedeng ipaliwanag sa saro pang paagi, na iyo an Lehe Universal kan Pagkamoot (Universal Law of Love), na nagsasabi na “An sarong linalang (magin tawo, hayop, tinanom, minarela, o purong espiritu, aspba.) nabubuhay para magadan tanganing an iba mabuhay”.
Pagkatapus na magtalikod an pinaka-enot na tawong linalang sa leheng unibersal na ini nin Dios, an primerong tawo naman na enot na nakaotob kan leheng ini nin pagkamoot iyo si Jesukristo. Inotob niya ini kan isakripisyo niya an saiyang sadiri duman sa itaas kan kahoy nin krus tanganing, huli kan pagdolot niya kan saiyang sadiring buhay sa pag-ako nin kagadanan, an katawohan mabalukat sa kapangyarihan ni Satanas na iyong nag-oripon sa tawo sa halawig na panahon huli sa pagkatakot sa kagadanan, tanganing an tawo magpoon na mabuhay liwat sosog sa kapangyarihan nin pagkamoot asin pagkaherak nin Dios diyan sa espiritu ni Cristong nabuhay-liwat asin nagbangon sa pagka-gadan.
An bagong arak na sinasabi ni Jesukristo na saiyang iinumon duman sa kahadean nin Ama iyo ining resureksyon kan saiyang bago asin mamurawayon na hawak, na iyo an Sta. Iglesia, an inaapod na Corpore Mistiko niya (1 Co. 12:27-28; Ef. 2:16; 4:12, 15-16), na iyo man sana kitang mga kristyanong binautismohna diyan sa pagtubod ni Jesukristo. An restorasyon o resureksyon kan tawo sa bagong hawak ni Kristong nabuhay-liwat sa mga gadan asin nanggana laban sa kapangyraihan nin kagadanan asin kasalan, iyo iyan an sarong bago asin masiram na “arak” na iinumon ni Kristo duman sa kahadean kan Ama sa langit. Kun siring, an “arak” na ini bakong sarong literal na arak, kundi an sarong bagong katukdoan na nagdadara nin sarong bagong kaisipan na yaon sa sarong bagong tawong si Jesukristo.
An espiritu ni Kristo sa laog kan pamilya
Kun siring, sa mga kristyanong mag-aragom sana na nakamate na sa saindang personal na pagkabuhay kan pagbabagong dara kan kapangyarihan kan pagkabuhay-liwat ni Jesukristong dai nagsayumang mag-ako nin sakripisyo asin kagadanan, alang-alang sa dakulang pagkamoot sa Ama sa langit, iyo an nagkakaigwang kalidad na sa-arak an saindang relasyon asin pag-iribanhan sa laog nin sarong krisytyanong pamilya. Kun paano si Kristo nagmalasakit para sa entering kapakanan kan saiyang esposa, nay o an Sta. Iglesia (Ef. 5:21-23), arog man kaiyan an pagkamoot asin sakripisyo na hinahagad ni Kristo para sag abos na kristyanong mag-aragom.
Kaya, an pirmeng tinatawan nin sarong dakulang konsiderasyon nin mag-aragom sa laog kan saindang sadiring pamilya iyo ining mga pagsasakripisyong ginigibo kan lambing sarong miyembro, magin saradit o darakulang sakripsiyo, para sa ikararahay, ikatitibay, ikauuswag asin ikapapatalubo kan pag-iribanhan nin lambing saro.
An lambang miyembro kan pamilya, magpoon sa ama, na iyo an payo kan pamilya, sagkod sa ina, patin an gabos na aki, dapat makanood kan espiritu nin sakripisyo asin pagtios o kasakitan, asin bako sanang puro kaogmahan an hinahanap, tanganing magin kumpleto asin lubos an saindang buhay. Lalong-lalo na an mga kaakian, dapat makanamit asin matood sa kasakitan tanganing makanood na maggamit kan saindang isip, mamuklat sa tama asin positibong atitud dapit sa pagsasakripisyo, tanganing dai magparasarig sa mga kakayahan, abilidad asin kusog kan saindang mga magurang o ibang tawo. An tamang halaga na yaon sa pagtios asin sakripisyo iyo an kontribusyon na itinatao kaini tanganing magin pusog asin matibay an pag-iribanhan kan mga miyembro kan pamilya.
An bagong arak sa bagong anit
Bilang ultimong punto, igwa si Jesukristo nin saro pang kasabihan na igwa nin koneksyon sa temang ini nin “arak” asin “pagsasakripisyo” na, “Asin mayo nin siisay man na minabugtak nin bagong arak sa lumang anit; huli ta kun gibuhon niya iyan, an bagong arak iyo an mabusi kana nit dangan maburulos an arak asin an anit masasayang. Dai; an bagong arak iyo an para sa bagong anit. Asin mayong tawong tood nang mag-inom kan lumang arak an magugusto kan bago. Masabi siya, “Mas marhay an luma.” (Lk. 5:37-39).
An kasabihan na ini ni Jesukristo nangangahulugan na an “bagong arak” na itinatao ni Jesukristo dai inaapresyar kaidtong mga burat sa lumang arak kan Katugunan.
An pinapatamaan kan kasabihan na ini iyo an mga Judiyong kakontra-pelo ni Jesukristo na gusto niyang butungon asin kumbensiron sa saindang natural na pagkarelihiyoso. An mga Judiyong ini naghohona na lumang arak an saindang iinomon, kaya nasiraman sinda sa saindang relihiyon o pagsa-Dios. An boot sabihon kan “Lumang Arak” iyo an mga orihinal na Katugunan asin katukdoan ni Moises na itinao nin Dios sa profeta asin lehislador na ini duman sa Bukid nin Sinai. Alagad, dai aram kan kadaklan na mga Judiyo kan panahon ni Jesukristo na haloy nang nawara asin natunaw an mga orihinal na mga katukdoan nin Moises, dangan naribayan na ini nin sarong bagong padis na katukdoan na mga interpretasyon nin mga tawo n asana (mga katukdoan nin mga abogado, doctor asin eskriba kan Katugonan) na harayo asin iba nang marhay duman sa orihinal na katukdoan ni Moises (Hilo. An Mt. 15:1-9; 23:1-36; Lk. 11:37-54). An pagkaribay kan orihinal naTugon nin Dios kan mga reglamento nin mga tawo sana, iyo an sinasabi nyatong pagsalakay kan natural n arelihiyon sa dating sobrenatural na relihiyon na hale mismo sa Dios. Asin nangyari an pagsalakay na ini kan natural na relihiyon sa saindang pagtubod kan pinatindog kan mga Judiyo an relihiyon Judaismo sa pagboot kan Hadeng Ciro kan Persia pagkatapos na pabalikon sinda hale sa pagka-distierro. Sagkod sa panahon ni Jesukristo, an sinusunod na relihiyon kan gabos na Judio iyo ining Judaismo, na saro nang sekta kan orihinal na relihiyon na pinatindog ni Abraham, ni Moises asin kan mga profeta sa disyerto, kun saen inorganisar ninda an primerong iglesia nin Dios. Kaya, sa paghona kan mga Judiyong inabtan ni Jesukristo kan panahon niya, iyo na an mga katukdoan ni Jesukristo iyo an bago asin an mga katukdoan na tinutubod asin sinusunod ninda iyo an luma, mantang para ki Jesukristo an mga katukdoan niya iyo an luma nin huli ta iyo ini an mga orihinal na katukdoan sa langtad asin ta an mga katukdoan kan mga Judiyo iyo an bago nin huli ta iyo ini an mga bagong imbento kan saindang mga abogado asin mga eskriba.
Yaon digdi an kadepesilan sa sikolohiya kan kadaklan na mga tawo, na ta miling ngonian pa sana ninda nadadangog an paliwanag dapit sa sarong bagay, naghohona na sinda tolos na ini iyo an sarong bagong katukdoan o doktrina para sa sainda. An paghona ninda, an dati na nindang naaraman iyo an luma, asin, kun siring iyo na an masiram nin huli ta tinodan na ninda. Dai na sinda miona-imbestigar o minasiyasat kun baga arin an mas bago asin an mas luma, nin huli ta habo na nindang gastaron an saindang isip tangaing mag-isip kun arin an tama asin kun arin an sala, basta an masiram para sainda iyo an tinodan asin nagimatan nin huli ta iyo iyan an sinusuinod kan kadaklan o kan gabos na tawo. Para sainda, an tinodan asin nagimatan iyo an luma, kaya iyan an masiram. “An sabi ninda, ‘Mas marhay na luma’” (Lk. 5:39).
Alagad an para ki Jesus, an mga katukdoan na tinodan asin nagimatan kan mga Judiyo iyo an bago, nin huli ta an mga ini iyo an bagong mga imbento kan saindang mga maestro kan Tugon, an mga abogado, doctor asin mga eskriba (Jer. 8:8-9). Para saiya, igwa nin mas luma asin mas masiram pa kisa sa sinasabi indang luma asin masiram na bago man sana palan, na iyo an mga orihinal mna mga lehe asin ordinansang hale sa Dios mismo na itinao kaidto ki Moises sa disyerto. Ini an dai aram kan mga tawo kaidtong panahon ni Jesukristo. Sa paghona ninda, an luma iyo idtong dating naaaraman asin parating nadadangog na pa-oro-otrong itinuktukdo sa sainda sa mga tradisyon asin mga librong binabasa, danagn an mga bago naman iyo idtong nadadangog pa sana ninda ki Jesukristo. Huli kan paghonan ini, dai ninda inaapresyar an mga katukdoan ni Jesukristo nin huli ta bago para sa pagdangog ninda, kaya habo sindang magdangog asin magtubod ki Jesukristo. Aktuwalmente asin an totoo iyo na ining mga katukdoan ni Jesukristo iyo an luma nin huli ta iyo ini an orihinal, asin kun siring, iyo an mas masiram. Kun naisip lang kutanang marhay an mga tawo, maaaraman ninda na an sinasabi nindang luma, na iyo an saidang nagimatan asin tinodan na, aktuwalment iyo an mas bago, asin an mga itinutukdo ni Jesukristi iyo idto an mas luma, maski bago pa sana nidang nadadangog ngonian (Hil. 1 Jn. 2:7-8), asin iyo an mas masiram. Mas masiram ini para sa mga tawo, nin huli ta dai nanggad sinda maloloko kan saindang mga pastor sa relihiyon na kaidto nanganguwarta sana sa sainda nin huli ta mas gusto kan mga relihiyosong lider na ini an mga ritwal nag awe-gawe asin mga pangkulturang tradisyon kan mga tawo kisa sa magtukdo asin magpaliwanag kan mga tataramon nin Dios (Hil. Is. 56:9-57:13; Jer. 5:26-32). Alagad, mas naoogma asin nasisiraman a logod an mga tawo sa mgadaing kuwentang mga ritwal asin mga tradisyon na ini, kisa magdangog sa Tataramon nin Dios (Jer. 5:31). Kaya, isinikwal asin habo sindang mag-ako kan tataramon o Kadonongan nin Dios na nai-tawo na iyo mismo si Jesukristo, asin dai haros ninda ma-apresyar an mga katukdoan niya.
An kasabihan na ini ni Jeuskristo (Lk. 5:37-39) asin an pangyayaring sinasabi digdi, igwa nin koneksyon sa satuya man na presenting kamugtakan sa pagrerelihiyon. Yaon man kita ngonian sa arog kaining tension dapit sa pagpili sab ago asin sa luma.
Kadaklan sato nakakaagid duman sa mga reklihiyosong Judio, na mas gusto an dati nindang mga gawe-gawe asin tradisyon nin huli ta iyo an nagimatan asin, kunsiring, iyo an mas masiram par sainda, na mas gusto man an mga tinodan asin nagimatan naytong mga gawe-gawe sa relihiyon huli ta iyo an ino-oro-otro sa sato. Kun kaya, maski dai na kita mag-isip pa nin huli ta nakasaromsom na sa satuyang kaisipan an mga bagay na ini, kaya kumbensido na kita na ini an totoo aisn tunay. Kaya, kun pinipresentaran kita nin paliwanag o doktrina na dai nyato pinagtodan, iyan bago para sa satong pagdangog asin, kadalan na beses, garo bakong masiram sa pagdangog nyato. Kun baga, namamagohan kita kan primero ta pa sanang nadadangog, kaya an biglang reaksyon ta iyo na isikwal asin dai apresyaron iyan, huli ta mas gusto ta pa an dati.
Sa arog kainig sitwasyon, hinahagad sato kan evangelio na buksan nyato an satong isip sa sinasabi nyatong mga bagay nab ago, asin isipon tang marhay kun talagang bago an satong nadadangog o tibaad dati man sana, alagad bago sana an presentasyon. Siring man, buksan man nyato an satuyang isip duman sa mga dating pinagtodan asi nagimatan na nyato, asin siyasaton ta man kun bagao totoo pa man nanggad an dati, luma, o orihinal pang mga katukdoan ini, o tibaad bago na, o naribayan nan in mga bagong inovasyon. Kaya, tanganing totoong makapagsabi kita na “masiram an luma”, siyasaton ta nanggad an sinasabi tang luma o bago antes kita magsbaong masiram. Tibaad, mas masiram an sarong bagay na nadadangog ta pa sana ngonian, alagad iyan palan an orihinal, o an dati pang katukdoan kaidto. O, tibaad magsabi kita na masiram an luma, alagad igwa pa palan mnin mas masiram kisa kaiyan, nin huli ta mas luma pa kisa sa sinasabi o pinaghohona ninda.
Kaya, an sabi sato ni Jesukristo, iyo na mag-ingat kita sa pagbugtak kan bagong arak diyan sa lumang anit, nin huli ta bubusion kan bagong arak an lumang lalagan na anit kun magpoon na ini na mag-isog, dangang parehong masasayang an lalagan na anit asin an arak. Dapat na kun bago an arak, bago man an anit.
An kahulugan kan kasabihan na ini iyo na dai nyato puwedeng ipgasalak an bagong katukdoan sa luma, nin huli ta an duwang ini magkakaigwa nin tension asin ta, sa katapos-taposi, mag-iiriwal an duwang opinion na ini asin pareho nyatong masasayang an duwa. Dai, an bagong katukdoan nangangaipo nin bagong kaisipan na bubugtakan, siring na an lumang katukdoan igwa man iyan nin lumang kaisipan na puwdeng mabugtakan kaiyan. Kaya, kun bago an satong mga nadadangog na katukdoan dapat nab ago man an satuyang pagdangog asin pag-isip kaiyan. Dai nyato dapat na ipagsalak an mga dati nyatong nanodan kaidto, tanganing maintiyendihan an bagong isinasabi o itinutukdoa sa sato. Nin huli ta, kun arog kaiyan an satuyang gigibuhon, maabot an panahon na madidisganar kita, asin matapos an satong pag-adal na mayong kapundohan. Kaya, bagong katukdoan para sa bagong kaisipan, asin an luman katukdoan para sa lumang kaisipan. Dai nanggad puwede na an bagong katukdoan para sa lumang kaisipan, o an lumang katukdoan para sa bagong kaisipan.
No comments:
Post a Comment